_ ის სტამბა, რომელიც ბეჭდავდა გაზეთ “ქართულ ოცნებას”, აღარ ბეჭდავს. როგორც ვიცი, იქ შესულია კონტროლის პალატა. ამ გაზეთის გამოცემა ნერვებს უშლიდა ხელისუფლებას და მათი ქმედებით, გამოდის, გვიკრძალავენ პარტიული გაზეთის გამოცემას.
როგორც ჩანს, უარის თქმა გაზეთის დაბეჭდვაზე მოხდა 7 ივლისს, ჩემთვის კი ეს ორშაბათს გახდა ცნობილი.
ჩვენმა აზერბაიჯანულმა რედაქციამ მოამზადა გაზეთი, რომელიც უნდა დაბეჭდილიყო, მაგრამ სტამბას უკვე აღარ შეეძლო გაზეთის დაბეჭდვა და გვითხრა უარი.
_ რომელ სტამბაში იბეჭდებოდა “ქართული ოცნების” გაზეთი?
_ გაზეთი იბეჭდებოდა “ელიტ ბურჯში”.
ელისო ჩაფიძე ჩვენთან საუბრისას ამბობს, რომ ხელისუფლება არ კმაყოფილდება თავისუფალი მედიის დევნით, რომელიც განსაკუთრებით 2004 წლიდან დაიწყო და მძაფრი ხასიათი ამ ბოლო წლებში მიიღო:
_ როდესაც ჩვენ ქუჩაში გამოვედით მედია-ჰოლდინგ “პალიტრაში” ფინანსური პოლიციის შესვლის გამო, ასევე ფოტორეპორტიორების საქმეზე, ამის შემდეგ ხელისუფლება დაერია გაზეთებს. მოგეხსენებათ, გაზეთების გავრცელების გამო, რა ამბები იყო, როგორ ავიწროებდნენ ჟურნალისტებს, დევნიდნენ და არ აძლევდნენ მუშაობის საშუალებას, რის გამოც, როგორც ჟურნალისტს, აღარ მეძლეოდა ჩემი პროფესიული საქმიანობის თავისუფალ გარემოში გაგრძელების საშუალება.
ძალიან დიდი ტკივილისა და ნერვიულობის ფასად მივიღე გადაწყვეტილება, პოლიტიკაში წასვლის შესახებ, იმისთვის, რომ ჩვენმა ხელისუფლებამ უზრუნველყოს მედიის მუშაობა თავისუფლად.
გაზეთ “ქართული ოცნების” შემთხვევაში, არჩევნებამდე ორი თვით ადრე, ხედავს რა საზოგადოების მხარდამჭერას, ხელისუფლებამ გადაწყვიტა, შეუძლებელი გაეხადა ამ გაზეთის დაბეჭდვა,” _ გვითხრა ელისო ჩაფიძემ.
