ოზურგეთის მუნიციპალიტეტის სოფელ ვაკიჯვრის მკვიდრი, 63 წლის ელგუჯა გოგოტიშვილი 1 000 კვმ მიწის ნაკვეთის უსამართლოდ წართმევის გამო დავობს და მისი თქმით, დღემდე სამართალი ვერ უპოვია.
მას ხელთ აქვს მიწის კუთვნილების დამადასტურებელი მიღება-ჩაბარების აქტი, რომელიც პრივატიზაციის დაწყების დროს, 1993 წელს აქვს მიღებული და დღემდე არსებული კანონის მიხედვით, გოგოტიშვილი ნამდვილად ითვლება მიწის კანონიერ მესაკუთრედ. მას დოკუმენტიც გააჩნია 20 მეზობლის ხელმოწერით, რომლებიც ადასტურებენ, რომ აღნიშნული მიწის ნაკვეთი ნამდვილად მის საკუთრებაში იყო. სიმონ ჩავლეშვილი კი, რომელიც 25 წელი მუშაობდა ვაკიჯვარში სოფლის აგრონომად, თავიდანვე იყო საპრივატიზაციო კომისიის წევრი და ზეპირად იცის, თითოეულ კომლს საკუთრებაში სად და როდის მიუზომეს ნაკვეთები. თან გაკვირვებულია, რის გაკეთება არ შეუძლია ამ "ეშმაკ" კომპიუტერსო.
"გურია ნიუსი" სოფელ ვაკიჯვარში, ელგუჯა გოგოტიშვილის ოჯახში, ადგილზე გაეცნო ვითარებას. გოგოტიშვილს, მისივე თქმით, აღნიშნული მიწის ნაკვეთი, გვერდით მცხოვრებმა მეზობელმა, ანზორ ახვლედიანმა წაართვა და მოახერხა, მიწის საკუთრების დამადასტურებელი დოკუმენტის აღება, რომელშიც გაყალბებული ნახაზია წარმოდგენილი. კერძოდ, მას ხელთ აქვს მიღება-ჩაბარების აქტი, უპირველესი დოკუმენტი და ასევე, ვიზუალური დოკუმენტი _ ორთოფოტო, რომლის ნამდვილობაში, საპრივატიზაციო კომისიის ყოფილი წევრის აზრით, ეჭვის შეტანა შეუძლებელია.
_ ეს ტერიტორია ჩემს ამჟამინდელ საცხოვრებელ სახლთან მოშორებით მდებარეობს. ჩემი მშობლები აქ ცხოვრობდნენ. მერე გადასახლდნენ ცოტა მოშორებით. 1000 კვ.მ. ფართობი, რომელიც პრივატიზაციის დროს მომეკუთვნა, 20 წლის განმავლობაში ჩემი იყო. აქ მქონდა თხმელას ტყე და ვსარგებლობდი. 2013 წელს მეზობელმა, იქვე ახლოს მცხოვრებმა ანზორ ახვლედიანმა, რომელიც უსამართლოდ მედავებოდა აღნიშნულ ნაკვეთს, მომიჭრა თხმელას ხეები. მისი ნაკვეთი აქედან, დაახლოებით, 70 მეტრი მანძილის დაშორებითაა. ხეების მოჭრის გამო, პოლიციას მივმართე, მაგრამ არაფერი გამომივიდა. სამართალდამცავებმა ჩათვალეს, რომ ეს მეზობლური დავა იყო და მრავალგზის გვთხოვეს, შევთანხმებულიყავით. ხოლო ამ დავის განმავლობაში ახვლედიანმა შპს "გეოპროექტის" მიწის მზომავები მოიყვანა. ეტყობა, მოატყუა, რომ მისი ნაკვეთი იყო და ასე დაისაკუთრა. მიუხედავად იმისა, რომ მიწის ამზომველს ვუთხარი, ეს ქმედება არასწორი იყო, არავინ მომისმინა. ჩემი აზრით, ახვლედიანმა, ვიღაცეების დახმარებით მოახერხა ჩემთვის, ჩემს საკუთრებაში არსებული ნაკვეთის წართმევა და დოკუმენტურად მიისაკუთრა. მიწის მზომავმა, "გეოპროექტის" წარმომადგენელმა ისეთი ნახაზი შეადგინა, როგორიც ახვლედიანმა უკარნახა და არაფრად ჩააგდეს ჩემი დოკუმენტი, უამრავი მოწმის ჩვენება და თვით საპრივატიზაციო კომისიის წევრის მითითება, რომ აღნიშნული მიწის ნაკვეთი ტერიტორიულადაც და დოკუმენტურადაც ჩემია, _ გვეუბნება ელგუჯა გოგოტიშვილი და ამბის გახმაურებას გვთხოვს:
_ გაახმოვანეთ ეს ამბავი, მე კი სასამართლოს მივმართავ _ კანონის მცოდნე ადამიანებიც მარწმუნებენ, რომ აუცილებლად მოვიგებ, მაგრამ სამი წელია, ისე მაწამებენ, ხან ვფიქრობ, იქნებ, სასამართლოზეც მოიძებნოს "კაცი" და ჩემი დოკუმენტით უკან გამომაგდონ. ამიტომ გთხოვთ, "გურია ნიუსმა" დაწეროს ჩემი გასაჭირის შესახებ.
სოფელ ვაკიჯვრის ყოფილი აგრონომი სიმონ ჩავლეშვილი ადასტურებს, რომ აღნიშნული ფართობი თვითონ მიუზომა პრივატიზაციის დროს ელგუჯა გოგოტიშვილს. თან ხაზგასმით აღნიშნავს, რომ ამ ნაკვეთს არსაიდან არ ესაზღვრებოდა ვინმე კერძო პირის ნაკვეთი:
_ დაახლოებით, 70 მეტრი მანძილის დაშორებითაა მოდავე მხარის ნაკვეთი, რომელიც, რატომღაც, კომპიუტერით გაკეთებული ნახაზის მიხედვით, მიბმულია გოგოტიშვილის ნაკვეთს. ეს არის სიყალბე! აღნიშნულ ნაკვეთზე თხმელას ტყეა. ეს ფართობი 24 წლის წინ, საკუთრებაში მივუზომეთ ელგუჯა გოგოტიშვილს. მას შემდეგ სარგებლობდა თვითონ. ახალი ნახაზის მიხედვით, ვიღაცამ მოდავე მხარის ნაკვეთი "აიღო" და "მიუსვა" გოგოტიშვილის ნაკვეთს. რანაირად უნდა შეადგინო ისეთი რუქა-ნახაზი, სადაც ნაკვეთები, რომელთა შორის 70 მ. მანძილია, აიღო და ერთმანეთს ისე შეატყუპო, ნახაზი სხვას აჩვენებდეს და ადგილზე მისულს სხვა ფაქტი დაგხვდეს?! ამას ჰქვია გაყალბება! ისე, ამზომველი იმას გააკეთებდა, რასაც ადგილზე მიმყვანი ეტყოდა. იმასაც საიდან ეცოდინებოდა, მოდავე მხარეებს შორის ვისი რა იყო? თუმცა, ადამიანს ხომ უნდა მოუსმინო და არ უნდა დაჩაგრო? ნახაზის მიხედვით, უკვე გოგოტიშვილის ფართობის ნაწილი ახვლედიანის საკუთრებაში შედის, ხოლო გოგოტიშვილს ეუბნებიან, შენი ფართობი იქეთ არისო და გზის ნაწილზე მიუთითებენ, რომელიც მიღება-ჩაბარების აქტში არსადაა დაფიქსირებული და არც შეიძლება ყოფილიყო, რადგან გზის შეღობვის უფლება არავის აქვს. მოკლედ, ადგილზე მისვლით, ადამიანი უცებ მიხვდება, რომ ფაქტი სხვაა და ნახაზი აშკარად ყალბია. მე სიმართლეს ვამბობ და რომელიმე მხარეს არ წარმოვადგენ. დღეს სასამართლოს არანაირად არ გაუჭირდება აქ სიმართლის გარკვევა და იმის დადგენა, არის თუ არა ელგუჯა გოგოტიშვილის მიწის საკუთრების დოკუმენტში მითითებული ფართობი მისი, _ გვეუბნება სიმონ ჩავლეშვილი და ორ სურათს, გოგოტიშვილის ნაკვეთის ორთოფოტოს (კოსმოსიდან გადაღებულს) და კომპიუტერის მეშვეობით შედგენილ ნახაზს ღიმილით დასცქერის, რის გაკეთება შეუძლია ამ "ეშმაკ" კომპიუტერსო.
შპს "გეო პრეოქტის" დირექტორი მინდია თავაძე "გურია ნიუსთან" საუბრისას ამბობს, რომ ზუსტად არ ახსოვს, ვის, სად, რა მიუზომა, რადგან ძალიან ბევრი ნაკვეთის აზომვით ნახაზს აკეთებს:
_ მე ნახაზს ყოველთვის ვაკეთებ ისე, როგორც მეტყვის მოქალაქე, ვისიც არის ფართობი. სადავო საქმეებს კი არკვევს სასამართლო და უმჯობესია, გოგოტიშვილმა შეიტანოს სარჩელი.
ელგუჯა გოგოტიშვილის მოდავე, სოფელ ვაკიჯვრის მკვიდრი ანზორ ახვლედიანი "გურია ნიუსთან" ასეთ კომენტარს აკეთებს:
_ 60 წლის კაცი ვარ და არ ვიცი, რაა ჩემი?! თვითონ მიიზომა უკანონოდ. ხეები უნდა რომ ჰქონდეს და მოჭრას. მე ბავშვობაში მანდ დედაჩემს ჩაის ვაკრეფინებდი და მახსოვს, ვისიც იყო. მე მაქვს დოკუმენტი, რომ ეს ნაკვეთი ჩემია და ის იუსტიციის სახლში ინახება. რაც შეეხება ვიღაცეების მოწმეებად აყვანას, მისნაირები არიან, საქმე არ აქვს და დარბის, ეხვეწება ვიღაცეებს, თქვით, რომ ჩემიაო. მე არ მცალია აქეთ-იქით სარბენად. იქ მოთხრილი ხეები მოვჭერი. კიდევ არის, მივალ საბჭოში, ავიღებ საბუთს და მოვჭრი ისევ, რა მისი საქმეა? წავიდეს მერე და იჩივლოს. მიმართოს სასამართლოს.
_ ბატონო ანზორ, გოგოტიშვილი ამბობს, რომ თქვენ "ვიღაცეების" დახმარებით მოახერხეთ მისი ნაკვეთის ხელში ჩაგდება და სასამართლომდე მედიას მიმართა. თვითონ ასეთი ფორმით ცდილობს, დაიბრუნოს ნაკვეთი.
_ ვიღაცეები მან მოისყიდა, დარბის ყველგან. წავიდეს, მიმართოს სასამართლოს და სადაც უნდა იქ წავიდეს, მე მაქვს დოკუმენტი, _ ამბობს ანზორ ახვლედიანი.
