“ივანიშვილის კამპანია რევოლუციის მზადებისთვის ფართო მასშტაბებს იძენს”

ანალიტიკოსი ვარაუდობს, რომ იმ შემთხვევაშიც კი, თუ ლიდერები დაძაბულობის გასამუხტავად უკან დაიხევენ, ისინი უკვე ვეღარ შეაჩერებენ მხარდამჭერთა ყველაზე უფრო მებრძოლ ნაწილს.

ჯეიმსთაუნის ფონდის ანალიტიკოსის აღმოსავლეთ ევროპის საკითხებში ვლადიმერ სოკორის ამ სკანდალურ სტატიას არანაკლებ სკანდალური სათაურით აქვეყნებს ვებგვერდი www. jamestown.org: “ქართული ოცნების”ლიდერები არჩევნების შემდგომი კონფრონტაციის გეგმას განიხილავენ.”

სტატიის ავტორი ფიქრობს, რომ კოალიცია წინასწარ არის შეგუებული საარჩევნო მარცხს და მისი მთავარი ინტერესი, პოლიტიკური პროცესის ქუჩაში გადატანაა.

“ირაკლი ალასანია პირველი იყო ლიდერებიდან, რომელმაც საზოგადოება წინასწარ გააფრთხილა, რომ “ქართული ოცნება” არ აპირებდა ეცნო საპარლამენტო არჩევნების შედეგები და საერთაშორისო ორგანიზაციებს მათი შეცვლისკენ მოუწოდებდა,” _ წერს სოკორი და პოსტსაარჩევნო რევოლუციის სამზადისის დასამტკიცებლად რამდენიმე არგუმენტი მოჰყავს:

_ ივანიშვილი ამომრჩეველს არწმუნებს, რომ არჩევნები მოგებული აქვს, მაგრამ ხელისუფლება შედეგებს გააყალბებს, ხალხს კი საარჩევნო ხმების დაცვა მოუწევს;

_ ივანიშვილი აცხადებს, რომ მალე ქვეყნის მართვა ხალხის ხელში გადავა;

_ ივანიშვილი დასჯას ჰპირდება ხელისუფლების იმ წარმომადგენლებს “ვინც კანონი დაარღვია და ხალხს ტკივილი მიაყენა”.

– ივანიშვილი და მისი კოალიცია უგულებელყობს ისეთი ავტორიტეტული ორგანიზაციების კვლევების შედეგებს, როგორებიცაა NDI და IRI.

_ ივანიშვილი ღიად მოუწოდებს სპორტსმენებს, გაერთიანდნენ მის გარშემო.

სოკორის შეფასებით, ივანიშვილმა ეს “ლოგიკა რადიკალი ოპოზიციონერებისაგან ისესხა”, რომლებმაც “ასეთი ქმედებებით ქვეყანა რთულ მდგომარეობამდე მიიყვანეს რუსეთის შემოჭრამდე 1 თვით ადრე.”

ჯეიმსთაუნის ფონდის ანალიტიკოსს სტატიაში მოჰყავს საარჩევნო და პოლიტიკური ტექნოლოგიების კვლევის ცენტრის ხელმძღვანელის კახა კახიშვილის ინტერვიუ გაზეთ”კვირის პალიტრასთან” და “რეზონანსთან” (25 ივნისი).

სოკორი კახიშვილს “მეოცნებე ანალიტიკოსს” უწოდებს, “კვირის პალიტრას “კი ყველაზე გავლენიან ოპოზიციურ გაზეთს. “ჯეიმსთაუნის” ანალიტიკოსი ფიქრობს, რომ კახიშვილი მის აზრს ეთანხმება, როდესაც აცხადებს, რომ ხელისუფლება არჩევნების შედეგების გაყალბებით ოპოზიციას ქუჩაში გაიყვანს.

“არჩევნების გაყალბება ივანიშვილს მოუმზადებს იმის საფუძველს, რომ კოალიცია და მხარდამჭერები ქუჩაში გაიყვანოს. ხელისუფლება იძულებული გახდება ოპოზიციასთან მოლაპარაკება დაიწყოს. რა შეიძლება იყოს მოლაპარაკების საგანი? არჩევნების ხელახლა ჩატარება რამდენიმე უბანში, კოალიციური მთავრობის შექმნა თუ საპარლამენტო კომიტეტების გადანაწილება? არჩევნების შემდგომ უნდა ველოდოთ, რომ მოქმედებები ქუჩაში გადაინაცვლებს”, _ აცხადებს კახიშვილი.

სოკორის აზრით, ივანიშვილი ცდება, როდესაც ხელაღებით უგულებელყოფს NDI და IRI-ს კვლევის შედეგებს, რომელთა მიხედვითაც საკაშვილი და მმართველი პარტია ლიდერობენ. ივანიშვილი ამ კვლევებს შინაგან საქმეთა მინისტრის სამუშაოს უწოდებს (“ასავალ-დასავალი”, 13-17 ივნისი).

“ქართული ოცნების ორგანიზაცია და დაგეგმარება ძალიან მოუმწიფებელია, ქაოტურიც კი. ლიდერების ქმედებების წინასწარ განჭვრეტა შეუძლებელია, ნაცვლად იმისა, რომ მიჰყვნენ ერთხელ უკვე დასახულ სტრატეგიას,” _ აცხადებს სოკორი.

სოკორი კოალიციას ლიდერებისა და საარჩევნო პროგრამის დაწუნებასთან ერთად, “კომუნიკაციის სამსახურსაც” უკრიტიკებს:

“შეიძლება “ქართული ოცნების” მარცხი პირიქითაც შეიცვალოს, თუ ივანიშვილი დაიქირავებს მეტ და უკეთეს კომუნიკატორებს, რომლებსაც აქვთ ნიჭი, ჩაატარონ კამპანია საქართველოში, და არა დასავლეთში, სადაც მას დაქირავებული ჰყავს უკეთესი და უფრო მაღალანაზღაურებადი კომუნიკატორები,” _ წერს სოკორი და ივანიშვილს “ნაადრევ ტრიუმფალიზმში” სდებს ბრალს.

აღსანიშნავია, რომ ბიძინა ივანიშვილის რადიკალიზაციის პროცესი თანდათან ორგანიზებულ ხასიათს იძენს. “ახალი მემარჯვენეების” ლიდერის დავით გამყრელიძის განცხადების შემდეგ, რომელმაც ივანიშვილი რევოლუციის მომზადებაში დაადანაშაულა, NDI–ის კვლევაში მოულოდნელად გაჩნდა შეკითხვა: “არჩევნების გაყალბების შემთხვევაში, თუ ბიძინა ივანიშვილი მოუწოდებს ხალხს ქუჩის საპროტესტო აქციებისკენ, დაუჭერდით თუ არა მხარს ამგვარ მოწოდებას”?

ამ შინაარსის განცხადებები გაისმა ხელისუფლებასთან დაახლოებული პოლიტიკოსებისაგან ევროპარლამენტშიც.