დაკარგული ტერიტორიების დასაბრუნებლად კვიპროსულ მოდელს სამხედრო ექსპერტი ვახტანგ მაისაია წარმატებულად მიიჩნევს, თუმცა, არა საქართველოსთან მიმართებაში. ექსპერტის აზრით, 2008 წლის ომამდე ამის შანსი აფხაზეთთან მიმართებაში ჯერ კიდევ იყო, როცა კოდორის ხეობასა და გალში საქართველოს ხელისუფლებას გარკვეული ბერკეტები გააჩნდა, რადგან შევარდნაძის დროს ეს საკითხი განიხილებოდა და მუშაობაც იგეგმებოდა, თუმცა ომმა ყველაფერი შეცვალა.
"2004-2005 წლებში გიორგი ხაინდრავა და გიორგი ვოლსკი, რომლებიც "მშვიდობის პარტიის" წარმომადგენლები იყვნენ, ზურაბ ჟვანიასთან ერთად ამ იდეას ავითარებდნენ. ამ მოდელის დანერგვასთან საკმაოდ ახლოსაც ვიყავით, მაგრამ 2008 წლის ომმა ყველაფერი გადახაზა. სხვათა შორის, კვიპროსის მოდელის გამოყენება ცხინვალის რეგიონთან მიმართებაში უფრო საინტერესო იქნებოდა, რადგან იქ გაცილებით მეტ ტერიტორიას ვაკონტროლებდით", _ აცხადებს მაისაია „რეზონანსთან“ საუბრისას.
ექსპერტის აზრით, კვიპროსული მოდელის გახორციელების შანსი, ფაქტობრივად, აღარაა, რადგან ოკუპირებულ ტერიტორიებზე საქართველოს არანაირი ბერკეტები აღარ გააჩნია, რადგან ყველანაირი პოზიცია დავთმეთ და შედეგად, ისეთი პოზიტიური სიახლებიც კი, როგორიც მაგალითად, ვიზალიბერალიზაციაა, ოკუპირებულ რეგიონებში მცხოვრებ მოსახლეობასთან დასაახლოებლად ვერ იმუშავებს.
"2008 წლის ომმა პერსპექტივები მთლიანად წაშალა და რუსეთს, ფაქტობრივად, კარტბლანში მივეცით. შესაბამისად, ტერიტორიების უკან დაბრუნებაზე უახლოეს მომავალში აღარ უნდა ვიოცნებოთ. დღევანდელმა ხელისუფლებამ კი არ იცის, როგორ დაარეგულიროს საკითხი. სტრუქტურაც კი არ არსებობს, რომელიც ამ მიმართულებით იმუშავებდა. რამდენად პარადოქსულადაც უნდა ჟღერდეს, შევარდნაძეს ორი საკმაოდ საინტერესო სტრუქტურა ჰქონდა. პირველი _ პრეზიდენტთან არსებული კავკასიის სახელმწიფო ბიურო იყო, რომელიც კავკასიურ პოლიტიკას ამუშავებდა. აფხაზეთი და ცხინვალის რეგიონიც ამ კონტექსტში განიხილებოდა და საკმაოდ პოზიტიური სიახლეებიც გამოიწვია. ასევე, პარლამენტში კავკასიის კომიტეტიც შეიქმნა, რომელსაც მამუკა არეშიძე ხელმძღვანელობდა. დღეს კი არაფერი არსებობს, კავკასიის მიმართულებით მომუშავე სპეციალისტებთანაც კი არ ურთიერთობენ. ამ რესურსსაც არ იყენებენ – კავკასიოლოგებთან დიალოგსაც კი არ მართავენ და დღევანდელ ხელისუფლებას როგორ უნდა ჰქონდეს წარმოდგენილი კონფლიქტების მოგვარება? სპეციალისტები დღესაც ითხოვენ კავკასიური სტრატეგიული კვლევების ცენტრის შექმნას, მაგრამ ამაოდ", _ დასძენს მაისაია.
