მას შემდეგ, რაც ფეხბურთის განვითარების ფონდმა საფეხბურთო კლუბების დაფინანსების ვალდებულება აიღო, ლანჩხუთის მუნიციპალიტეტის წლევანდელ ბიუჯეტში საფეხბურთო კლუბ "გურიას" დაფინანსების საკითხი თითქოს უნდა მოხსნილიყო, მაგრამ აღმოჩნდა, რომ კლუბს გარკვეული საბანკო თუ სხვა სახის დავალიანებების გასასტუმრებლად, ბიუჯეტიდან კვლავ ესაჭიროება თანხები.
რამდენიმე დღის წინ ა(ა)იპ საფეხბურთო კლუბის ლანჩხუთის "გურიას" ხელმძღვანელობამ გამგეობას წერილობითი მოთხოვნით მიმართა 115 ათასი ლარის ვალდებულების კლების მუხლით გამოყოფაზე. ამასთან დაკავშირებით, გამგეობის საფინანსო-საბიუჯეტო და მუნიციპალური შესყიდვების სამსახურმა საკრებულოს განმარტებითი ბარათი მოუმზადა და განსახილველად გადასცა. ადმინისტრაციული წარმოება საკითხთან დაკავშირებით საკრებულოში უკვე მიმდინარეობს.
წერილი, რომელიც მუნიციპალიტეტის გამგებლის, ზაზა ურუშაძის სახელზეა დაწერილი და ხელს კლუბის აღმასრულებელი დირექტორის მოვალეობის შემსრულებელი ლადო გვარჯალაძე აწერს, ნათქვამია, რომ "საქართველოს ბანკიდან" შემოსულია შეტყობინება, რომლის თანახმადაც, ისინი ითხოვენ კლუბის მიერ 2011 წლის 23 სექტემბერს აღებული სესხიდან დარჩენილი 76 738, 25 ლარის დაფარვას ორი კვირის ვადაში, წინააღმდეგ შემთხვევაში, მიმართავენ სასამართლოს".
ამავე წერილით ირკვევა, რომ საბანკო დავალიანებიდან კლუბს გადახდილი აქვს, როგორც ძირი თანხა _ 94 ათასი ლარი, ასევე, საპროცენტო განაკვეთი _ 80 ათასი ლარი. დარჩენილი 76 738, 25 ლარიდან, რომლის დაფარვასაც ბანკი ორი კვირის ვადაში ითხოვს, ძირი თანხაა 45 742,87 ლარი, ხოლო დანარჩენი ჯარიმა-საურავებია.
გარდა საბანკო დავალიანებისა, კლუბის ხელმძღვანელობა წერილში აღნიშნავს, რომ კვების დავალიანების დასაფარად 23 500 ლარია საჭირო, ხოლო ტრანსპორტის მომსახურებისთვის _ 15 500 ლარი.
"გთხოვთ, სასწრაფოდ გადაწყვიტოთ 115 ათასი ლარის ვალდებულების კლების მუხლით გამოყოფა, რათა თავიდან ავიცილოთ ზედმეტი ხარჯების გადახდა", _ ნათქვამია კლუბის აღმასრულებელი დირექტორის წერილში, რომლის ადრესატიც მუნიციპალიტეტის გამგებელია.
ამ წერილს თან "საქართველოს ბანკიდან" მიღებული შეტყობინებაც ერთვის, სადაც წერია, რომ "2015 წლის 21 აპრილს, საფეხბურთო კლუბსა და სს "პრივატბანკს შორის" გაფორმდა საკრედიტო ხელშეკრულება, რომლის მიხედვითაც გაიცა კრედიტი 88 002,68 ლარის ოდენობით, რვა თვის ვადით, წლიური 18% დარიცხვით. პირგასამტეხლო ვადაგადაცილებაზე შეადგენდა ვადაგადაცილებული თანხის 0,05% ყოველ ვადაგადაცილებულ დღეზე. სესხის დაფარვა უნდა მომხდარიყო ხელშეკრულებაზე დართული გრაფიკის შესაბამისად.
ზემოთ აღნიშნული საკრედიტო ხელშეკრულებებით ნაკისრი ვალდებულებები სს "საქართველოს ბანკის" წინაშე, დღეის მდგომარეობით, არ არის შესრულებული და გერიცხებათ ბანკის წინაშე შემდეგი დავალიანებები: ძირი 45 742,87 ლარი, სარგებელი _ 11 092, 10 ლარი, საურავი _ 19 903, 28 ლარი. სულ _ 76 738,25 ლარი", _ ვკითხულობთ "საქართველოს ბანკის" (რომელიც ახლა "პრივატ ბანკის" აქციების სრული მფლობელია) კლუბის სახელზე გამოგზავნილ შეტყობინებაში.
არადა, გასული წლის თებერვლის ბოლოს გამართულ პრესკონფერენციაზე კლუბის ფინანსური დირექტორი თენგიზ კიკვაძე ამბობდა, რომ საბანკო დავალიანებების მტკივნეულ თემას კლუბი საბოლოოდ იმავე წლის მარტში მოაგვარებდა:
"საბანკო კრედიტი, რომელიც კლუბს აღებული ჰქონდა, უკვე, თითქმის, გადახდილია. "პროგრესბანკის" დავალიანება მთლიანად დაიფარა, ხოლო "ტაოპრივატბანკის" ნარჩენი კრედიტი _ 45 ათასი ლარი, მარტში დაიფარება და საბანკო დავალიანების ასე მტკივნეული თემაც ამით ამოიწურება. სხვათა შორის, საზოგადოების ერთ ნაწილში მუსირებდა 300 ათასი ლარის თემაც, რომელიც ვითომ კლუბს "პროგრესბანკისთვის" ჯარიმის სახით უნდა გადაეხადა. ვინაიდან 6 თებერვალს "პროგრესბანკს" ჩავურიცხეთ ნარჩენი 155 317 ლარი, ბანკმა პირგასამტეხლო თანხის გადახდა გვაპატია და ამ 300 ათასი ლარის გადახდის ვალდებულება მოგვეხსნა", _ ამბობდა მაშინ კიკვაძე.
"გურიასთვის" ვალის დასაფარად 115 ათასი ლარის გაღებას ბიუჯეტიდან არ ეთანხმებიან საკრებულოს წევრები, ყოველ შემთხვევაში მანამდე მაინც, სანამ კლუბის ხელმძღვანელობა დეტალურ მასალას არ წარმოადგენს, თუ როგორ, ვის მიერ და რა ვალდებულებებით მოხდა თავის დროზე სესხის აღება:
"რამდენჯერაც მოგვმართავს ეს ხალხი, იმდენჯერ ხელი უნდა ავუწიოთ და მივცეთ თანხა?! კეთილი ინებონ და მოამზადონ შესაბამისი მასალა, სადაც დაასაბუთებენ, რატომ და რისთვის ითხოვენ ფულს, მეტი კონკრეტიკაა საჭირო ამასთან დაკავშირებით. ნახონ, სად არის სასესხო ხელშეკრულება და ვისი პასუხისმგებლობის საკითხია", _ ამბობენ საკრებულოს წევრები და კლუბის ხელმძღვანელობისგან კომისიებისა და ფრაქციების სხდომებზე დეტალური ინფორმაციის წარდგენას ითხოვენ. აქვე იმასაც ამბობენ, რომ დროა, იმათი პასუხისმგებლობის საკითხიც დაისვას, ვინც თავის დროზე ეს სესხი აიღო და შესაბამისი გარანტიები გასცა.
ლანჩხუთის ექს-გამგებელი გია გოგუაძე, რომლის გამგებლობის დროს, 2011 წელს, მოხდა ბანკიდან სესხის აღება, ამბობს, რომ მოამზადებს და საკრებულოს წარუდგენს სრულად იმ დოკუმენტაციას, თუ რა სამართლებრივი აქტებით მოხდა თავის დროზე ამ სესხის აღება, რა ვალდებულება ჰქონდა 2012 წელს კლუბის მაშინდელ პრეზიდენტს ფაცურიას, რომელიც ითხოვდა სესხის აღებას:
"ფაცურიას ჰქონდა ვალდებულება, რომ სესხს 2013 წლის მარტში დაფარავდა, საამისოდ მას 400 ათასი ლარი ჰქონდა გამოყოფილი. რატომ არ მოხდა ამ სესხის დაფარვა, რა გახდა ამის მიზეზი, ამასთან დაკავშირებით ყველა საჭირო დოკუმენტაციას წარმოვადგენ", _ ამბობს გოგუაძე.
