“ელიტა ბურჯის” ანგარიში ბანკ “ქართუში” გუშინ დააყადაღეს.
თენგიზ გვაზავა “გურია ნიუსთან” ექსკლუზიურად ყვება დეტალებს მოგელაძესთან ჩატარებულ დაკითხვებსა და იმ სატელეფონო ზარებზე, რომელსაც პირადად მოგელაძე ახორცილებდა მასთან.
_ “ელიტა ბურჯი” “ქართული ოცნების” გაზეთების დაბეჭდვას ვეღარ შეძლებს, რა არის ამის მიზეზი?
_ პირადად მე მივიღე გადაწყვეტილება სტამბის გაჩერებასთან დაკავშირებით. თავიდან ჩვენ გვქონდა პატარა ტიპოგრაფიული საამქრო, სადაც სხვადასხვა სახის პოლიგრაფიული ნაწარმი იბეჭდებოდა, რაც იყო ჩვენთვის დამატებითი შემოსავლების წყარო. მაგრამ, როდესაც ბატონმა ბიძინამ გადაწყვიტა პოლიტიკაში მოსვლა, ჩვენს მიმართ დამოკიდებულება საგრძნობლად შეიცვალა. ჩვენ აღგვიქვეს პარტიასთან ასოცირებულ იურიდიულ პირად ,რამაც გამოიწვია მოცულობითი შეკვეთების რაოდენობის შემცირება. გარდა ამისა, მუდმივად, ხან ერთი ბანკი ხან მეორე გვთავაზობდა ქართუდან” ანგარიშების გამოტანას და მათთან გადატანას
მანამდე, სახელმწიფოს მხრიდან, “ელიტა ბურჯში” დიდი რაოდენობის შეკვეთა მოდიოდა, რის გამოც შარშან ჩავდეთ მილიონნახევრიანი ინვესტიცია ქარხნის განვითარებაზე.
როგორც კი ბიძინა ივანიშვილმა გადაწყვიტა პოლიტიკაში მოსვლა, სახელმწიფოს მხრიდან ჩვენს მიმართ დამოკიდებულება არსებითად შეიცვალა. საფიქრალი გახდა 625 კაციანი კოლექტივის რჩენა. ამიტომ მე, როგორც ქარხნის ხელმძღვანელი, ვალდებული ვიყავი მეფიქრა ალტერნატიული მიმართულების ბიზნესით შემოსავლების თაობაზე. არჩევნების მოახლოებასთან დაკავშირებით, როგორც მოგეხსენებათ, იზრდება პოლიგრაფიულ ნაწარმზე მოთხოვნა. ვინაიდან ჩვენს საწარმოს ჰქონდა გამოცდილება და ჰყავდა შესაბამისი კადრი, გადავწყვიტე ბედი მეცადა პოლიგრაფიულ ბიზნესში
_ შეძენილი მანქანა საბაჟოზე როგორ გამოგატანეს?
_ ჩემთვის აუხსნელი მიზეზების გამო, 5 დღე საბაჟოზე იყო გაჩერებული. ჰქონდათ მცდელობები, მანქანა რომელიც შევიძინეთ, გაეფუჭებინათ, დაეწვათ, მაგრამ გადავარჩინეთ. ამის შემდეგ, გაზეთის საბეჭდი დანადგარი შევიძინე, მაგრამ ამაზე არ ვნერვიულობდი, რადგან როტაციული დანადგარია. თუ გააფუჭებდნენ, აქ საამქროში შევაკეთებდით. ავმუშავდით, წამოვიდა შეკვეთები, დავიწყეთ გაზეთების, ფლაერების, ბუკლეტების ბეჭდვა
_ კოალიციასთან გქონდათ ხელშეკრულება დადებული?
_ ამ ხალხთან დიდი ჩარჩო ხელშეკრულება არ გვქონდა, რატომ?! გეტყვით! ჩვენ ახლა ვსაუბრობთ საბეჭდ მანქანებზე, მოდით თავიდან დავიწყოთ…
ჩვენ მილიონნახევარი დოლარით დაგვაჯარიმეს მაისურების დაბეჭდვის გამო. ე.ი. როგორც კი დაიწყო “ქართულმა ოცნებამ” აქტივობა, მაისურების დაბეჭდვასთან დაკავშირებით პრობლემა შეგვექმნა.
_ თქვენ “ქართული ოცნება – დემოკრატიული საქართველოს” წევრი ხართ?
_ პირადად მე ამ პარტიაში გაერთიანებული არ ვარ, მაგრამ სულითა და გულით თანავუგრძნობ ამ პარტიას. შეავიწროვეს ის ხალხი, ვინც მაისური დაბეჭდა. მაისურების გავრცელებაზე ერთი ადამიანი დაიჭირეს.
კოალიციაში პრობლემა იყო მაისურების დაბეჭდვა. მივედი და ვუთხარი, _ მე დავბეჭდავ მაისურებს მეთქი. შევადგინეთ ჩარჩო ხელშეკრულება, სადაც მაისურის გასაყიდი ფასი არ მეწერა იმიტომ, რომ რა იქნებოდა მისი თვითღირებულება, წინასწარ არ ვიცოდი.
დავაპროექტეთ დანადგარი და დავბეჭდეთ დაახლოებით 5 მაისურის ნიმუში. ვაჩვენეთ, სიტყვიერად შევთანხმდით პირობებზე. თურქეთში არსებულ ერთ-ერთ კომპანიასთან დავდეთ ხელშეკრულება, ჩამომივიდა 150 000 დოლარის მაისურები, რომლის დაბეჭდვა არც კი მქონდა დაწყებული, რომ კონტროლის პალატამ დამიბარა.
საერთოდ, მე და ნათია მოგელაძე “მეგობრები” ვართ… “კარგი მეგობრები”… რა ვიცი, მისი ხშირი სტუმარი ვარ, რაც ჩემთვის დიდ “პატივს” წარმოადგენს.
_ კონკრეტულად, რა საკითხით დაინტერესდა კონტროლის პალატა?
_ მაისური როგორ დაბეჭდეთ. თქვენ ვერ გააკეთებდითო. როგორც თქვენ გიყვებით ისე მოვუყევი როგორ დავბეჭდეთ მაისური. რა პრობლემა იყო ამის გაკეთება. აუხსენი “იუთუბში” ვნახეთ როგორ მზადდება, შევისწავლეთ და შევთავაზე
გინდათ თვითფრინავი? – თვითმფრინავს გაგიკეთებთ! გინდათ გემი? _ გემს გაგიკეთებთ! გინდათ სუნამო? _ სუნამოს გაგიკეთებთ მეთქი.
_ თვენს გარდა ვინ იყო “ელიტა ბურჯიდან” კონტროლის პალატაში დაბარებული?
_ მოგელაძემ ჩემი ბუღალტერიც გამოიძახა. მე მეკითხებოდა ციფრებზე, ჩემს ბუღალტერს წარმოების პროცესზე და წარმოებაზე, რაც მან არ იცოდა. როდესაც ციფრებზე მეკითხებოდა, _ ვეუბნებოდი, ციფრები არ მახსოვს, გყავთ ჩემი ბუღალტერი გვერდით და ციფრებთან დაკავშირებით ის გიპასუხებთ-მეთქი.
_ მაისურების გარდა, კონტროლის პალატა არაფრით დაინტერესებულა?
_ ძალიან აინტერესებდათ, რა საბეჭდი მასალები მაქვს და რა არა. ყველაფერი ჩაიწერეს. დაბარებიდან მეორე თუ მესამე დღეს, სასამართლო იყო. 150 000 დოლარი რომელიც გადავიხადე მაისურების ჩამოტანაში, მიუხედავად იმისა რომ მე ეს მაისურები აქ მქონდა კომპანიაში, ჩამითვალეს პარტიის შემოწირულობად. გადახდილი თანხა გამრავლეს 10-ზე და 1 500 000 დოლარით დამაჯარიმეს.
_ ხელშეკრულების გაფორმების პერიოდში არსებობდა პოლიტიკური პარტია “ქართული ოცნება – დემოკრატიული საქართველო?”
_ პარტია არ არსებობდა, მაგრამ “ქართული ოცნება” არსებობდა.
_ ხელშეკრულება არ მოგთხოვეს?
_ ჩვენ არ გვქონდა მათთან დადებული ხელშეკრულება, მხოლოდ 5 მაისურის ნიმუში მივუტანეთ და დავდეთ სიტყვიერი შეთანხმება. დავდევით ჩარჩო ხელშეკრულება მომსახურეობაზე. ჩვენ კონტროლის პალატას ვაჩვენეთ ჩარჩო ხელშეკრულება, რაზეც გვითხრეს, ამას იურიდიული ძალა არ აქვსო.
შემიძლია გითხრათ, რომ სასამართლოზე ჩემს “დაიკო”, მოგელაძეს ვუსაყვედურე და ვუთხარი, _ მოვა დრო და ამას გავასაჩივრებ, თქვენ დაისჯებით მეთქი. მე მას შევპირდი და შევუსრულებ! საწარმოსთვის, რომლის ბრუნვაც 15 000 000 ლარია არაფრის გამო 1 500 000 დოლარის ჯარიმა ძალიან დიდი თანხაა. ისე კი, ეს ქალბატონი ძალიან მეცოდება, რა უნდა ჰქონდეს ისეთი ჩადენილი, რომ ასეთ რამეზე მიდის?
ამ ყველაფერმა, ჩემში, როგორც მოქალაქეში, გამოიწვია სერიოზული აღშფოთება და პროტესტი. ადრე ვფიქრობდი, პოლიტიკა არ იყო ჩემი საქმე, მაგრამ დამთავრდა…
ჩემი ქვეყნის დამოუკიდებლობისა და დემოკრატიისათვის, მე აფხაზეთის ომში ვიბრძოდი. ომის შემდგომ ვცდილობდი, ქვეყნისთვის სიკეთე მეკეთებინა.
ამიტომ ვაძლევ ჩემს თავს იმის უფლებას, რომ განვაცხადო: იმ ქვეყანას, სადაც არიან ნათია მოგელაძეები, მომავალი არ აქვს! პირადაპირ გეუბნებით, მომავალი არ აქვს!
_ თქვენი აზრით, რატომ არ დაინტერესდნენ საბეჭდი მანქანით უფრო ადრე?
_ რატომ არ კითხულობდნენ იცით, მარტში, აპრილში, მაისში?! თავიდანვე რომ დაეყადაღებინათ, ჩამოვიტანდით ახალ ტექნიკას. ახლა, ახალი მანქანის ჩამოტანას დრო უნდა. დრო კი არ არის. ამიტომ გადაწყვიტეს და იფიქრეს, რომ დრო მოვიდა ტიპოგრაფიაზე დარტყმის. მე კი მქონდა გარკვეული ვალდებულებები
_ ეს მედიაზე ზეწოლაა, თანაც აშკარად გამოხატული…
_ თქვენ კოსმოსიდან ხომ არ ხართ ჩამოსული?! იმ ქვეყანაში, სადაც “ქართუ ბანკს” აჯარიმებენ, იმ ქვეყანაში, სადაც თეთრზე შავიაო გეუბნებიან, რა ბეჭდურ მედიაზე მესაუბრებით?! იმ ქვეყანაში, სადაც პრეზიდენტი “ლაზიკას” აშენებს, გინდათ მითხრათ რომ კანონი არსებობს?
_ შეიძლება ახალი საბეჭდი მანქანა დროზე ვერ ჩამოვიდეს, მაგრამ ხომ შეიძლება სხვა სტამბებმა დაბეჭდოს?
_ სად?! სხვაგან მონახეთ ისეთი სტამბა, ვინც დაბეჭდავს. ვერ პოულობენ ვერავის. საცოდაობაა. ხალხი იმ დონეზეა შეშინებული, საკუთარი ჩრდილის ეშინიათ.
_ კონკრეტულად “ელიტა ბურჯმა” რატომ თქვა უარი ბეჭდვაზე?
_ რატომ?! 50 წლის ადამიანი ვარ და იმდენი გონება და მიხვედრილობა კი მაქვს რომ… ისინი რასაც დაარტყამდნენ, რაც დაგვჩა ერთი, ტიპოგრაფიაა. მე გაზეთის ბეჭდვაზე უარი არ მითქვამს! მე ტიპოგრაფია გავყიდე!
_ ვინ შეიძინა მანქანა?
_ ჩვენმა ორგანოებმა ყველაფერი იციან. როდესაც მე და მოგელაძე ვცილდებოდით, მითხრა: “თქვენ კარგი ინჟინერი ხართ და გირჩევთ, თქვენს საქმეს მოკიდეთ ხელი.” როდესაც გავყიდე პოლიგრაფია და ანგარიშზე დამიჯდა ფული, მირეკავს მოგელაძე _ ბატონო თენგიზ, ვერ მეტყვით, რა ფული დაგიჯდათ 1 700 000? რისი ფულია? ვუპასუხე: ქალბატონო ნათია, ეს პოლიგრაფიის ფულია, თქვენ რომ მირჩიეთ, დაგიჯერეთ, გავყიდე პოლიგრაფია, ამ ბიზნესში ფული ვერ გავაკეთე, სამშენებლო ბიზნესს მოვკიდებ ხელს და ასე გავაგრძელებ-მეთქი. მე, მოგელაძე გულწრფელად მეცოდება
_ არსებობს კი ვინმე, ვინც დაიჯერებს, რომ ტიპოგრაფიაში ფული არ კეთდება?
_ (იცინის) ალბათ, ქალბატონმა მოგელაძემ დაიჯერა.
_ თქვენი ეს გადაწყვეტილება როგორ მიიღო კოალიციამ?
_ ვერ გეტყვით. დამირეკა ელისო ჩაფიძემ და მითხრა, ბატონო თენგიზ, ამდენის და ამდენის დაბეჭდვა გვინდაო. რომ ვუთხარი, ტიპოგრაფია გავყიდე, გულზე შემოეყარა.
მე რა ვქნა?! კოალიციამ უნდა იფიქროს, უნდა მონახოს სხვა პოლიგრაფიები, სხვა ალტერნატივა. საქმე ცუდად ყოფილა, თუ მარტო ერთი პოლიგრაფია მოინახება რომელიც კოალიციის შეკვეთას დაბეჭდავს. კოალიციის კი არა, საქართველოს საქმე ყოფილა ცუდად!
მე ამ ყველაფერთან ერთად, გავყიდე რამდენიმე მსუბუქი მანქანა, რომელიც დაჭირდა ტიპოგრაფიის ახალ მფლობელს. გაყიდული მანქანა საპატრულოში ვერ გადავაფორმე. სანამდე დაეშვა ხელისუფლება. “ელიტა ბურჯის” ტექნიკის გადაფორმება არ არის დაშვებული. ოფიციალურად განგვიცხადეს, _ სერვერი გვაქვს გაფუჭებულიო, მაგრამ ზურგს უკან გვეუბნებიან, ბრძანება გვაქვს, “ელიტა ბურჯის” ტექნიკა არ გააფორმოთო. ეს ყველაფერი ერთი წლის მერე შემოუბრუნდებათ!
_ ხელისუფლების მხრიდან კერძო ბიზნესის ხელყოფისთვის აპირებთ თუ არა სასამართლოში ჩივილს?
_ უკვე მეტის მოთმენა აღარ შეიძლება. დავავალე იურისტს, ყველაფერს გაამზადებს. რასაც ესენი აკეთებენ, ყოველგვარს ზღვარს გადასცილდა.
გაზეთებიც დაიბეჭდება, აქციებიც ჩატარდება, ყველაფერი გაკეთდება. დღეს შეიძლება ხალხს ეშინია, მაგრამ ხვალ არ შეეშინდება.
ახლა ხომ არ გამოდის გაზეთი?! იმედია, მთავრობას ეყოფა გონიერება და “ელიტა ბურჯს” თავს დაანებებს! აქ 625 ადამიანია დასაქმებული. ყველას განსხვავებული აზრი და შეხედულება გააჩნია, ზოგი მთავრობის მომხრეა ზოგი _ ოპოზიციის. პოლიტიკური ნიშნით, აქ არავინ იდევნება.
მე ვარ მეწარმე და პოლიტიკაზე აქ, ქარხანაში არ ვსაუბრობთ. ჩვენ ვმუშაობთ. ვქმნით პროდუქციას.
