ქარტია, პრეზიდენტის პრესსამსახურის წარმომადგენლებს ჟურნალისტთა უფლებების და ინტერესების დაცვას თხოვს. სპეციალურ განცხადებაში აღნიშნულია, რომ “დაისვას იმ პირთა პასუხისმგებლობის საკითხი, რომელთაც გადაამეტეს უფლებამოსილებას და ქარტიის წევრ ჟურნალისტებს წაუშალეს გადაღებული ფოტოები”
საქართველოს ჟურნალისტური ეთიკის ქარტიის განცხადებას, ჩვენ უცვლელად გთავაზობთ.
“საქართველოს ჟურნალისტური ეთიკის ქარტია გმობს მისი წევრი ჟურნალისტების, გიორგი გირკელიძისა და ჟანა მეგრელიშვილისათვის, გადაღებული ფოტოების წაშლის ფაქტს.
გურია ნიუსის მიერ დღეს გავრცელებული ინფორმაციით, ამავე მედია საშუალების ჟურნალისტებს გიორგი გირკელიძესა და ჟანა მეგრელიშვილს, რომლებიც ცდილობდნენ ქ. ოზურგეთში საქართველოს პრეზიდენტის ვიზიტის გაშუქებას, პრეზიდენტის დაცვის სამსახურმა წაუშალა გადაღებული ფოტოები. ფოტოების წაშლის მიზეზად ჟურნალისტებს განემარტათ, რომ შეხვედრა იყო დახურული.
ქარტია აღნიშნავს, რომ სამოქალაქო საზოგადოების და მედიის წარმომადგენლების მუდმივი პროტესტის მიუხედავად, ჟურნალისტების მიმართ საჯარო მოხელეთა მხრიდან უკანონო ქმედებების განხორციელება დღითი დღე იზრდება და ინტენსიურ სახეს იძენს. ქარტია ხაზგასმით აღნიშნავს, რომ ყოვლად დაუშვებელია ჟურნალისტის მიერ მოპოვებული მასალის წართმევა და განადგურება.
ქარტია მოუწოდებს საქართველოს პრეზიდენტის პრესს სამსახურის წარმომადგენლებს დაიცვან ჟურნალისტთა უფლებები და ინტერესები. ასევე, დაისვას იმ პირთა პასუხისმგებლობის საკითხი, რომელთაც გადაამეტეს უფლებამოსილებას და ქარტიის წევრ ჟურნალისტებს წაუშალეს გადაღებული ფოტოები.”
