დღეს, თბილისში, რუსთაველის გამზირზე, რუსთავის აზოტის ქარხნის გათავისუფლებული მუშების მხარდასაჭერი აქცია გაიმართა, რომელსაც პროფკავშირები, არასამთავრობო ორგანიზაციები და საზოგადოებისთვის ცნობილი სახეები შეუერთდნენ.
აქციის მონაწილეებმა რუსთაველის გამზირი გადაკეტეს და ქარხნიდან გათავისუფლებული მუშების სამსახურში აღდგენა მოითხოვეს.
აქციის მსვლელობისას მონაწილეებსა და პოლიციას შორის დაპირისპირებაც მოხდა _ სამართალდამცველები დემოსტრატებს გზის გადაკეტვის საშუალებას არ აძლევდნენ.
აქციის მონაწილეებმა ხელისუფლებას მოუწოდეს, პროცესში არა ძალის გამოყენებით, არამედ სამართლებრივად ჩაერთოს და მოქალაქეების ინტერესების დაცვაზე იზრუნონ.
მათი თქმით, დროულად უნდა შეიქმნას შრომის ინსპექცია, რომელიც მშრომელების სამუშაო პირობებზე იზრუნებს.
აქციის მონაწილეების განცხადებით, ხელისუფლებამ ყველაფერი უნდა გააკეთოს იმისთვის, რომ კომპანიები ბანკების მფლობელობაში არ აღმოჩნდნენ. მათი თქმით, რუსთავის აზოტის ქარხნის მფლობელი კომპანიის უკან „საქართველოს ბანკი“ დგას, რომელიც მოსახლეობის ინტერესებს არ ითვალსწინებს.
_ „საქართველოს ბანკი“ არ ფლობს კომპანია „რუსთავის აზოტს“ და, შესაბამისად, არ არის უფლებამოსილი იქ მუშახელის აყვანაზე ან სამსახურიდან დათხოვნაზე, _ აღნიშნა „გურია ნიუსთან“ საუბრისას „ საქართველოს ბანკის“ პრესსამსახურის ხელმძღვანელმა ხათუნა კაკაბაძემ.
შეგახსენებთ, რომ აზოტის ქარხნიდან 350 ადამიანი რამდენიმე დღის წინ ყოველგვარი გაფრთხილების გარეშე გაათავისუფლეს _ სამსახურში მისულ მუშებს საშვები დაბლოკილი დახვდათ.
ქარხნის მფლობელი კომპანიის _ ს.ს. „ეუ ინვესთმენტის“ წარმომადგენლები ამბობენ, რომ გათავისუფლებულ თანამშრომლებს 3 თვის განმავლობაში 500-500 ლარს გადაუხდიან, რასაზეც ისინი არ თანხმდებიან და სამსახურში დაუყონებლივ აღდგენას ითხოვენ.
კომნპანიაში კი განმარტავენ, რომ თანამშრომლების სამსახურში აღდგენა ამ ეტაპზე შუეძლებელია და როგორც კი დადგება საჭიროება, ქარხანა შევა ექსპლუატაციაში და ჩადგება ნორმალურ რეჟიმში, გათავისუფლებულების აღდგენაზე დაიწყება მუშაობა:
„ქარხნის სრული დატვირთვის ამუშავების შემთხვევაში, ახალმა ინვესტორმა, შესაძლოა, განიხილოს დამატებითი კადრების დასაქმების საკითხიც,“ _ აღნიშნულია შპს „რუსთავის აზოტის“ მიერ გავრცელებულ ოფიციალურ განცხადებაში, რომელიც კომპანიამ რამდენიმე დღის წინ გაავრცელა.
ეს არგუმენტები მიუღებელია სამსახურიდან დათხოვილი ადამიანებისთვის, რომლებიც სიმართლის გარვევას სასამართლოს გზით აპირებენ.
აღსანიშნავია, რომ გათავისუფლებულ მუშებს სოლიდარობა და მხარდაჭერა უკვე გამოუცხადეს „აუდიტორია 115“-მა; „მწვანე მუშტმა“; „საქართველოს რკინიგზელთა პროფესიულმა კავშირმა“; GTUC-მა; „რკინიგზელთა ახალმა პროფკავშირმა“; „ადამიანის უფლებების სწავლებისა და მონიტორინგის ცენტრმა“ (EMC); Georgian Young Greens-მა; „მწვანე ალტერნატივამ“; „ქალთა მზერამ“; „თეთრი ხმაურის მოძრაობამ“; „საქართველოს ახალგაზრდა იურისტთა ასოციაციამ“ და „თბილისის სოლიდარობის ქსელმა“.
ვინ და როგორ შეიძინა აზოტის ქიმიური ქარხანა, რატომ გაათავისუფლეს მუშები და რა ხდება რეალურად _ ამ თემაზე „გურია ნიუსმა“ ჟურნალისტური გამოძიება უკვე დაიწყო, რომელსაც უახლოეს დღეებში შემოგთავაზებთ.
