როგორც ჩვენი წყარო ამბობს, პოლიციის შეფს თათბირზე ასეთი წინადადება დაუყენებია:
_ მე არავის ვუშვებ, პირიქით, თითოეულ თქვენგანს ვაძლევ შანსს, დამანახოთ თქვენს მიერ შესრულებული პროფესიული დავალებები ისე, როგორც საქმე მოითხოვს.
ჩანტლაძემ ასევე მოითხოვა თითოეული პოლიციელის პირადი საქმე, რადგან მათი შემოწმება ძირეულად მოხდეს: _ მე მუშაობის ჩემი სტილი მაქვს, _ უთქვამს ჩანტლაძეს პოლიციელებისთვის.
აღსანიშნავია, რომ კუდ-ის ყოფილი უფროსი ახლად დანიშნული შინაგან საქმეთა მინისტრის ბაჩო ახალაის კადრია.
ჩვენი წყაროს ინფორმაციით, დავით ცირეკიძის მიერ ლანჩხუთის პოლიციის სამმართველოს უფროსად დანიშნული ოზურგეთელი გოჩა ფერსაშვილი გურიის სამხარეო მთავარ სამმართველოში თავის ძველ ადგილს დაუბრუნდება, ის უბნის რწმუნებულების უფროსი იყო. ხოლო მის ადგილს ლანჩხუთის პოლიციის სამმართველოს უფროსის პოსტზე, ოზურგეთის პოლიციის სამმართველოს უფროსის მოადგილე, ირაკლი შავიშვილი დაიკავებს, შავიშვილის ადგილს სოლომონ ლომთათიძე, ხოლო ლომთათიძის ადგილზე კახა კილაძე დაინიშნება.
ჩოხატაურის პოლიციის სამმართველოს უფროსად კი გურიის სოდ-ის ყოფილი უფროსი ტატო ვასაძე დაინიშნა.
“გურია ნიუსი” დაუკავშირდა ირაკლი შავიშვილს, რომელმაც ინფორმაცია იმის შესახებ, რომ ლანჩხუთის პოლიციის სამმართველოს უფროსად ინიშნება, “გურია ნიუსთნ” საუბარში უარყო.
_ ჯერ არ ვფლობ არანაირ ინფორმაციას მაგასთან დაკავშირებით, არ ვიცი.
_ ანუ თქვენ ჯერ ისევ ძველ ადგილზე ხართ, ოზურგეთში?
_ კი ოზურგეთში ვარ. ისე თუ რაიმეს გაგება გინდათ, ძალაინ გთხოვთ პრესსამსახურს მიმართეთ და ყველაფერს გეტყვიან ოფიციალურად, _გვითხრა შავიშვილმა.
_”გურია ნიუსი” დაუკავშირდა ჩოხატაურის პოლიციის უფროსს ტატოს ვასაძეს, რომელმაც მისი დანიშვნის შესახებ ინფორმაცია დაგვიდასტურა.
_ ჩვენ გვყავს პრესცენტრი და შეგიძლიათ მას მიმართოთ.
_ თქვენ არ იცით დანიშნული ხართ თუ არა?
_ მე კი ვარ დანიშნული. ვარ ჩოხატაურის პოლიციის სამმართველოს უფროსი. ამ ინფორმაციას დაგიდასტურებთ, დანარჩენ კითხვებზე მე არ გიპასუხებთ, მიმართეთ პრესსამსახურს.
“გურია ნიუსი” ასევე დაუკავშირდა გურიის სამხარეო მთავარი სამმართველოს უფროსს გურამ ჩანტლაძეს, რომელმაც ასევე პრესსამსახურისკენ გადაგვიმისამართა.
