საპარლამენტო ფრაქცია „ნაციონალური მოძრაობა“ პარლამენტის ნდობის ჯგუფში სალომე სამადაშვილს წარადგენს.
როგორც ფრაქციის თავმჯდომარე რომან გოცირიძე აცხადებს, ფრაქცია ყველა საპარლამენტო სტრუქტურაში აპირებს აქტიურ მონაწილეობას, მათ შორის პარლამენტის ნდობის ჯგუფში.
უნდა აღინიშნოს, რომ სალომე სამადაშვილის კანდიდატურის წარდგენა იმ ერთ კვოტაზე ხდება, რომელიც განსაზღვრულია უმრავლესობისა და უმცირესობის გარეთ მყოფი დეპუტატებისთვის. ნდობის ჯგუფში აღნიშნულ კვოტაზე ფრაქცია „საქართველოს პატრიოტებმა“ უკვე წარადგინა ირმა ინაშვილის კანდიდატურა. შესაბამისად, დგება ვითარება, როცა ორივე კანდიდატურას საკუთარი ფრაქციებიდან 6-6 წევრის მხარდაჭერა აქვს და ხმები თანაბრად იყოფა.
ამასთან, თეორიულად, გადაწყვეტილების მიღება დამოუკიდებელ დეპუტატ სალომე ზურაბიშვილის პოზიციაზე იქნება დამოკიდებული, რომელიც „ინტერპრესნიუსის“ ინფორმაციით, მხარდაჭერას არც ფრაქცია „ნაციონალური მოძრაობის“ და არც ფრაქცია „საქართველოს პატრიოტების“ კანდიდატურისთვის აპირებს.
