BBC-ის ობიექტივში "ბიბლუსში" დასაქმებული ადამიანების გადაღებული ვიდეო მოხვდა, სადაც ისინი შრომის პირობებს აპროტესტებენ.
მაუწყებლის ინფორმაციით, ქართველი მუშები სოლიდარობას ითხოვენ.
შრომის პირობების წინააღმდეგ საქართველოში სოციალურ მედიაში საპროტესტო აქციები მიმდინარეობს. მიუხედავად იმისა, რომ ქვეყნის მკაცრი შრომის კოდექსის წინააღმდეგ არაერთი აქცია გამართულა, ეს არის პირველი შემთხვევა, როდესაც საკითხს სოციალურ ქსელებში ფართო გამოხმაურება მოყვა.
საპროტესტო აქციები მას შემდეგ დაიწყო, რაც "ბიბლუსში" დასაქმებულმა 6-მა ადამიანმა ვიდეო მიმართვა გაავრცელა, სადაც დაბალ ხელფასს, ხანგრძლივ ცვლებს და ცუდ სამუშაო პირობებს უჩივიან.
BBC-ის ინფორმაციით, ვიდეოს 100 000-ზე მეტი ნახვა აქვს.
ვიდეო "აუდიტორია 115"-მა ატვირთა, რომელიც თბილისის სახელმწიფო უნივერსიტეტში ძირითადად სტუდენტების უფლებების დამცავ კამპანიას აწარმოებს და ასევე მხარს უჭერს მშრომელთა უფლებებს წარსულში.
"ჩვენ გვჭირდება სოლიდარობა და ერთიანობა უსამართლო პრაქტიკის წინააღმდეგ. მოვუწოდებთ ყველა თანამშრომელს შემოგვიერთდნენ. ბრძოლა არის საერთო საქმისთვის. სოლიდარულები და მამაცები ჩვენ გვერდით დადგებიან",_ამბობენ ვიდეოში.
"ფეისბუქში" ასევე გამოქვეყნდა სუპერმარკეტ "ფრესკოს" თანამშრომლების ვიდეო, სადაც აქცენტი მსგავს საკითხებზე იყო გაკეთებული.
2013 წელს საქართველომ ცვლილებები შეიტანა შრომის კოდექსში, მას შემდეგ რაც საერთაშორისო პროფკავშირების კონფედერაციამ საქართველოს მთავრობას მშრომელთა უფლებების გაუმჯობესებისკენ მოუწოდა.
სოციალურ ქსელში კომენტარებში ერთ-ერთი მომხმარებელი წერს: "შრომის კოდექსი არის უსამართლო და მორგებული ყველაზე, ხალხის გარდა".
კამპანიის საპასუხოდ "ბიბლუსმა" განაცხადა,რომ ის ზრუნავს თავის თანამშრომლებზე. როგორც მათ განცხადებაშია ნათქვამი, ვიდეო არ ასახავს სიმართლეს.
