ძლიერი წვიმა და ქარი წუხელ, დაახლოებით 3 საათზე დაიწყო, ქარს მოყვა სეტყვა, რომელმაც სახლებს სახურავები ახადა, ჩაამსხვრია მინები და დაანგრია რამდენიმე შენობის კედელი.
სტიქიამ მთლიანად გაანადგურა ნათესები, დახოცა პირუტყვი,სამივე რაიონი ელექტროენერგიის გარეშეა დარჩენილი, დაზიანებულია გზები, ინფრასტრუქტურა, წყლის სათაო ნაგებობები.
”სოფლებში 100%-ით არის განადგურებული მოსავალი, დახოცილია შინაური ფრინველი და პირუტყვი. დაგლეჯილია მრავალწლიანი ხეები, დაზიანებულია მანქანები, ჩახერგილია გზები, დაწყვეტილია ელექტროენერგიის მავთულები,” _ ამ ინფორმაციას კახეთის საინფორმაციო ცენტრი ავრცელებს.
სამაშველო სამსახურები წუხელვე გავიდნენ შემთხვევის ადგილებზე,ისინი ამ დრომდე აგრძელებენ მუშაობას უბედურების ზონაში.
დაზარალებული ადამიანების შესხებ განსხავებული ინფორმაცია ვრცელდება, ოფიციალური მონაცემებით, საავადმყოფოებს დაახლოებით ოთხმა პაციენტმა მიმართა. კახეთის საინფორმაციო ცენტრი კი აცხადებს, რომ 13 ადამიანს გაეწია სამედიცინო დახმარება. პაციენტთა უმეტესობა მინის ნამსხვრევებით დაზიანდა.
საქართველოს პრეზიდენტის მიხეილ სააკაშვილის ბრძანებით, სტიქიის შედეგების სალიკვიდაციო შტაბი შეიქმნა. თავად პრეზიდენტი, ამ დროისათვის, სტიქიით დაზარალებულ რეგიონში იმყოფება.
პრეზიდენტისვე დავალებით, მთავრობის სხდომა, რომელიც დღეს თბილისში უნდა გამართულიყო, თელავში 1 საათის დაგვიანებით ჩატარდება. მთავრობა მიყენებულ ზიანსა და მისი აღმოფხვრის გზებზე იმსჯელებს.
პრეზიდენტის რწმუნებული კახეთში, გიორგი ღვინიაშვილი აცხადებს, რომ სტიქიამ ყველაზე მეტად თელავი დააზარალა. დაზიანებულ შენობებს შორისაა თელავის ერთ-ერთი სასტუმრო, რომელშიც სხვა სტუმრებთან ერთად, “ბოლივუდის” მსახიობები იმყოფებოდნენ.
მძიმე ვითარებაა დუშეთის რაიონის სოფელ ბულაჩაურში, სადაც სტიქიამ მთლიანად გაანადგურა ნათესები, დახოცილია შინაური პირუტყვი, დაზიანებული შენობების სახურავები.
