საპატრიარქოს იურისტის ედიშერ ქარჩავას განცხადებით, მამა გიორგი მამალაძის საქმეში საპატრიარქოს იურისტები ჩართულები არ არიან და შესაბამისად, მის ინტერესებს არ იცავენ.
მისივე თქმით, საგამოძიებო ორგანოებს საპატრიარქოსგან ჯერჯერობით არავითარი ინფორმაცია ან დოკუმენტაცია ოფიციალურად არ გამოუთხოვიათ.
"საქმეში საპატრიარქოს იურისტები არ არიან ჩართულები, ვინაიდან ადვოკატის უფლებამოსილების მქონე მარტო მე ვარ. მე კი მის ინტერესებს არ ვიცავ. ამ საქმეზე ინფორმაცია არ გამაჩნია", _ განაცხადა საპატრიარქოს იურისტმა.
ედიშერ ქარჩავას თქმით, რაიმე სახის საგამოძიებო მოქმედებების გატარებაზე საპატრიარქოს იურისტებს, საგამოძიებო ორგანოდან არავითარი შეტყობინება არ მიუღიათ.
”როგორც წესი. უნდა მოგვმართოს პროკურატურამ წერილით ან თხოვნით შესაბამის მოქმედებებთან დაკავშირებით. მსგავს დოკუმენტებს იურისტები ვამზადებთ, ჩვენთან კი ასეთი რამ შემოსული არაა. წერილით მომართვა ხდება ნებისმიერ საგამოძიებო მოქმედებაზე ან უფლებამოსილების განხორციელებასთან დაკავშირებით, ან გარკვეულ პირთან დაკავშირებით კითხვის არსებობის შემთხვევაში და ა.შ. საგამოძიებო უწყება უფლებამოსილია შესაბამისი მოქმედებები განახორციელოს დოკუმენტების გამოთხოვის მიუხედავად”, _ განაცხადა ედიშერ ქარჩავამ.
საპატრიარქოს ქონების მართვის სამსახურის ხელმძღვანელი მამა გიორგი მამალაძე ამ დროისთვის სასჯელაღსრულების დაწესებულებაშია გადაყვანილი.მას აღკვეთის ღონისძიების სახით პატიმრობა პროკურატურის შუამდგომლობის საფუძველზე შეეფარდა.
საპატრიარქოს ქონების მართვის სამსახურის ხელმძღვანელი სამი დღის წინ, აეროპორტში დააკავეს. ის ბერლინში, პატრიარქთან გამგზავრებას გეგმავდა.
კონკრეტულად რას უკავშირდება მისი აყვანა, უცნობია, ვინაიდან ოფიციალურ უწყებებს აღნიშნულთან დაკავშირებით კომენტარი ჯერჯერობით არ გაუკეთებიათ. არსებული ცნობით, საქმეს გრიფით „საიდუმლო“ ადევს. არსებული ინფორმაციით, საქმეზე დაიკითხა პატრიარქის დაცვის უფროსი სოსო ოხანაშვილი, რომელიც ამ მიზნით ბერლინიდან თბილისში გამოემგზავრა, თუმცა ახლა ისევ ბერლინში იმყოფება.
