რა თანხას გაიღებს წლევანდელი ბიუჯეტი სოციალური პროგრამების დასაფინანსებლად

"მრავალშვილიანი ოჯახების დახმარების" პროგრამის დასაფინანსებლად, რომელიც მიზნად ისახავს მრავალშვილიანი ოჯახებისთვის ყოველთვიურად ფინანსურ დახმარებას, 2017 წლის მთავარ საფინანსო დოკუმენტში შარშანდელთან შედარებით ხუთი ათასი ლარით ნაკლები თანხაა გათვალისწინებული. შარშან ბიუჯეტმა ამ კუთხით  37 ათასი ლარი გაიღო, წელს კი _ 32 ათასი ლარია გათვალისწინებული. მრავალშვილიანი ოჯახები, რომელთაც ჰყავთ 16-დან 18 წლამდე ასაკის ოთხი ან მეტი შვილი და მათი სარეიტინგო ქულა 101 000-მდეა,  ყოველთვიურად, თითო ბავშვზე, დახმარების სახით 25 ლარს მიიღებენ. ასევე, მუნიციპალიტეტი დახმარებას გაუწევს იმ ოჯახებსაც, რომელთა სარეიტინგო ქულა  101 000 აჭარბებს და ჰყავთ 18-წლამდე ასაკის ოთხი ან მეტი შვილი.

 რაც შეეხება მძიმე საცხოვრებელ პირობებში მყოფი ოჯახებისთვის დახმარების გაწევას, ამ კუთხით, წლევანდელ ბიუჯეტში 176 ათასი ლარია გათვალისწინებული. პროგრამა ითვალისწინებს ამ კატეგორიის ოჯახების ერთჯერად დახმარებას, ავარიულ მდგომარეობაში არსებული და სტიქიით დაზიანებული საცხოვრებელი სახლის მოწესრიგებას. მძიმე საცხოვრებელ პირობებში მყოფი ოჯახების თავშესაფრით უზრუნველყოფისთვის მუნიციპალიტეტის ბინის ქირას, მაქსიმუმ, ასი ლარით დააფინანსებს.

სხვადასხვა ომებსა და კონფლიქტებში მონაწილე ვეტერანთა დასახმარებლად შესაბამისი პროგრამის მიხედვით, თუ შარშან 50 ათასი ლარი იყო გაწერილი, ახლა ეს მაჩვენებელი ხუთი ათასი ლარით ნაკლებია და 45 ათას ლარს შეადგენს. 

სოციალური პროგრამის მიხედვით, ომის მონაწილეთა გარდაცვალების შემთხვევაში, ოჯახი ადგილობრივი ბიუჯეტიდან ერთჯერადი დახმარების სახით 250 ლარს მიიღებს. ამავე პროგრამის ფარგლებში, დახმარებას მიიღებენ საქართველოს ტერიტორიული მთლიანობისთვის ომის შემდგომ გარდაცვლილი ვეტერანების ოჯახები და ამავე კატეგორიის ვეტერანთა შეჭირვებულ ოჯახები, რომელთა რაოდენობა ჯამში 55-ია. ასევე, დახმარებას მიიღებს ის ხუთი ბენეფიციარი, რომლებიც სხვა სახელმწიფოთა ტერიტორიაზე მებრძოლ შეჭირვებულ ვეტერანთა სტატუსით სარგებლობენ.

სოციალური პროგრამაში, ასევე, გათვალისწინებულია მუნიციპალიტეტის მაღალმთიანი სოფლებიდან მოსწავლეთა ტრანსპორტირების ხარჯებიც, იმ მოტივით, რომ აღნიშნულ ტერიტორიაზე არ ფუნქციონირებს სამგზავრო ტრანსპორტი. ბიუჯეტში საამისოდ, როგორც გასულ წელს, 5 400 ლარია გათვალისწინებული. ამ პროგრამით ლანჩხუთში ერთი სკოლის 29 აღსაზრდელი სარგებლობს.

ცენტრ "იავნანას" თანადაფინანსებისთვის, რომლის მიზანია  სოციალურად დაუცველი ბავშვების ფსიქო-სოციალური რეაბილიტაციის ხელშეწყობა, სოციალური პროგრამიდან წელსაც 10 ათასი ლარია გამოყოფილი.

იძულებით გადაადგილებულ პირთა დახმარების პროგრამის დასაფინანსებლად, რაც ამ კატეგორიის ოჯახებისთვის ერთჯერადად სათბობი მერქნით უზრუნველყოფას გულისხმობს,  ადგილობრივმა ბიუჯეტმა გასულ  წელს  12 800 ლარი გამოყო, წელს ამ პროგრამის დასაფინანსებლად 10 ათასი ლარის გახარჯვა იგეგმება.

მიმდინარე წელს ხუთი ათასი ლარითაა გაზრდილი "გამარჯვებულ ქალთა კლუბის" სარეაბილიტაციო პროგრამის დაფინანსება. შესაბამისად, წლევანდელ ბიუჯეტში საამისოდ 20 ათასი ლარია ასახული.

მუნიციპალიტეტის სოციალურ პაკეტში 1000 ლარია ჩადებული "ლანჩხუთის მუნიციპალიტეტში მცხოვრები და რეგისტრირებული 100 და მეტი წლის ასაკს გადაცილებული ხანდაზმულების ერთჯერადად დახმარებისთვის. 

როგორც წინა წელს, ახლაც 30 ათასი ლარით დაფინანსდება თირკმლის ქრონიკული  უკმარისობით  დაავადებულთა სამედიცინო დაწესებულებაში ტრანსპორტირების პროგრამა, რომლითაც 21 ბენეფიციარი სარგებლობს.

რაც შეეხება ჰუმანიტარული ორგანიზაციების, ეროვნული სკრინინგცენტრიდან და სამედიცინო დაწესებულებაში მოწვეული სპეციალისტის ბინით უზრუნველყოფას, თუ გასულ წელს ბიუჯეტმა საამისოდ 8600 ლარი გაიღო, წელს ეს მაჩვენებელი ნულის ტოლია.