სატელეფონო გარნიტურების სფეროში ლიდერმა კომპანია "GN Netcom"-მა საერთაშორისო კვლევა ჩაატარა იმის გასარკვევად, თუ რეალურად რითი არის დაკავებული ხალხი ავტომობილის მართვისას. კომპანია შეეცადა, გაერკვია, რომელია ყველაზე ხშირი დარღვევები, რომლებიც საფრთხეს უქმნის მგზავრობას.
გამოკითხვის შედეგებით აღმოჩნდა, რომ საჭის მართვის დროს ადამიანები ჭამენ, იცვამენ, იკეთებენ ვარცხნილობას, თამაშობენ ვიდეოთამაშებს და კავდებიან სექსით. ამასთან, ტელეფონზე საუბრისას მძღოლების მხოლოდ ნახევარი სარგებლობს სპეციალური გარნიტურით, იმის მიუხედავად, რომ ბევრ ქვეყანაში ამ მოწყობილობის გარეშე მობილურზე საუბარი კანონმდებლობით იკრძალება.
"Gn Netcom" –ის კვლევის ფარგლებში 1800 ადამიანი გამოიკითხა. ონლაინ-გამოკითხვა ექვს ქვეყანაში ჩატარდა (ბრიტანეთი, ამერიკა, საფრანგეთი, გერმანია, რუსეთი და იაპონია). აღმოჩნდა, რომ ყველაზე ხშირად უსაფრთხოების წესებს აიპონელები არღვევენ. ყველაზე კანონმორჩილი მძღოლები კი, ბრიტანელები არიან.
სტატისტიკურად, საჭესთან ჯდომის დროს დაშვებულ დარღვევებს შორის ჭამა ლიდერობს. შემდეგ მოდის შემხვედრ მძღოლებთან ჩხუბი. ასეთი ქცევა განსაკუთრებით ფრანგებს ახასიათებთ. მძღოლების კიდევ ერთი საყვარელი საქმიანობა SMS-ების გაგზავნაა. ამ მხრივ, როგორც აღმოჩნდა, რუსები გამოირჩევიან. გამოკითხული ქალბატონების უმრავლესობას ცხოვრებაში ერთხელ მაინც გაუკეთებია მაკიაჟი ავტომობილის მართვისას. ახალ ამბებს მოწყურებული მძღოლები საჭესთან გაზეთის კითხვასაც არ ერიდებიან. მძღოლებისთვის ჩვეულ საქმიანობაში შედის ასევე მოწევა, უალკოჰოლო სასმელების დალევა, ვიდეოთამაშებით გართობა და წვერის გაპარსვაც კი. ყველაზე იშვიათი ქმედება, რომელმაც შესაძლოა საფრთხე შეუქმნას საჭის მართვისას ადამიანს, რუკაზე დაკვირვებაა. ეს ჩვევა უმეტესად რუსებს ახასიათებთ. ამასთან, გამოკითხულთა უმრავლესობა ფიქრობს, რომ ავტომობილის მართვისას ყველაზე სახიფათო ნოუთბუკით სარგებლობაა. შემდეგ მოდის სექსი. სახიფათო ქმედებების სამეულში შევიდა ელ-ფოსტის შემოწმებაც.
