_ უკვე ერთ კვირაზე მეტია, ძაბვის ვარდნის გამო, უწყვეტი კვების ბლოკიც ვერ შველის კომპიუტერებს. ელექტროენერგიის “თამაში” დილის საათებში იწყება და საღამომდე გრძელდება.
ჩვენ რამდენჯერმე დავუკავშირდით “ენერგო-პრო ჯორჯიას” ოზურგეთის სერვის-ცენტრის მენეჯერს, გია ნაკაიძეს. მან გვითხრა, რომ ჭავჭავაძის ქუჩაზე მიმდინარე სარემონტო სამუშაოების დროს ელექტროშემდუღებელს იყენებენ და მშენებლობა ხომ არ შეჩერდებაო და გვირჩია, “ენერგო-პრო ჯორჯიასთვის” წერილობით მიგვემართა.
ამის შემდეგ ოზურგეთის მუნიციპალიტეტის გამგეობას მივმართეთ, რომლისგანაც იგივე პასუხი მივიღეთ. ამ ფაქტით შეწუხებულია მოსახლეობაც.
_ ეს დაყვედრებული “24-საათიანი დენი” გვაქვს, მაგრამ 100 კილოვატზე ერთი კილოვატით მეტიც რომ დახარჯო, უკვე ისედაც სამჯერ გაზრდილი დენის საფასურზე, კიდევ უფრო მომატებულ თანხას გადაგახდევინებენ. თუ “მადა ჭამაში” მოგივიდა და 200 კილოვატსაც გადააცილე, მაშინ დენის ვალიდან ვეღარ ამოხვალ. 100 კილოვატი ამ სიცხეში მარტო მაცივარს არ ჰყოფნის, ტელევიზორი? ნათურა? ამას გარდა, დენის არც ერთი პარამეტრი _ ძაბვა, ძალა, სიხშირე, სტანდარტს არ შეესაბამება. ძაბვის მერყეობის ამპლიტუდა იმდენად მაღალია, რომ განადგურებით ემუქრება ძვირადღირებულ საყოფაცხოვრებო ელექტროხელსაწყოებს, _ გვითხრა ჭავჭავაძის ქუჩაზე მცხოვრებმა, პროფესიით ინჟინერმა ანზორ დოლიძემ.
მისივე თქმით, ასეთ დენში სახელმწიფო, თუ მთლად “ფაჩიკოს გარმონივით” არ არის მოშლილი, მოქალაქეს საფასურს არ ახდევინებს _ აქეთ გიხდის ბოდიშს გაუმართავი მუშაობის გამო: _ მთელი მოსახლეობა ყოველი თვის 20 რიცხვის შემდეგ, ელექტრომრიცხველებთან ტრიალებს, დენის ხარჯის 100 კილოვატთან მიახლოების შემთხვევაში, დენს რთავს და მომავალი თვის დაწყებამდე ბნელში ზის. ამ საარჩევნო ბატალიების დროს, ხელისუფლების უმაღლესი თანამდებობის პირების ბაგეთაგან იფრქვევა ცრუ დაპირებათა კასკადი. ამას არ ჯობდა, ეს სულელური 100 კილოვატიანი ლიმიტი გაეუქმებინათ? ცრუ დაპირებებით, ვინც გინდათ, ის დააჯერეთ. გურულები კი არ ტყუვდებიან. თქვენ გურულები თქვენზე მეტად აბდლები ხომ არ გგონიათ?!
იქნებ, ვინმემ მიპასუხოს: სანამ შეიძლება ჩვენი მოსახლეობა ასე, პავლოვის საექსპერიმენტო ძაღლივით კისერწაგრძელებული, შეშინებული იდგეს ელექტრომრიცხველებთან, რომ დენის ხარჯმა 100 კილოვატს არ გადააჭარბოს? _ კითხულობს ანზორ დოლიძე.
