_ ეს ინფორმაცია სოფრომაძის თანაპარტიელებმა პირველად ფეისბუქის საშუალებით გაავრცელეს.
თანაპარტიელები და დაკავებულის ადვოკატი გელა ნიკოლაიშვილი სოფრომაძის ადგილსამყოფელის დადგენას 7 საათის განმავლობაში ცდილობდნენ. მას შემდეგ კი რაც 10:30 წუთზე პარტიამ საქმის კურსში ჩააყენა მედია და სპეციალური ბრიფინგი დაგეგმა, ზაზა სოფრომაძემ მეუღლეს დაურეკა და აცნობა, რომ იყო ცოცხალი და უვნებელი იყო.
“ჩვენ ახლაც არ ვიცით ის რეალურად სად იმყოფება”, _ განაცხადა დღეს გამართულ საგანგებო ბრიფინგზე პარტიის თავმჯდომარე ნინო ბურჯანაძემ.
მოგვიანებით გავრცელდა ინფორმაცია, რომ ზაზა სოფრომაძე, რომელიც დაკავების მომენტისითვის პრობაციონერი იყო, პროკურატურას მოწმის სახით ჰყავდა “დაბარებული.”
პარტიის ლიდერი ნინო ბურჯანაძე და ადვოკატი გელა ნიკოლაიშვილი ვარაუდობენ, რომ სოფრომაძის დაკითხვა სოციალური დაზღვევის ერთიანი სახელმწიფო ფონდის ხელმძღვანელის თანამდებობაზე მისი მუშაობის პერიოდს უნდა უკავშირებოდეს. მათი ინფორმაციით სოფრომაძის დაკავებამდე სამართალდამცავმა ორგანოებმა მისი ყოფილი თანამშრომლების დაკავება დაიწყეს, რათა მათ ყოფილი ხელმძღვანელის საწინააღმდეგო ჩვენება მიეცათ.
“ზაზა სოფრომაძის დაკავება არის პირდაპირი ზეწოლის განხორციელება ჩვენს პოლიტიკურ პარტიაზე. ჩვენ ვიცით ძალიან კარგად, რომ ხელისუფლებას და საქართველოში ძალიან ბევრ ადამიანს არ უნდა, რომ ჩვენმა პარტიამ არჩევნებში მონაწილეობა მიიღოს,” _ განაცხადა ნინო ბურჯანაძემ დღეს პარტიის ოფისში გამართულ ბრიფინგზე.
თანაპარტიელის დაკავებამ ნინო ბურჯანაძეს 1937 წელი გაახსენა, როდესაც ადამიანებს ღამით, ყველასგან უჩუმრად აპატიმრებდნენ.
“ჩვენ ვცხოვრობთ სწორედ რომ ნეობოლშევიკურ ქვეყანაში, სადაც 37 წლის მსგავსად დილის 4 საათზე აკითხავენ ადამიანებს რომლებიც არ იმალებიან, ყოველდღიურად დადიან სამსახურში, არიან ჩვეულებრივი მოქალაქეები და რომლებიც მზად არიან ხელისუფლების და შესაბამისი სამართალდამცავი ორგანოების გამოძახებისთანავე მივიდნენ და მათთვის საინტერესო ინფორმაცია მიაწოდონ ყოველგვარი სპეცოპერაციების, ყოველგვარი დილით სახლში შევარდნის და ადამიანების დატერორების გარეშე,” _ განაცხადა დემოკრატიული მოძრაობის ლიდერმა ბრიფინგზე.
