პოლიტოლოგი სოსო ცინცაძე ვარაუდობს, რომ ბოლო პერიოდში განვითარებული მოვლენების შედეგად, „ნაციონალური მოძრაობის“ ყოფნა-არყოფნის საკითხი დადგა და ქვეყანა ორკაციანი ოპოზიციური პარტიების იმედად შეიძლება დარჩეს.
"სიმბოლური ლიდერი შეიძლება იყო, მაგრამ ადგილზე ვინ იქნება ლიდერი, რომელიც მიიღებს ყოველდღიურ გადაწყვეტილებებს, რომელიც პარტიას მართავ, თუნდაც სააკაშვილთან შეთანხმებით _ მე ასეთ კადრს ვერ ვხედავ. ამ ორომტრიალის შედეგად უკვე დადგა "ნაციონალური მოძრაობის" ყოფნა-არყოფნის საკითხი. საკითხი ასე დგას: "ნაციონალური მოძრაობა" იქნება ასეთი თუ არ იქნება. ეყოლება თუ არა ქვეყანას ძლიერი ოპოზიციური პარტია, თუ ქვეყანა დარჩება ორკაციანი პარტიების იმედად“, _ აცხადებს პოლიტოლოგი გაზეთ „ვერსიასთან“ საუბრისას.
სოსო ცინცაძე პარტიის ახალი თავმჯდომარის არჩევის საკითხსაც შეეხო და აღნიშნა, რომ შეუძლებელია, სააკაშვილმა ტელეფონზე "ჩამოკიდებულმა" მართოს პარტია. ცინცაძის თქმით, გიგა ბოკერიას უფრო „რუხი კარდინალის“ როლი შეეფერება, ყველაზე საუკეთესო კანდიდატად კი ის ბაქრაძეს მიიჩნევს, თუმცა ამ უკანასკნელმა უარი განაცხადა აღნიშნულ პოსტზე.
„ფაქტი ერთია: პარტია გაიყო ორ ნაწილად _ გიგა ბოკერია, დავით ბაქრაძე და ეს ნაწილი გამოდიან დღევანდელების როლში, მეორე ნაწილი კი, რომელიც ამბობს, რომ სააკაშვილი უნდა იყოს თავმჯდომარე _ არიან ნეტარმორწმუნე გუშინდელები საუკეთესო შემთხვევაში, უარეს შემთხვევაში კი _ ფანატიკოსი არაპროფესიონალები. სააკაშვილს, ელემენტარულად, ჩამოსვლაც კი არ შეუძლია, არათუ პარტიის მართვა. პარტია არის ცოცხალი ორგანიზმი, ყოველდღიური გადაწყვეტილებების მისაღები, წარმოუდგენელია, სააკაშვილი ყურმილზე ჩამოეკიდოს და ასე დისტანციურად მართოს პარტია, ეს შეუძლებელია… რაც შეეხება ერთ ფრთას _ ბოკერია ინტელექტუალია, იქ გონებრივი რესურსით ყველაზე ძლიერია, მაგრამ ბევრისთვის ბოკერია რომის პაპზე მეტად კათოლიკეა, რაც მისი მინუსია. ის უფრო უკანა პლანიდან მოქმედი სტრატეგის როლში მესახება, რომელსაც ხშირად "რუხ კარდინალს" უწოდებენ. დავით ბაქრაძე თავისი გაწონასწორებულობით დღეს ყველაზე მისაღები ლიდერი იქნებოდა, მაგრამ მან უარი თქვა _ კენჭს არ ვიყრი პარტიის თავმჯდომარის პოსტზეო. როგორც ჩანს, დემაგოგიის მოსალოდნელ საფრთხეს ვერ გაუძლო. მეორე ფრთის ლიდერი ვინ შეიძლება იყოს? მე იქ ასეთ ლიდერს ვერ ვხედავ", _ აცხადებს ცინცაძე.
