“ყოველდღე თვალცრემლიანი შევყურებ ამ პროცესს” _ ნატანებში ასწლოვან ხეებს თხრიან

ოზურგეთის მუნიციპალიტეტის სოფელ ნატანებში, ყოფილი ჩაის ფაბრიკის ტერიტორიიდან, ათამდე ასწლოვანი ხის, მათ შორის, ცაცხვების  გადატანის სამუშაოების  პროცესი აქტიურად მიმდინარეობს.

აღნიშნული ხეები, შეკვეთილში, ყოფილი პრემიერ-მინისტრის ბიძინა ივანიშვილის კუთვნილ, დენდროლოგიურ პარკში გადააქვთ.

ადგილზე მობილიზებულია ტექნიკა, ამწეები, თვითმცლელი მანქანები და მიმდინარეობს ხეების მოთხრა. ადგილზე იმყოფება დაცვის სამსახური შპს “ვიქტორია“.

ადგილობრივები “გურია ნიუსთან“ აღნიშნულ პროცესს გულისტკივილით აკვირდებიან და პროტესტს გამოთქვამენ.

სულიკო ფირცხალაიშვილი: “ჩვენ ასე ვიცით, რომ შეკვეთილში გადააქვთ. გული გვწყდება ნამდვილად, მაგ ეზოში ვმუშაობდი 35 წელი, ჩაის ფაბრიკაში, ახლა დაანგრიეს ყველაფერი.  ისედაც კრიზისია ყველანაირი, გვიჭირს ლუკმა-პურის შოვნაც კი და ამ დროს  ჩვენს თვალწინ ითხრება ყველაფერი, რომ გავიგე ვიტირე და ყოველდღე თვალცრემლიანი შევყურებ ამ პროცესს,  ხეები გვეცოდება და გვენანება, მაგრამ რას ვიზამთ?!“

თინა გობრონიძე: “გული გვტკივა. ეს ხეები ჩვენს თვალწინ, ჩვენთან ერთად გაიზრდა, ახლა კი გლეჯენ და მიაქვთ. არც ერთი მთავრობა ჩვენთვის არ ყოფილა, ვისაც რა უნდა, იმას აკეთებს! უბედურია ხალხი და იქნება ისე უბედურად!“

ოზურგეთის მუნიციპალიტეტის გამგებლის წარმომადგენელი სოფელ ნატანებში ჯონი ღლონტი “გურია ნიუსთან“ ამბობს, რომ აღნიშნული სამუშაოები კანონიერად ხორციელდება:

“ყველა სამინისტროსთან შეთანხმებულია და ყველაფერი კანონიერად მიმდინარეობს. როგორ ფიქრობთ, ამხელა სამუშაოები შეიძლება უკანონოდ გახორციელდეს?!