როგორც “ქართული ოცნება – დემოკრატიული საქართველოს” ადამიანის უფლებათა დაცვის კომიტეტის თავმჯდომარემ თედო კობახიზემ “გურია ნიუსს” განუცხადა, თელავის დროებითი მოთავსების იზოლატორში, “ქართული ოცნების” აქტივისტი გიორგი ნატროშვილი 23 ივლისს ბრალდებულად ისე დაიკითხა, რომ ჯერ არ იყო გამოტანილი დადგენილება ბრალდებულად ცნობის შესახებ.
_ საგამოძიებო მოქმედება დამთავრდა 16 საათსა 35 წუთზე, რის გამოც ადვოკატმა დააყენა შუამდგომლობა, რომ ვინაიდან გასული იყო დაკავებულისათვის ბრალდების წარდგენის 24 საათიანი ვადა, შეეწყვიტათ გამოძიება, აღარ განეხორციელებინათ სისხლისსამართლებრივი დევნა და გაენთავისუფლებინათ უკანონოდ დაკავებული.
ზემოაღნიშნულის შემდეგ გიორგი ნატროშვილის მიმართ მართლაც შეწყდა სისხლისსამართლებრივი დევნა და იგი იმავე დღეს, 23 ივლისს, 18:25სთ გაათავისუფლეს დროებითი მოთავსების იზოლატორიდან, როგორც სისხლისსამართლებრივად უკანონოდ დაკავებული, _ განაცხადა თედო კობახიძემ.
23 ივლისსვე, დაახლოებით 5 წუთში, იმავე ფაქტზე, 18:30 საათზე, გურჯაანის პოლიციამ თელავის იზოლატორთან უკვე ადმინისტრაციული სამართალწარმოებით დააკავა გიორგი ნატროშვილი, ხოლო მეორე დღეს 24 ივლისს წარადგინეს გურჯაანის რაიონულ სასამართლოში და ადვოკატების გარეშე 30 დღიანი ადმინისტრაციული პატიმრობა შეუფარდეს.
2012 წლის 22 ივლისს, დაახლოებით 16 საათზე სოფელ – ვაჩნაძიანში ბიძინა ივანიშვილი შეხვდა სტიქიური უბედურებისგან დაზარალებულ მოსახლეობას.
როგორც ნატროშვილი განმარტავს: “ივანიშვილის წასვლიდან რამდენიმე ხანში, მათთან მივიდა გურჯაანის გამგეობაში მომუშავე ქალბატონი, მარინა ჩითინაშვილი, რომელიც შეურაცხყოფას აყენებდა ვაჩნაძიანში შეკრებილ ადამიანებს, გურჯაანის გამგეობის თანოამშრომელს გიორგი ნატროშვილმა სახეზე ერთიანად მიადო ხელი პირზე და სათვალეებზე, რომ დაეტოვებინა ტერიტორია და აღარ გაემეორებინა ის სალანძღავი სიტყვები, რითიც შეურაცხყოფდა “ქართული ოცნების” ლიდერს და იქ შეკრებილ მომსახლეობას.
ზემოაღნიშნულის შემდეგ საჯარო მოსამსახურე დაემუქრა “ქართული ოცნების” მხარდამჭერს და “დაპირდა”, რომ “დააჭერინებდა მის თავს”.
