მიხეილ სააკაშვილი გია ცერცვაძის წინასწარ პატიმრობაში დატოვებას ეხმაურება და აცხადებს, რომ ქართველი ჯარისკაცის მონაცემები რუსეთს საქართველოს ხელისუფლებამ გადასცა. საქართველოს მესამე პრეზიდენტი ამ ფაქტს „ღალატს“ უწოდებს. მიხეილ სააკაშვილი უკრაინის სასამართლო სისტემასაც აკრიტიკებს.
„მიმაჩნია, რომ აქ რაღაც ტექნიკურ მანიპულაციებს აქვს ადგილი, ბევრი შიდა ქვედა დინებებია უკრაინაში და ამას მეც და დათო საყვარელიძეც კარგად ვიცნობთ. გიას გავაშვებინებთ, მაგრამ კიდევ ერთხელ ვიმეორებ, საქართველოს მხარემ გადასცა ველა ქართველი სამხედროს მთელი მონაცემები რუსეთს, როდესმე თუ რუსეთისგან თავდასაცავად ოპერაციებში მივიღეთ მონაწილეობა.
დღეს აღმოჩნდა, რომ ქურასბედიანზე აღძრეს საქმე, ბერიანიძეზე აღძრეს საქმე და კონკრეტული საბრძოლო ოპერაციების ჩამოთვლით, კონკრეტული მათი მონაწილეობის აღწერით, ეს ვისი მიცემულია? თუ არა იმ ხალხის, იმ მოღალატეების ვინც მოაჯდა საქართველოს სახელმწიფოს და საქართველოს სახელმწიფოს ხელში არსებულ ინფორმაციას,“ _ აცხადებს მიხეილ სააკაშვილი.
საქართველოს მესამე პრეზიდენტი ხაზს უსვამს იმ ფაქტს, რომ გია ცერცვაძის შემდეგ არც სხვა სამხედროები იქნებიან დაცულები, რომლებიც მომავალში რუსული აგრესიის წინააღმდეგ იბრძოლებენ.
„ეხლა ყველა საქართველოს დამცველმა იცის, რომ მომავალში შეექმნება პრობლემები, ზოგი ციხეში აღმოჩნდება, ზოგს მოკლავენ ზოგს კიდევ უბრალოდ დააკავებენ და მრავალი კვირა იჯდება ზოგს უბრალოდ უცხოეთში არც შეუშვებენ. ამის მიღწევა გვინდოდა, ეს არის რაზეც იბრძოდნენ ჩვენი ბიჭები? ესე დაუფასა თავის სამშობლომ?
ეს არის ერთ-ერთი ყველაზე სამარცხვინო ლაქა, რაც დარჩება საქართველოს ისტორიაში. მე არ ვიტყვი უნიათო, ძალიან მარიფათიანი არიან საქართველოს ინტერესების ღალატს როცა შეეხება საქმე. ძალიან ეფექტურები არიან როცა მტერთან თანამშრომლობას ეხება საქმე. ესენი უნიათოები არ არიან, ესენი არიან საშიშები, ესენი არიან მოღალატეები, ესენი არიან საქართველოს მტრები,“-აცხადებს სააკაშვილი.
