ამ წუთებში იუსტიციის უმაღლესი საბჭოს სხდომა იწყება. ერთ-ერთი საკითხი რომელზეც შესაძლოა დღევანდელ შეხვედრაზე იმსჯელონ, უზენაესი სასამართლოს წევრებზე შესაძლო ზეწოლის საქმეა.
უმაღლესი საბჭოს სხდომის დაწყებამდე უზენაესი სასამართლოს თავმჯდომარესთან შეხვედრა გამართა ლევან მურუსიძემ. უმაღლესი საბჭოს მდივანმა მოსამართლეებზე განხორციელებულ შესაძლო ზეწოლასთან დაკავშირებით მიიღო ინფორმაცია.
როგორც შეხვედრის დასრულების შემდეგ მურუსიძემ განაცხადა, საუბარია ყოფილი მაღალჩინოსნების მხრიდან მოსამართლეებისთვის გაგზავნილ წერილებზე, რომელიც ავთენტურობის დადგენის მიზნით პროკურატურას გადაეგზავნა.
„სამწუხაროა, ჩემთვის ფაქტობრივად ახლა გახდა ცნობილი რეალურად რა შემთხვევას ჰქონდა ადგილი. არც მოსამართლეებს არ მოუმართავს ჩემთვის ამასთან დაკავშირებით. ერთადერთი, რაზეც შემიძლია გითხრათ, რომ საუბარია ყოფილი ხელისუფლების მხრიდან მაღალჩინოსნის სახელით მოუვიდათ აღნიშნულ მოსამართლეებს წერილები, ასევე იყო სატელეფონო შეტყობინება, რომელიც ამ მოსამართლეების მიერ მიტანილი იქნა უზენაესი სასამართლოს ხელმძღვანელთან და გადაგზავნილი იქნა პროკურატურაში,“ – განაცხადა ლევან მურუსიძემ.
საბჭოს წევრის განცხადებით, მოსამართლეების საქმიანობაში უხეში ჩარევის შესახებ ინფორმაცია ნინო გვენეტაძეს არც იუსტიციის უმაღლესი საბჭოსთვის მიუწოდებია.
„ქალბატონი ნინო რასაც ჩათვლის საჭიროდ, თავის პოზიციას თვითონ გაახმოვანებს. თუ დადგინდება, რომ ის რეალური წერილი არის ავთენტური და რეალურად ის პიროვნება, ვისზეც ამ წერილში არის მითითებული, ამ მოსამართლეებზე ახდენს ზეწოლას, ეს არის ძალიან ცუდი,“ – აცხადებს მურუსიძე.
შეგახსენებთ, რომ მოსამართლეებზე შესაძლო ზეწოლის საქმეზე პროკურატურამ გამოძიება 14 იანვარს მოსამართლე ალავიძის და ქათამაძის განცხადების და უზენაესი სასამართლოს მიმართვის საფუძველზე დაიწყო.
