გადამოწმების შემდეგ, აღმოჩნდა, რომ “კარდაკარის” რამდენიმე მონაწილის ანგარიში დაყადაღებულია ზუგდიდშიც, “პროკრედიტ ბანკში”, სადაც მათ ამ სანქციის მიზეზი არ განუმარტეს. “პროკრედიტ ბანკის” ზუგდიდის ფილიალის წარმომადგენლებმა დაზარალებულებს უთხრეს, რომ მხოლოდ 10 დღის შემდეგ გააცნობდნენ კონკრეტულ მიზეზს. ჯერჯერობით მათ ფულადი სანქციის ოდენობის შესახებ არაფერი იციან.
“გურია ნიუსი” ამ ფაქტთან დაკავშირებით პარტია “ქართული ოცნება _ დემოკრატიული საქართველოს” თავმჯდომარეს, მანანა კობახიძეს დაუკავშირდა.
მანანა კობახიძე: _ აბსოლუტურად გაუგებარია, რა ხდება. არ ვიცი, რა შეიძლება იყოს ამის საფუძველი, ეს არის ხალხის ხელფასი. “კარდაკარი” არის ის ღონისძიება, გამოკითხვის ფორმა, რასაც ატარებს ყველა პოლიტიკური პარტია საარჩევნო კამპანიის პროცესში. ეს არის ჩვენი უფლება, პოლიტიკურ კოალიციას ჰქონდა ამისი უფლება და შესაბამისად, ადამიანების შრომა, რა თქმა უნდა ხელშეკრულებების საფუძველზე ხელფასით უნდა ანაზღაურდეს. ეს არის მათი კუთვნილი ხელფასები, რაც მათ ამ შრომისთვის მიიღეს.
მე ადმინისტრაციული აქტი არ მინახავს, რომ გავაკეთო შეფასება, თუ რა საფუძვლითაა ეს ანგარიშები დაყადაღებული. შესაბამისად, ეს გადაწყვეტილებაც ისეთივე უკანონო პოლიტიკური გადაწყვეტილებაა, როგორც ყველა ის ჯარიმა, რომელიც კონტროლის პალატამ კოალიცია “ქართული ოცნების” სუბიექტების თუ კონკრეტული ფიზიკური პირების მიმართ განახორციელა. ეს არის სრული პოლიტიკური ანგარიშსწორება ჩვენი მხარდამჭერების მიმართ. ეს არ არის სამართლებრივი გადაწყვეტილება და შესაბამისად, რეაგირებას მოვახდენთ მას შემდეგ, რაც გავერკვევით სიტუაციაში, რა ხდება.
_ დაახლოებით იგივე ვითარებაა ზუგდიდშიც, სადაც “კარდაკარის“ ოთხმა მონაწილემ აღმოაჩინა, რომ გაყინული იყო მათი პირადი ანგარიშები როდესაც ამაზე ახსნა-განმარტება მოსთხოვეს “პროკრედიტ ბანკს“, იქ უთხრეს, რომ 10 დღეში გასცემდნენ პასუხს.
_ ეს არის დაუშვებელი, ბანკი ვალდებულია, ნებისმიერ შემთხვევაში, თავის კლიენტს მის ანგარიშთან დაკავშირებით ინფორმაცია მიაწოდოს და შესაბამისად, გასცეს ეს ინფორმაცია მოთხოვნისთანავე. ის ფაქტი, რომ ისინი ამაში ითხოვენ 10 დღეს, არის აბსოლუტურად კანონსაწინააღმდეგო. პირად ანგარიშთან მიმართებაში, ადამიანს შეუძლია მიიღოს ინფორმაცია ტელეფონითაც კი. ფაქტია, რომ ბანკიც, ამ შემთხვევაში, მოქმედებს გარკვეული პოლიტიკური დაკვეთით.
ჩემთვის ცოტა წარმოუდგენელია, რომ პირად ანგარიშთან დაკავშირებით 10 დღე იყოს საჭირო. მსგავსი რამ აქამდე არც ერთ ბანკში არ ყოფილა, რა თქმა უნდა იმ ბანკებში, რომელთანაც მქონია შეხება. შესაბამისად, მიმაჩნია რომ ბანკი პოლიტიკური გადაწყვეტილებების და ზეწოლების მსხვერპლია.
_ როგორც ზუგდიდის “ქართული ოცნების“ იურიდიულ სამსახურში გვითხრეს, ანგარიშების გაყინვა სასამართლოს გადაწყვეტილების საფუძველზე მოხდა, თუმცა, უზენაესი სასამართლოს პრესსამსახური (ზუგდიდის “ქართული ოცნების“ იურიდიულ სამსახურის განმარტებით), ასეთ გადაწყვეტილებას ან განჩინებას არ ადასტურებს. ისინი ამბობენ რომ, არ აქვთ მსგავსი ინფორმაცია.
_ ნებისმიერ შემთხვევაში, ბანკში ყადაღის შესახებ გადაწყვეტილება უნდა მისულიყო. თუ ამბობენ, რომ ყადაღა ადევს საბანკო ანგარიშს, სავარაუდოდ, ეს უნდა ყოფილიყო სასამართლოს დადგენილებით ან განჩინებით, ამიტომ უზენაესი სასამართლოს, რომელიც უნდა ფლობდეს ყველა ინფორმაციას რაც ხდება ქვედა ინსტანციებში, უნდა გაეცა ეს ინფორმაცია.
ვიმეორებ, რომ თვითონ ბანკს აქვს ვალდებულება პირად ანგარიშთან დაკავშირებით, ეს იქნება ყადაღა თუ რაიმე სხვა სახის შეზღუდვა ანგარიშით სარგებლობასთან მიმართებაში, კლიენტს მიაწოდოს ინფორმაცია დაუყოვნებლივ. შესაბამისად, ეს სასამართლოს განჩინებით არის თუ პროკურატურის დადგენილებით, თუ რა ტიპის აქტია ბანკში მისული, ნებისმიერ შემთხვევაში უნდა იყოს საჯარო, თუ დოკუმენტს არ ადევს გრიფით საიდუმლო, რაც ამ შემთხვევაში გამორიცხულია, რადგან ეხება პირად, სახელფასო ბარათს.
მაგრამ, თუ სასამართლოს არ მიუღია არანაირი გადაწყვეტილება ამასთან დაკავშირებით, ცხადია მხოლოდ იმ შემთხვევაში შეიძლება უზენაესი სასამართლო არ ფლობდეს არანაირ ინფორმაციას
_ როგორი იქნება ამასთან დაკავშირებით “ქართული ოცნების“ პოზიცია და რა გადაწყვეტილებას მიიღებთ ამ ადამიანებთან მიმართებაში, რომლებიც შოკში ჩავარდნენ, როცა ამხელა ჯარიმა დახვდათ. ერთ-ერთი მათგანი, ლანჩხუთში, ბანკიდან პირდაპირ რეანიმაციაში გადაიყვანეს.
_ რა თქმა უნდა, ჩვენ იურიდიულ-სამართლებლივ დახმარებას გავუწევთ ამ ადამიანებს, თუკი რაიმე შეიძლება სამართლებრივად გაკეთდეს ამ ქვეყანაში. რაც მთავარია, უნდა მოხდეს სწრაფი რეაგირება საერთაშორისო ორგანიზაციების მხრიდან, იმიტომ რომ ეს არის პირდაპირ პოლიტიკური ზეწოლა და ანგარიშსწორება ჩვენი მომხრეების მისამართით. ამ რეაგირებას, რა თქმა უნდა, ჩვენ მოვახდენთ, მაგრამ რეალობა ისაა, რომ შიდა კანონმდებლობით დღეს ძალიან რთულია რაიმე კანონიერ გადაწყვეტილებას მიაღწიო. თუმცა, მაინც იმედს არ ვკარგავ, რომ ეს ხელისუფლება გონს მოეგება და ასეთი ტიპის პოლიტიკური ანგარისშწორებისგან ხელს აიღებს.
