მიუხედავად იმისა, რომ ქალბატონი ზინას სახლში იანვრიდან მოყოლებული დღემდე დროებით არავინ ცხოვრობს, ელექტროენერგიის გადასახადი მაინც მიუვიდა!
ქალბატონმა ზინამ თავად სცადა ვითარება “ენერგო პრო ჯორჯიას” ჩოხატაურის სერვის ცენტრში გაერკვია, მაგრამ ვერაფერს გახდა. სერვის ცენტრში მისი შვილიც უშედეგოდ ცდილობდა პასუხის მიღებას. “ენერგო პრო ჯორგია” ის ბიზნესორგანიზაციაა, რომელიც პრივილეგიებით სარგებლობს, არც მომხმარებლის პრეტენზიის ეშინია და არც დაუხარჯავი ელექტროენერგიის საფასურის მოთხოვნას ერიდება _ სადაც გინდათ, იქ იჩივლეთო _ ასეთია მათი ირონიული პოზიცია.
სოფლის ხელმძღვანელობა, როგორც ჩვენში მიღებული წესია, მოქალაქის დასაცავად თავს არ იტკივებს და ამ შემთხვევაშიც სხვასთან გადაგვამისამართეს _ საქმის გასარკვევად მოქალაქე თემურ რამიშვილისკენ მიგვითითეს, რომელიც ამ სოფელში დახარჯულიო ელექტროენერგიის აღრიცხვას ატარებს. მისი თქმით, ვინაიდან სოფელში მოსახლეობის ინდივიდუალური გამრიცხველიანება დღემდე არ მომხდარა, საერთო მრიცხველზე დახარჯული თანხა გადანაწილდა ყველა მაცხოვრებელზე და მათ შორის, ქალბატონ ზინაზეც, რომელსაც ელექტროენერგია არ დაუხარჯავს.
“ენერგო პრო ჯორჯიას” ჩოხატაურის სერვის ცენტრის ხელმძღვანელი კი ჭკუას ასე ასწავლის მოსახლეობას: _ თუ აბონენტი სახლში არ არის, მან განცხადება უნდა დაწეროს ჩვენს სახელზე და მაშინ არავინ გადაახდევინებს მოუხმარებელი ელექტროენერგიის საფასურს.
მანამ, სანამ ჩვენს ქვეყანაში “კომუნალური მრიცხველები” ერთეული კომპანიების ჯიბის სასარგებლოდ ტრიალებენ, იყავით ფრთხილად და… აუცილებლად დაწერეთ განცხადება!
ჩვენ კი აუცილებლად გამოვაქვეყნებთ წინასაარჩევნო “პროგრამებს”, რომლებშიც, ხელისუფლების 9-წლიანი მმართველობის პერიოდში, არაერთხელ შეგვპირდნენ, რომ მხოლოდ დახარჯული ელექტროენერგიისთვის გადაგვახდევინებდნენ უმოწყალოდ მაღალ საფასურს!
