ამერიკის პრეზიდენტად დონალდ ტრამპის არჩევის შემდეგ, თეთრი სახლის პოზიცია, მათ შორის, მოკავშირეებთან დამოკიდებულებაში, ბევრი მიმართულებით შეიცვლება და რისკების შემცველი იქნება. რუსეთ-ამერიკის ურთიერთობებში უკრაინა გეოპოლიტიკური კოზირივით, საქართველო კი ბონუსის სახის იქნება წარმოდგენილი, _ ასე აფასებენ ექსპერტები თეთრი სახლის პოზიციას.
ექსპერტ გია ხუხაშვილის აზრით, ჩვენ ყველაფერი უნდა გავაკეთოთ იმისთვის, რომ ქვეყნის შიგნით კაპიტალიზაცია და ის ფასეულობები გავაძლიეროთ, რომლის საშალებითაც ძნელად გასაყიდი გავხდებით და იოლად არ დავხურდავდებით.
„საკუთარი ქვეყნის კაპიტალიზაცია მხოლოდ ჩვენ შეგვიძლია. უნდა შევქმნათ ისეთი კაპიტალი, რომელიც ადვილი გასაყიდი და დასახურდავებელი არ იქნება. ცივილიზებულ სამყაროში ჩვენი ქვეყნის ინტეგრაცია არა როგორც გეოგრაფიულ დონეზე უნდა მოხდეს, არამედ ვიფიქროთ ფასეულობებზე, რომლის მეშვეობითაც ძნელად გასაყიდი გავხდებით. ამერიკის ყოფილი ადმინისტრაციების, საგარეო კონცეფციიდან გამომდინარე, საქართველო და უკრაინა ყოველთვის როგორც გეოპოლიტიკური კოზირი, ისე იყო გამოყენებული. ამ კუთხით ტრამპის პოზიცია შესუსტებული იქნება“, _ აცხადებს „რეზონანსთან“ საუბარში ხუხაშვილი.
ექსპერტის აზრით, ტრამპის ადმინისტრაცია დღის წესრიგს შეცვლის და ლობისტებს დიდი გავლენა აღარ ექნებათ და ვეღარ დაგვეხმარებიან, ამიტომ საქართველოს დიპლომატიამ საკუთარი გეგმა უნდა შეიმუშაოს.
"საქმე იმაშია, რომ ახლა ტრამპის ადმინისტრაციაში ლობისტებს დიდი მნიშვნელობა დიპლომატებს და ლობისტებს აზრი წინა ადმინისტრაციების დროს ჰქონდა. დიდი ვაჭრობა როდესაც დაიწყება, საქართველო ისეთი პროდუქცია უნდა იყოს, რომელიც ადვილად დასახურდავებელი არ იქნება. ამას როგორ მოვახერხებთ, ვერ გეტყვით. რამდენადაც ვიცით, სახელმწიფო მდივნად დიდი ალბათობით, ტილერსონი დაინიშნება. ისიც ბიზნესიდან მოდის და რეალური პოლიტიკის მომხრე იქნება. ამერიკის ელჩის განცხადებების დამაჯერებლობა მაღალი არ არის. ის ახლა იმ მდგომარეობაშია, რომ შეიძლება ერთს ამბობდეს და საწინააღმდეგოს ფიქრობდეს", _ აცხადებს ექსპერტი.
