"როდესაც გიგი უგულავაზე ვფიქრობ, სულ მახსენდება 70 წლის პენსიონერი, ჭილაშვილი – ლტოლვილი სამაჩაბლოდან, რომელსაც ორი დამპალი ფიცრის ქურდობისთვის (ფიცრების პატრონი ვერასდროს დადგინდა, უპატრონოდ ეყარა ქუჩაში!)
ნაცების სასამართლომ ჯერ 2 წელი მიუსაჯა, მერე 5,000 ლარიანი საპროცესო გარიგება შესთავაზეს, და ბოლოს 1 წლით ჩასვეს. ამ ფიცრების მაქსიმალური შესაძლო ფასი 15 ევროც კი არ იყო – თომას ჰამარბერგმა თქვა, რომ მსოფლიო ისტორიას არ ახსოვს ეგეთი შემთხვევა!
15 ევროს ღირებულების ნივთის მოპარვისთვის (აღებისთვის! – პატრონი ხომ არც არსებობდა!) 70 წლის უმუშევარი მოხუცის 1 წლით დაპატიმრება!
ჰო, ჭილაშვილი პოლიტპატიმარი არ იყო! ამიტომ, ჰამარბერგის მეტს არავის გახსენებია… და არც ბოდიში მოუხდია არავის." _ წერს სოციალურ ქსელში ექიმი ზვიად კირტავა და სხვა შემთხვევბსაც იხსენებს:
"კიდევ იყო ასეთი შემთხვევაც – ახალგაზრდა ბიჭმა ღამით მოიპარა საბურავები. სულ 16 ცალი. მოსამართლემ გადაწყვეტილებაში განაცხადა, რომ რამდენადაც მას თანამზრახველი არ ჰყავდა, სავარაუდოდ, საწყობიდან გამოჰქონდა მაქსიმუმ 4 ცალი საბურავი 1 ჯერზე (2-2 საბურავი თითოეულ ხელზე ჩამოცმული).
და 16 საბურავის მოპარვა ჩათვალა ქურდობის 4 შემთხვევად!!! და შემდეგ თითოეულ შემთხვევაზე მისცა 4 წელი, რაც ამ ტიპის დანაშაულზე მაქსიმუმი იყო. გამოვიდა 16 წელი! თითო საბურავი ალბათ 60-70 ლარი ეღირებოდა, (თუ მეორადი იყო, ნაკლებიც) ესეიგი. დაახლოებით 1000 ლარის ღირებულების საქონლის მოპარვაზე (თან პირველი შემთხვევა იყო!) – 16 წელი! 16 წელი სააკაშვილის ციხეში!!!
და კიდევ ერთი ცოტა კურიოზული შემთხვევა – ვიღაც ახალგაზრდა ბიჭმა მოიპარა გოჭი. რომ გარბოდა, გამოეკიდა პატრული. შეშინებულმა ქურდმა, პატრული რომ მოუახლოვდა, მიხვდა, გოჭიანად ვერ გაექცეოდა და გოჭი დააგდო. საცოდავი გოჭი გავარდა და პატრულის მანქანას პირდაპირ ბორბლებში შეუვარდა! ეს ბიჭი გაასამართლეს ცალკე გოჭის მოპარვისთვის და კიდევ გოჭის მოკვლისთვის (მიუხედავად იმისა, რომ გოჭი ფაქტიურად პატრულის მანქანას ემსხვერპლა, მაგრამ მოსამართლემ თქვა, – სპეციალურად შეუგდო ბორბლებშიო!) და 9 წელი მიუსაჯეს! გოჭის მაქსიმალური ფასი იმ დროს ალბათ 60 ლარი იქნებოდა!!! ბოლო ნამდვილად დრამატული იყო.
და ბიუჯეტს სწორედ ეგრე ავსებდნენ – საპროცესო გარიგებებით – 100 მილიონ ლარს გადააჭარბა 2010-ში თუ 2011-ში საპროცესო გარიგებებით ბიუჯეტში შესულმა თანხამ – აი, რა იყო "ძლიერი ეკონომიკის" საფუძველი – მოდერნიზებული პროკრუსტეს სარეცელი და ღამის გინტურ-ნოტარული სისტემა!" _ წერს კირტავა.
