საქმეში არსებული მტკიცებულებების გათვალისწინებით და საქართველოს სისხლის სამართლის საპროცესო კოდექსით განსაზღვრული პროცედურის დაცვით, თბილისის საქალაქო სასამართლოს განჩინების საფუძველზე, საქართველოს პროკურატურამ დააყადაღა სატელიტური ანტენები.
საქართველოს პროკურატურა აცხადებს, რომ აღნიშნული ღონისძიებები მიზნად ისახავს წინასაარჩევნო პროცესების დაცვას შესაძლო დანაშაულებრივი ჩარევისაგან და პოლიტიკური პარტიებისა და მოქალაქეების საარჩევნო უფლებებისა და გამოხატვის თავისუფლების უზრუნველყოფას.
რას ფიქრობს პროკურატურის მიერ გავრცელებულ განცხადებაზე მე-9 არხის გენერალური დირექტორი? ამასთან დაკავშირებით, “გურია ნიუსი” კახა ბექაურს ესაუბრა.
_ ბატონო კახა, რა შეფასებას მისცემდით “მაესტროს” თეფშების დაყადაღების ფაქტს? პროკურატურა საუბრობს ამომრჩევლის მოსყიდვაზე.
_ ეს ამომრჩევლის მოსყიდვა კი არ არის, ეს არის ხელისუფლების პანიკა. როდესაც დასდევ თეფშებს. მგონი, ამ ხელისუფლებას, როდესაც სამზარეულოში შედიან, იმ თეფშებისაც ეშინიათ. საბოლოო ჯამში “მაესტროს” ეს აქცია ემსახურებოდა რას?! ეს არის მისი ბუნებრივი მდგომარეობა, ბიზნესს მოდელი. მას გააჩნია სატელიტური ლიცენზია, სატელიტური სიხშირე და ის ზრუნავს თავისი რეიტინგის ზრდისთვის. ზრუნავს იმისთვის, რომ ინფორმაცია, რომელსაც აწარმოებს, რაც შეიძლება მეტმა ადამიანმა მიიღოს. ხელისუფლებამ “მაესტროს” თეფშების დაყადაღებით კიდევ ერთხელ დაანახა ყველას, რომ მას აქვს პანიკური მდგომარეობა და პანიკურად ეშინია ინფორმაციის გავრცელების.
_ რატომ ეშინია ინფორმაციის გავრცელების? მასაც ხომ ჰყავს ალტერნატიული საინფორმაციო წყარო?
_ ინფორმაციის გავრცელების ეშინია იმიტომ, რომ მთელი ამ წლების განმავლობაში, ის თავისი პროპაგანდისტული არხებით აჩვენებდა ვირტუალურ რეალობას. დღეს გაჩნდა რისკი იმისა, რომ ამ ადამიანებმა, საქართველოს მოქალაქეებმა, საზოგადოებამ, გაიგონ, რა არის სიმართლე! ამის ეშინია პანიკურად! ამიტომ დასდევს და აყადაღებს ამ თეფშებს. რა მიზანს ემსახურება მისი ეს ქმედება?! ერთადერთ მიზანს – ოქტომბრის არჩევნებზე მოსახლეობამ გააკეთოს არაინფორმირებული არჩევანი, ანუ ადამიანებს არ ჰქონდეთ სწორი ინფორმაცია.
_ მედიასაშუალებებით გავრცელდა ინფორმაცია, რომ შეფუთულ პროდუქციას “გლობალ ტვ”-ის ეტიკეტები ჰქონდა მიკრული. რა ეტიკეტებზეა საუბარი, ან საიდან გაჩნდა მაესტროს თეფშებზე ისინი?
_ ეს ჩემთვის ანეკდოტია. არ ვიცი, საიდან მოვიდა ის ეტიკეტები, რომელიც მიწებებული იყო შეფუთვაზე, რადგან ეს ვიდეოკადრები შინაგან საქმეთა სამინისტრომ გაავრცელა. თავად გადაიღო და დაურიგა მედიას. მათ თავისუფლად შეეძლოთ ძველი “გლობალის” თეფშებიდან, რომელიც დაყადაღებულია, აეძროთ და ამაზე დაეკრათ.
მე ერთი რამეს თქმა შემიძლია ამასთან დაკავშირებით: როდესაც დააყადაღეს თეფშები და უკვე ვერავინ ხედავდა, ჩუმად გადაიღეს ვიდეომასალა და მერე გაავრცელეს. მართლა რომ ჰქონოდა “გლობალის” ეტიკეტები, იცით, რას იზამდნენ? როდესაც “მაესტროს” ტვირთი შემოვიდა საბაჟოზე, დაუძახებდნენ ყველა ტელევიზიას: “რუსთავი 2”-ს, “მე-9” არხს, “მაესტროს”, თქვენ… სუყველას და გვაჩვენებდნენ დოკუმენტებს _ აი “მაესტროზე” მოვიდა ტვირთი, მოდით, ნახეთ, “გლობალი” აწერიაო. რატომ არ გააკეთეს ეს მაშინ, როდესაც მანქანა საზღვარს მოადგა?! როდესაც განბაჟება უნდა მომხდარიყო?! ეს გააკეთეს მას შემდეგ, რაც დააყადაღეს თეფშები და შეიტანეს თავიანთ საწყობში. არავის კონტროლი არ აქვს ამაზე და არავის არ უშვებდნენ იქ _ არც “მაესტროს”, არც ჟურნალისტებს და არც არავის. თვითონ გადაიღეს კადრები. ჩვენ რა ვიცით, რომ ის კადრები რეალურია და ფაბრიკაციას არ აქვს ადგილი?!
ოფიციალური დოკუმენტებით, ტვირთი “მაესტროსთვის” იყო განკუთვნილი, მას ჰქონდა კონტრაქტი გაფორმებული მომწოდებლებთან, “მაესტრო” ახორციელებდა ამ აქციას და…
_ მაესტრო დაადანაშაულეს “ელიტა ბურჯთან” ალიანში; რომ მოხდა თვალთმაქცური გარიგება “გლობალ ტვ”-ის თეფშების… (კითხვის დასმა არ დაგვასრულებინა.ავტ)
_ ყველა ფაქტს ხომ დასაბუთება სჭირდება? ეს არის ის, რაც სიტყვიერად თქვეს. მათ ასევე წარმატებით შეეძლოთ ეთქვათ, “მაესტრო” ბომბეიდან ლონდონამდე გვირაბს თხრიდაო. ეს ხომ არ უნდა დავიჯეროთ? უნდა დაასაბუთონ ის, რასაც ამბობენ სიტყვიერად. “ელიტა ბურჯთან” კავშირი, კონტრაქტი, დავალება ეს საერთოდ ანეკდოტია. თურმე, “ელიტა ბურჯმა” მისცა დავალება “მაესტროს”… ნუ სასაცილოა… ამაზე სერიოზულად არც კი შეიძლება ვილაპარაკოთ.
