ცვლილებები ბიუჯეტში _ შემცირებული სოციალური დახმარებები და გაზრდილი დაფინანსება ინფრასტრუქტურას

დღეს, ქალაქ ოზურგეთის მუნიციპალიტეტის საკრებულოს სხდომა გაიმართა, რომელზეც დღის წესრიგით გათვალისწინებული 4 საკითხი განიხილეს და დაამტკიცეს.

“ქ.ოზურგეთის მუნიციპალიტეტის 2017 წლის ბიუჯეტის დამტკიცების  შესახებ“, საკრებულოს 2016 წლის 20 დეკემბრის #24 დადგენილებაში ცვლილებების შეტანის თაობაზე საფინანსო – საბიუჯეტო სამსახურის უფროსმა მარიკა ნაცვალაძემ ისაუბრა:

ნაცვალაძის განცხადებით, 2017 წლის 1 იანვრის მდგომარეობით, საბიუჯეტო სახსრების ნაშთმა 2 116 217,80 ლარი შეადგინა.

რეგიონებში გასახორციელებელი პროექტების ფონდებიდან ადგილობრივი თვითმმართველი ერთეულებისთვის გამოყოფილი ტრანსფერის ნაშთი შეადგენს 2 090 925.47 ლარს.

საგზაო ინფრასტრუქტურა, მშენებლობა -რეაბილიტაცია არაფინანსური აქტივების მუხლი გაიზრდება 280 392,79 ლარით, ბინათმშენებლობა-სხვა ხარჯების მუხლი 43853.32 ლარით გაიზრდება, კეთილმოწყობის სამუშაოები _ არაფინანსური აქტივების ზრდის მუხლი 1 693 167.27 ლარით იზრდება.
2016 წელს დარჩენილი ნაშთი  73512.09 ლარი მიიმართება სახელმწიფო ბიუჯეტში, მუნიციპალიტეტის საკუთარი შემოსავლების ნაშთი 72 517.21 ლარს  შეადგენს.
2017 წლის ბიუჯეტში პრიორიტეტბს შორის ცვლილებები ხორციელდება:

მერიას უმცირდება შრომის ანაზღაურება 30.3 ათასი ლარით, კომუნალური მომსახურების ცენტრის სუბსიდია 25.0 ათასი ლარით მცირდება, ასევე, 2.0 ათასი ლარით მცირდება ზოგადი განათლების ხელშეწყობის  სუბსიდია. ფეხბურთის განვითარების ფონდის ხელშეწყობა _ გრანტების მუხლი 180.0 ათასი ლარით შემცირდება, კულტურული ღონისძიებების დაფინანსება 25.0 ათასი ლარით მცირდება, დაფინანსება ალ.წუწუნავას სახელმწიფო დრამატულ თეატრს 350.0 ათ.ლარით შეუმცირდა. ფოლკლორის სახელმწიფო ცენტრს კი _ 41.5 ათასი ლარით.

განსაკუთრებული საჭიროების მქონე პირთა დახმარების პროგრამას 2.7ათასი ლარი მოაკლდა და მზრუნველობამოკლებულთა ერთჯერადი უფასო კვებით უზრუნველყოფის პროგრამა მცირდება 3.0. ათასი ლარით. დაფინანსებები უმცირდებათ ხანდაზმულთა სახლისთვის კომუნალური გადასახადების პროგრამას 4.8 ათასი ლარით, უსახლკაროთა დარჩენილი ოჯახების  დახმარება-ბინის ქირით უზრუნველყოფა 3.8 ათასი ლარით, მრავალშვილიანი ოჯახების სოციალური უზრუნველოყოფა შემცირდება 5.6 ათასი ლარით.

გამოთავისუფლებული ფულადი სახსრები 678.7 ათ. ლარი მიიმართება შემდეგ პროგრამებში:

“სარეზერვო ფონდი გაიზარდება 0.2 ათ.ლარით, კეთილმოწყობის სამუშაოები არაფინანსური აქტივების ზრდის მუხლი იზრდება 637.0 ათ.ლარით. დაფიანნსება ეზრდებათ რაგბის განვითარების ცენტრს 10.0 ლარით, ასევე, გაერთიანებული სპორტის განვითარების ცენტრს ეზრდება დაფინანსება 10.3 ლარით, სახვითი ხელოვნების ცენტრს 4.8 ათ.ლარი ემატება, სამხატვრო სკოლას _ 4.9 ათასი ლარით, მუსიკალურ სკოლას კი 11.5 ათასი ლარით გაეზრდებათ დაფიანსება.
მეორე საკითხი იყო “2017 წლის ბიუჯეტიდან სოციალური დახმარების გაცემის წესის დამკიცების შესახებ“, საკრებულოზე დადგენილების მისაღებად, საჯარო ადმინისტრაციული წარმოების დაწყების თაობაზე, სოციალური სამსახურის უფროსმა თამარ დუმბაძემ ისაუბრა, მისი განცხადებით ქალაქ ოზურგეთის მერია ფულად დახმარებებს გასცემს და ახორციელებს შემდეგ სოციალურ პროგრამებს:

“მრავალშვილიანი ოჯახებისთვის, ვეტერანებისთვის, შეჭირვებულ მოქალაქეთა სამედიცინო დახმარებას, იძულებით გადადგილებულ პირებს, მძიმე საცხოვრებელ პირობებში მყოფ ოჯახებს, ხანდაზმულებს, უსინათლო პირებისთვის, დედ-მამით ობოლი 18 წლამდე ასაკის ბავშვებს, თირკმლის უკმარისობით დაავადებულ პირებს, “ც“ ჰეპატიტით დაავადებულ პირებში მკურნალობის ტაქტიკის განსაზღვრისათვის კვლევას, უსახლკაროდ დარჩენილ ოჯახებს ბინის ქირით უზრუნველყოფა, მრავალშვილიანი ოჯახებისთვის მე-5 და მეტი შვილის დაბადებისთვის, ერთჯერად სოციალურ (ფულად დახმარებას), საქველმოქმედო ასოციაცია “გურია“, მზურველობა მოკლებულთა ერთჯერადი უფასო კვებით უზრუნველყოფა“.

საკრებულოზე განიხილეს და განაკვეთები დააწესეს ქალაქ ოზურგეთის მუნიციპალიტეტის ტერიტორიაზე სათამაშო ბიზნესის მოსაკრებელზე:
“თითოეულ სამორინეს მაგიდაზე კვარტალში 30 000 ლარი, თითოეულ სათამაშო აპარატზე კვარტალში 3 000 ლარი, თითოეულ წამახალისებელ გათამაშებაზე _ საპრიზო ფონდის 10% , სისტემურ ელექტრონული ფორმით მოწყობილ თამაშობაზე კვარტალში 275 000 ლარი, ლატარიების მოწყობაზე _ ლატარეის ბილეთების რეალიზაციიდან მიღებული ამონაგების 20%, მომგებიანი თამაშობის თითოეულ სალაროზე კვარტალში 10 750 ლარი, თითოეული კლუბის მაგიდაზე კვარტალში 9 000 ლარის ოდენობით.

საკრებულოზე დღის წესრიგით გათვალისწინებული კიდევ ერთი საკითხი განიხილეს და დაამტკიცეს:

“მიეცეს თანხმობა ოზურგეთის მუნიციპალიტეტის მერს, ნაგავმზიდი მანქანების და სანაგვე ურნების შესაძენად, საქართველოს მუნიციპალური განვითარების ფონდიდან, მუნიციპალიტეტის სახელით აიღოს სესხი 726, 447 ლარის ოდენობით".