დაცვამ მას სცენასთან მიახლოების საშუალება არ მისცა, დასახიჩრებული გვამის ფოტოებით მდგარი კაცი არც ჟურნალისტებს შეუმჩნევიათ. „გურია ნიუსი“ ალექსანდრე თაყაძის აქციაზე მისვლის მიზეზით დაინტერესდა .
„მესამე წელია, ამ ქვეყანაში სამართალი ვერ ვიპოვე, ადრე იმას მაინც მეუბნებოდნენ, _შენმა შვილმა თავი მოიკლაო, ეხლა პასუხსაც აღარ მცემენ. ივანიშვილის იმედი გამიჩნდა, იქნებ დამეხმაროს და ბავშვის დაღუპვის ნამდვილი მიზეზი დავადგინო,”_ აცხადებს დაღუპული ჯარისკაცის მამა – გორის რაიონის სოფელ კირბალის მკვიდრი ალექსი თაყაძე „გურია ნიუსთან“ საუბარში. 19 წლის რიგითი დავით თაყაძე ხელვაჩაურის სამხედრო ბაზაზე 2009 წლის 12 ნოემბერს გარდაიცვალა. თავდაცვის სამინისტროს მიერ გავრცელებული ოფიციალური ვერსიით, ჯარისკაცის გარდაცვალების მიზეზი თვითმკვლეობაა. ოჯახს ამ ვერსიის არ სჯერა . თაყაძეები ფიქრობენ , რომ მათი შვილი მობილური ტელეფონის გამო მოკლეს. სამხედრო ნაწილში ჩუმად შეტანილი ტელეფონი დავით თაყაძესა და სერჟანტ ილია კოპალეიშვილს შორის კონფლიქტის მიზეზი გახდა. რის შემდეგაც ამ უკანსაკნელმა ჯარისკაცს ტელეფონი ჩამოართვა.
”ჩემმა შვილმა 12 ნოემბერს დაგვირეკა და უცნობი ადამიანის მობილურის ანგარიშზე 5 ლარის ჩარიცხვა გვთხოვა. 2 საათში კი დათოს გარდაცვალება შეგვატყობინეს, 5მეტრის სიმაღლის 300 ტონიანი ცისტერნიდან გადმოხტა,თავი მოიკლაო” _ აცხადებს „გურია ნიუსთან“ საუბარში დაღუპული ჯარისკაცის მამა. შვილის დაკრძალვის შემდეგ, ოჯახმა მომხდარის გამოძიება დამოუკიდებლად დაიწყო. დაათვალიერეს ”თვითმკველობის” ადგილი, გაესაუბრნენ შვილის მეგობრებს, რის შემდეგაც ეჭვები კიდევ უფრო გაუმძაფრდათ, მაგრამ სამართალს ვერ მიაგნეს.
”ნაწილში გვითხრეს, 5 მეტრის სიმაღლიდან გადმოხტაო. ვნახეთ ის ცისტერნა , 11 მეტრის სიმაღლე ჰქონდა დაახლოებით, გვიმტკიცებდნენ 10 მეტრზე გადახტაო, ამ მანძილზე მსოფლიო ჩემპიონი ვერ გადახტებოდა. ბავშვს სახეზე ეტყობოდა, რომ ნაცემი იყო. ეს ეჭვი მისმა მეგობრებმაც დაგვიდასტურეს. იმ დღეს, ჩხუბი მომხდარა ნაწილში. ჩემი შვილი ჯერ მოკლეს, მერე გადმოაგდეს ცისტერნიდან” __ აცხადებს დაღუპული ჯარისკაცის მამა.
ჯარისკაცის თვითმკვლელობის საქმის გამოძიება ბათუმში დაიწყო, თუმცა მალე თავდაცვის სამინისტროს გადაეცა. ოჯახი აცხადებს, რომ გამოძიება ჭიანურდება და მათი კითხვები პასუხგაუცემელია.
”სამხედრო პოლიცია მეუბნებოდა კარგი შვილი გყავდა, კარგად იქცეოდაო, თუ კარგი იყო, რად მომიკლეს? _ აცხადებს ალექსი თაყაძე, რომლმაც ოჯახთან და ნათესავებთან ერთად აქციაც კი გამართა თბილისში პარლამენტის წინ.
გორის აქციაზე შვილის ფოტოებით მისული მამა ივანიშვილს ვერ შეხვდა, თუმცა მისი ყურადღება მიქცია. ივანიშვილის მისასალმებელი ჟესტის შემდეგ მისი ვინაობით მედიაც დაინტერესდა…
„იქნებ რამე გამოვიდეს, იქნებ დამეხმაროს ვინმე _ ამბობს ალექსი თაყაძე და იმედი აქვს, რომ ბიძინა ივანიშვილი მას უყურადღებოდ არ დატოვებს.
