“გურია ნიუსის” ინფორმაციით, პრესტიჟული ვაკე “ქართული ოცნების” რამდენიმე “ფეისისთვის” იყო საოცნებო. შალვა შავგულიძის კანდიდატურა ზოგიერთი მათგანისთვის, მოულოდნელიც აღმოჩნდა. შალვა შავგულიძესა და დავით საგანელიძეს შორის არჩევანი შავგულიძის სასარგებლოდ გაკეთდა.
“ნაციონალური მოძრაობიდან” შალვა შავგულიძეს, სავარაუდოდ, ეკონომიკის მინისტრის მოადგილე, გიორგი კარბელაშვილი დაუპირისპირდება. გავრცელებული ინფორმაციით, სწორედ მის კანდიდატურას განიხილავს სახელისუფლებო პარტია ვაკეში, სადაც არჩევნების მოგება სააკაშვილისთვის პრესტიჟის საკითხია.
ე.წ. ბეგრაუნდი, რომელიც შალვა შავგულიძეს აქვს, დაწყებული აფხაზეთის ომიდან დამთავრებული გირგვლიანის საქმით, ხელისუფლებისთვის, შესაძლოა, სერიოზული პრობლემა გახდეს.
სანამ ცნობილი ადვოკატი გახდებოდა, შავგულიძე აფხაზეთის ომშიც იბრძოდა. ის და მისი ძმა, დავით შავგულიძე იმ პირველ დესანტში იყვნენ, რომელიც აფხაზეთის ომის დაწყებისთანავე, ფოთიდან ლესელიძეში გადასვეს.
შალვა შავგულიძის სახელს უკავშირდება სტრასბურგის პასუხი გირგვლიანის გახმაურებულ საქმეზე, სადაც მთელი ხელისუფლება დანაშაულის გახსნის ხელშეშლაში იყო მხილებული: “ევროპის სასამართლომ განსაკუთრებული შეშფოთება გამოთქვა იმასთან დაკავშირებით, რომ ხელისუფლების სხვადასხვა შტო – შინაგან საქმეთა სამინისტრო, პროკურატურა, ადგილობრივი სასამართლოები და საქართველოს პრეზიდენტი – ერთობლივად მოქმედებდნენ იმისთვის, რომ ხელი შეეშალათ მართლმსაჯულების აღსრულებისთვის სანდრო გირგვლიანის მკვლელობის შემზარავ საქმეში,” _ ვკითხულობთ სტრასბურგის მიერ გამოტანილ ვერდიქტში.
კიდევ ერთი გახმაურებული საქმე, რომელიც შალვა შავგულიძის სახელს უკავშირდება, ბადრი პატარკაციშვილისა და ტელეკომპანია “იმედის” საქმე გახლავთ, რომლის ბოლომდე მიყვანა შავგულიძემ, დიდი ძალისხმევის მიუხედავად, მაინც ვერ მოახერხა.
ტელეკომპანია “იმედის” მაშინდელი ადვოკატი შალვა შავგულიძე “გურია ნიუსთან” საუბრისას იხსენებს, რომ საქმე მთლიანად მზად იყო სტრასბურგში გასაგზავნად, მაგრამ ტელევიზიის ხელმძღვანელობამ საჩივარს ხელი არ მოაწერა. უფრო მეტიც, ისინი ადვოკატებისგან მოითხოვდნენ, თავად მათ ეთქვათ უარი ადმინისტრაციულ სამართალწარმოებაზე, რაზედაც ადვოკატებისგან კატეგორიული უარი მიიღეს.
“მე და სოსო ბარათაშვილმა ვეებერთელა საჩივარი დავწერეთ, სადაც ჟურნალისტური საქმიანობისთვის ხელის შეშლის გარდა, საუბარი იყო უამრავ სხვა სამართალდარღვევაზეც. მოიცავდა ტელევიზიის მიმართ ადმინისტრაციულ დავებსაც.
საჩივარი ჩაბარდა ტელევიზიის ხელმძღვანელობასაც და სამეთვალყურეო საბჭოსაც. მაშინ უკვე ჯოზეფ კეი ხელმძღვანელობდა ტელევიზიას.
შემდეგ, როგორც ვიცი, ჟურნალისტების მხრიდან რაღაც ინდივიდუალური საჩივრები გაიგზავნა სტრასბურგში.
ადგილობრივი სამართალწარმოებისთვის მაშინ “იმედიდან” არავის მიუმართავს. არც ადმინისტრაციული დავები გაუგრძელებია ვინმეს და არც პროკურატურაში გაუგრძელებიათ ჩივილი იმ მოტივით, რომ საქმე აღძრულიყო.”
ადვოკატი შავგულიძე, ერთ დროს, პროკურატურაშიც მუშაობდა. მისი ბიოგრაფიული მონაცემები ასეთია:
შალვა შავგულიძე დაიბადა 1957 წლის 28 ოქტომბერს თბილისში. დაამთავრა თბილისის, შემდგომ კი მოსკოვის სახელმწიფო უნივერსიტეტების სამართალმცოდნეობის სპეციალობით.
1981-1983 წლებში იყო თბილისის სახელმწიფო უნივერსიტეტის დამნაშავეობის სოციოლოგიის სამეცნიერო-კვლევითი ლაბორატორიის ლაბორანტი.
1988-1991 წლებში მუშაობდა საქართველოს ჯანმრთელობის დაცვის სამინისტროს ჯანდაცვის ეკონომიკისა და მართვის სამეცნიერო-კვლევითი ლაბორატორიის უმცროს მეცნიერ-თანამშრომლად .
1992 წლიდან ის საქმიანობას აგრძელებს საქართველოს გენერალური პროკურატურის სისხლის სამართლის (სახელმწიფო ბრალდების) სამმართველოს პროკურორის რანგში.
1996 წლიდან დღემდე შალვა შავგულიძე საქართველოს ადვოკატთა ასოციაციის ადვოკატია, 1999 წელს მან დააარსა იურისტთა და ადვოკატთა კავშირი “პროცესი” .
ირაკლი ალასანიას პარტიის წევრი, 2010 წელს ადგილობრივი თვითმმართველობის არჩევნებში, კენჭს მთაწმინდის რაიონში იყრიდა. მისი მოწინააღმდეგე “ნაციონალების” კანდიდატი, მამუკა ახვლედიანი იყო. მაშინ, შალვა შავგულიძემ ბრძოლა წააგო.
იმ დროს სადამკვირვებლო ორგანიზაციების მიერ რამდენიმე დასკვნა დაიდო, რომლის მიხედვითაც, მთაწმინდის რაიონში არაერთი დარღვევა იყო დაფიქსირებული.
გავრცელდა ვიდეომასალაც, სადაც პირდაპირ ჩანდა, კოჯრის საარჩევნო უბანში ამომრჩევლებთან ერთად, როგორ შედიოდნენ ნაციონალური მოძრაობის წარმომადგენლები. ისინი იმ ამომრჩევლებს, რომლის ერთგულებაში ეჭვი ეპარებათ, უყურებდნენ, რას შემოხაზავდნენ.
თუმცა, არც საარჩევნო კომისიამ და არც საქალაქო სასამართლომ საჩივრები არ დააკმაყოფილა.
ყოველივე ზემოთქმულის და ვაკელების და სააკაშვილის “ტკბილ” ურთიერთობების გათვალისწინებით, უნდა ვივარაუდოთ, რომ ხელისუფლებას ვაკეში დიდი ჯაფა დაადგება.
“გურია ნიუსის” ინფორმაციით, სააკაშვილმა “ნაცმოძრაობის” ლიდერები სასტიკად გააფრთხილა და უთხრა, რომ ვაკეში წაგება მათი პოლიტიკური კარიერის დასასრული იქნებოდა.
არ არის გამორიცხული, ხელისუფლებამ გიორგი კარბელაშვილის ვაკეში დაყენება გადაიფიქროს და უფრო ძლიერი კანდიდატურა დაასახელოს. სწორედ ამიტომ ელოდებოდნენ ისინი ივანიშვილის კანდიდატების დასახელებას, რათა შემდგომი რეაგირებისა და კანდიდატების შერჩევისთვის მეტი დრო ჰქონოდათ.
