“გაზპრომთან” დადებული ხელშეკრულების ასლი ენერგეტიკისა და ბუნებრივი რესურსების სამინისტროს არ აქვს. ამის შესახებ ინფორმაცია დღეს ახალგაზრდა იურისტთა ასოციაციამ გაავრცელა, რომელიც დოკუმენტის ასლს სამინისტროსგან ითხოვდა. ორგანიზაციის ცნობით, იმის გამო, რომ უწყებამ მათთვის ასლის მიწოდება ვერ შეძლო, კანონი ირღვევა.
საპირისპიროს ამბობს, ენერგეტიკისა და ბუნებრივი რესურსების სამინისტრო. როგორც “გურია ნიუსს” მინისტრის მოადგილემ განუცხადა. “გაზპრომთან” ხელშეკრულება შპს “გაზის ტრანსპორტირების კომპანიამ” გააფორმა, შესაბამისად, ასლი სამინისტროს კი არა, ამ კომპანიას უნდა მოსთხოვონ.
რა იცის სამინისტრომ შპს-სა და “გაზპრომს” შორის დადებული ხელშეკრულების შესახებ, დათვლილია თუ არა ხელშეკრულებით გათვალისწინებული რისკები და აპირებს თუ არა სახელმწიფო ამ დოკუმენტის გასაჯაროებას, ამაზე “გურია ნიუსთან” ექსკლუზიურ ინტერვიუში ირაკლი ხმალაძემ ისაუბრა.
_ბატონო ირაკლი, საიამ სამინისტრო დღეს კანონდარღვევაში დაადანაშაულა. რა პოზიცია გაქვთ და რატომ ვერ ხერხდება ამ ხელშეკრულების გასაჯაროება?
_იურისტთა ასოციაციამ რომ შეწყვიტოს ულტიმატუმებით საუბარი ენერგეტიკის სამინისტროსთან, უკეთესი იქნება და ამის ნაცვლად რომ ვითარებაში გაერკვეს უფრო სწორ განცხადებებს გააკეთებენ. კანონი სამინისტროს არ დაურღვევია. ეს დოკუმენტი ჩვენ არ გვაქვს და ამიტომ ვერ მივაწოდეთ იურისტთა ასოციაციას. ისიც განვაცხადეთ, რომ დოკუმენტი ინახება გაზის ტრანსპორტირების კომპანიაში, ეს არის კომპანია, რომელმაც გააფორმა ხელშეკრულება. იურისტთა ასოციაციას შეუძლია მიმართოს ამ კომპანიას.
_გაზის ტრანსპორტირების კომპანია შემოდის ენერგეტიკის სამინისტროს დაქვემდებარებაში…
_არა, არა, ეგ ეგრე არ არის, გაზის ტრანსპორტირების კომპანია არის შპს, კერძო სამართლის სუბიექტი, მან გააფორმა ხელშეკრულება “გაზპრომთან”; შესაბამისად, იურისტთა ასოციაციამ მიმართოს გაზის ტრანსპორტირების კომპანიას ასლის მიღების მიზნით.
_2011 წლის 21 სექტემბერს, საქართველოს ეკონომიკისა და მდგრადი განვითარების და საქართველოს ენერგეტიკისა და ბუნებრივი რესურსების სამინისტროებს შორის გაფორმებული ხელშეკრულების საფუძველზე კომპანიის 100% წილი მართვის უფლებით გადაეცა საქართველოს ენერგეტიკისა და ბუნებრივი რესურსების სამინისტროს…
_გადაცემული აქვს ენერგეტიკის სამინისტროს მაგრამ ეს არ ნიშნავს ადმინისტრაციულ დაქვემდებარებას. ეს არ ნიშნავს იმას, რომ ის დოკუმენტაცია, რომელიც ინახება გაზის ტრანსპორტირების კომპანიაში ეკუთვნის ენერგეტიკის სამინისტროს. ენერგეტიკის სამინისტრო ახორციელებს პარტნიორის უფლებამოსილებას, როგორც პარტნიორის მხრიდან იღებს გადაწყვეტილებას გაზის ტრანსპორტირებასთან დაკავშირებულ საქმიანობაზე და არა სამეურნეო საქმიანობასთან დაკავშირებით. ეს არის სამართლის ნაწილი. გაზის ტრანსპორტირების კომპანია არის განსხვავებული სუბიექტი და არ არის ადმინისტრაციული ორგანო, ეს არის დამოუკიდებელი ორგანო და მას აქვს უფლება ხელშეკრულება დამოუკიდებლად გააფორმოს. მიიღოს ასეთი გადაწყვეტილებები.
_სახელმწიფოებრივ საკითხს როდესაც ეხება საქმე, დამოუკიდებლად გადაწყვეტილების მიღება ამ შემთხვევაში როგორ გესმით?
_თუ ჩვენ ახლა ვლაპარაკობთ კანონზე და სამართალზე ეს არის ისე, როგორც ახლა მე გეუბნებით. თუ სხვა ჭრილში გაინტერესებთ, ამას სხვა ჭრილში ვერ განვიხილავ. იურისტთა ასოციაციამ ჩვენ დაგვადანაშაულა კანონდარღვევაში, ჩვენ კანონი არ დაგვირღვევია. თუ კანონის ჭრილში განვიხილავთ, მე ამას დავასაბუთებ ნებისმიერ საუბარში, დისკუსიაში და სასამართლოშიც, თუ მიმართავს მას. აქედან გამომდინარე, ჩემი თხოვნა იქნება, ნუ გაცდებით კანონის ფარგლებს. სწორედ კანონის დარღვევაში დადანაშაულებაზეა საუბარი.
_ეს კომპანია ისედაც შედის ენერგეტიკის სამინისტროს დაქვემდებარებაში, აქედან გამომდინარე ენერგეტიკის სამინისტრომ უნდა იცოდეს რა ხელშეკრულებას აწერს ხელს?
_ძალიან ცდებიან როდესაც ამბობენ, რომ გაზის ტრანსპორტირების კომპანია შედის ენერგეტიკის სამინისტროს დაქვემდებარებაში. სამინისტროს დაქვემდებარებაში არ შედის.
_მაშინ ასე გკითხავთ, რა ეტაპზე იყავით ჩართული ხელშეკრულების გაფორმების პროცესში იცით ზუსტად ხელი რას მოაწერა გაზის ტრანსპორტირების კომპანიამ?
_ინფორმაციას ენერგეტიკის სამინისტრო ფლობს, რა საკვირველია, რა პირობებით გაფორმდა ეს ხელშეკრულება. ჩვენ არასდროს არ გვითქვამს, რომ ეს არ ვიცით. მაგრამ საიამ მოითხოვა კონკრეტული დოკუმენტაცია, რომელიც სამინისტროში დაცული არ არის.
_მინისტრმა კახა კალაძემ აღნიშნა, რომ ეს ხელშეკრულება ნაწილობრივ შესაძლოა გასაჯაროვდეს. ამ შემთხვევაში ითანამშრომლებთ გაზის ტრანსპორტირების კომპანიასთან, თუ როგორ მოახდენთ ხელშეკრულების ნაწილის გასაჯაროებას?
_ეს არის ხელშეკრულების მხარეების ნებაზე დამოკიდებული, რადგან გასაიდუმლოებაც მათი პოზიციებიდან გამომდინარე მოხდა. თუ მხარეები შეთანხმდებიან, რომ მოხდეს ამ ხელშეკრულების გასაჯაროება, როგორც ბატონმა კახამ ახსენა, მოხდება მისი გასაჯაროება. თუ ამაზე შეთანხმება მიღწეული იქნება ორივე მხარის მიერ.
_ამ ხელშეკრულების დადებას საკმაოდ უარყოფითი დამოკიდებულება მოჰყვა როგორც პრეზიდენტის მხრიდან, ასევე პოლიტიკური სპექტრის, ოპოზიციის მხრიდანაც. “ქვეყნისთვის დამაზარალებელი ხელშეკრულება, ეკონომიკურად – წამგებიანი” და.ა. შ. რა წაგება შეიძლება ნახოს ქვეყანამ ამ ხელშეკრულების გაფორმებით და თუ გაქვთ გათვლილი ეს რისკები?
_თქვენ თვითონაც აღნიშნეთ, რომ ეს ხელშეკრულება არის კონფიდენციალური, შესაბამისად, დეტალებზე განცხადებას ვერ გავაკეთებ და ციფრებს ნამდვილად ვერ გეტყვით, თუმცა, რამდენად დამაჯერებელი შეიძლება იყოს ასეთი ნეგატიური შეფასებები იმ პირების მხრიდან, რომლებიც არ იცნობენ ამას, ეს თქვენ თვითონვე შეგიძლიათ შეაფასოთ. დეტალებზე მეტი კონკრეტიკა არ შემიძლია, რადგან დოკუმენტი ჯერჯერობით კონფიდენციალურია.
_ისევ მინისტრის განცხადებიდან გამომდინარე გკითხავთ. როგორც კალაძემ აღნიშნა, ეს ხელშეკრულება არის 2 წლის ვადით გაფორმებული და პირველ წელს ისევ ნაწილობრივ ნედლეულით ვისარგებლებთ ბუნებრივი აირის სახით. მეორე წელს იქნება განსხვავება…
_რაც თქვა მინისტრმა ამაზე მეტს ვერ დავამატებ, მინისტრმა გააკეთა სრულყოფილი განცხადება, ის, რისი თქმაც შეიძლებოდა.
_თუ არის განსხვავება დათვლილი, რა იქნება შემდეგ წელს?
_მეტს ვერაფერს ვიტყვი… დამატებით მოგაწვდით ინფორმაციას, რომ “გზაპრომთან” ხელშეკრულებების გაფორმება 2003 წელს ხდება ყოველწლიურად და 2003 წლიდან მოყოლებული, ეს ხელშეკრულებები ყოველთვის იყო კომერციული საიდუმლოება. არასოდეს არ გასჩენიათ კითხვა და სურვილი, ან პრეტენზია, რომ გახსენით ეს დოკუმენტი.
_ამ წლების განმავლობაში ხომ არ შეცვლილა ასე მკვეთრად ხელშეკრულების პირობები.
_ხელშეკრულების პირობების შეცვლა არ მომხდარა. ვადა გაუვიდა 2016 წლის ბოლოს და მოხდა ახალი ხელშეკრულების გაფორმება. ხელშეკრულების პირობების შეცვლა არის აბსოლუტურად სხვა რამე. მოხდა ახალი ხელშეკრულების გაფორმება. თუმცა, რა პირობებზეც იყო გაფორმებული, იმაზეც არ ჰქონდა საზოგადოებას ინფორმაცია, ვინაიდან ეს დოკუმენტი 2003 წლიდან კომერციული საიდუმლოება იყო.
_თქვენი საბოლოო პოზიცია რომ გვითხრათ -გასაჯაროვდება თუ არა ეს დოკუმენტი?
_მე ამის თქმა არ შემიძლი. ეს არის ხელშეკრულების მხარეებზე დამოკიდებული, ვინაიდან ამ ინფორმაციის გამჟღავნებამ არ უნდა მიაყენოს ზიანი მხარეების კომერციულ ინტერესებს.
