“გურია ნიუსი” მანანა კობახიძის სავარაუდო კანდიდატურაზე საჩხერეში, ერთი თვის წინ წერდა, თუმცა მაშინ პარტიის თავმჯდომარემ უარყო ეს ინფორმაცია და განაცხადა, რომ მსგავსი არაფერი სმენია.
რამდენად იცნობს პარტიის თავმჯდომარე საჩხერეს და რატომ მიიღო კოალიციის პოლიტსაბჭომ ეს გადაწყვეტილება, ამასთან დაკავშირებით “გურია ნიუსი” მანანა კობახიძეს ესაუბრა.
_ ქალბატონო მანანა, რამდენად სწორი გადაწყვეტილებაა კოალიციის მხრიდან, თქვენი როგორც პარტიის თავმჯდომარის, საჩხერის რაიონში მაჟორიატარობის კანდიდატად დასახელება. პარტიის თავმჯდომარეს ხომ სხვა ფუნქციებიც აქვს?
_ რა თქმა უნდა, პარტიის თავმჯდომარეს თავისი საქმე აქვს. შესაძლებელია, ამ შემთხვევაში, მაჟორიტარობა, რომელიც მე მავალებს კონკრეტულ რაიონში ჩასვლას და რეალურად იქ ყოფნას დარჩენილი თვეების განმავლობაში, გარკვეულ პრობლემას ქმნის იმ თვალსაზრისით, რომ პარტიას თავმჯდომარე უნდა ჰყავდეს აქ, ადგილზე. მაგრამ მე ამ სირთულეს ნამდვილად მოვერევი, იმიტომ, რომ საჩხერე არის რაიონი, სადაც ხელისუფლების საკეთებელი გააკეთა ბიძინა ივანიშვილმა და მისმა საქველმოქმედო ფონდმა.
საჩხერეში საარჩევნო კამპანიის წარმართვა ბევრად უფრო კომფორტული იქნება იმ თვალსზრისით, ვიდრე ახალციხეში, ან ზუგდიდში. სწორედ ის, რომ საჩხერე არ არის რთული რეგიონი და მთლიანად არის “ქართული ოცნების” გამოკვეთილი მხარდამჭერი, ეს მომცემს შესაძლებლობას, მე როგორც პარტიის თავმჯდომარემ, გარკვეული საქმიანობა გავწიო და ასევე, პარალელურად ვიყო მაჟორიტარი.
_ რატომ საჩხერეში, თქვენ ხომ ამ რაიონთან მაინცდამაინც ახლო ურთიერთობა არ გაკავშირებთ?
_ იმიტომ, რომ ბატონი ბიძინა ივანიშვილი არის ამ პარტიის დაფუძნების ინიციატორი. მას კანონმა არ მისცა კონკრეტულ დროს პარტიის თავმჯდომარეობის შესაძლებლობა და ამიტომ გავხდი მე თავმჯდომარე. იგი არის საჩხერიდან და ბიძინა ივანიშვილი იქნებოდა საჩხერიდან დეპუტატი. სიმბოლურია, რომ მის ნაცვლად, მისი პარტიის თავმჯდომარე არის წარდგენილი საჩხერეში. ასეთი გადაწყვეტილება იქნა მიღებული, მაგრამ ეს გადაწყვეტილება თავს მოხვეული არ არის. ბატონმა ბიძინამ გამოიკითხა საჩხერის მოსახლეობაში, რამდენად მიცნობდნენ, რამდენად უნდოდათ და მისაღები იქნებოდა მათთვის მანანა კობახიძის კანდიდატურა. განწყობა იყო დადებითი. ალბათ ჩემმა ერთკვირიანმა ვიზიტმა საჩხერეში და ოთხი-ხუთი სოფლის მონახულებამ, ამ ადამიანებში დადებითი განწყობა გამოიწვია.
მე შესაძლებელია ვარ თბილისიდან, მაგრამ ისევე შემიძლია საჩხერელის ინტერესი დავიცვა, წარმოვადგინო რაიონის ინტერესები მომავალ პარლამენტში, როგორც თბილისში კონკრეტული რაიონის შემთხვევაში იქნებოდა.
_ ხელისუფლება ძალიან აქტიურად მუშაობს იმაზე, რომ ბიძინა ივანიშვილმა სწორედ საჩხერეში წააგოს არჩევნები.
_ ეს ვერსიაც განვიხილიეთ. არ არის გამორიცხული, სწორედ საჩხერე იყოს სერიოზული ბრძოლის რაიონი, რათა რაც შეიძლება მეტი ხმა წამოიღონ და თქვან, _ აი, მისივე რაიონში ჩვენ ხმები წამოვიღეთო. არის არის გამორიცხული. მე ამისთვის მზად ვარ! მე იქ რაც ვნახე განწყობა, თითოეულ სოფელში ჩასვლა, ეს იყო ზეიმი მათთვის და იცით, რატომ?! მოსახლეობა მოდიოდა და სურდა ესაუბრა იმაზე, ბიძინა ივანიშვილს საჩხერეში რა გაუკეთებია. იმდენი აქვს გაკეთებული და დატოვებული, ახსნა არ სჭირდება იმას, რატომ აირჩევენ “ქართული ოცნებას”. არ მგონია, ხელისუფლებას იქ რამე სერიოზული რესურსი ჰქონდეს.
