როგორც ლანჩხუთის მუნიციპალიტეტის ჩიბათის თემის ტერიტორიული ორგანოს მთავარმა სპეციალისტმა რობინზონ ჩხაიძემ გვითხრა, პრიორიტეტების გამოსავლენად მოსახლეობა სათითაოდ გამოიკითხა. “ჩიბათის რწმუნებულის დავალებით, მისმა თანამშრომლებმა კარდაკარ დაიარეს სოფელი, გაარკვიეს რა პრობლემები აწუხებდა ხალხს და გადაწყდა მათი მოგვარებისთვის 2012 წელს გამოყოფილი თანხა _ 42 ათასი ლარი გახარჯულიყო,” _ ამბობს ჩხაიძე.
როგორც თითქმის ყველა სოფელს საქართველოში, ჩიბათსაც აწუხებს უგზოობა, უწყლობა, მოუწესრიგებელი საყანე ფართობები, გაუნათებელი შიდა ქუჩები და ა.შ. ხელისუფლებამ ამ პრობლემის მცირე ნაწილის მოგვარება შეძლო, მაგრამ საერთო სურათი მაინც მძიმეა.
თითქმის ყველა უბანში მოუწესრიგებელია გზები, ბევრგან მოსახლეობას არ აქვს წყალი. “ამ პრობლემების მოგვარებას ახლა აპირებს ხელისუფლება,” _ გვარწმუნებს მთავარი სპეციალისტი.
2012 წლის შვიდი თვის განმავლობაში “სოფლის მხარდამჭერი პროგრამის” ფარგლებში შეიღობა ჩიბათის ერთ-ერთი უბნის _ ჭალის სასაფლაო, რაშიც 2 476 ლარი დაიხარჯა, სასაფლაოსთან მისასვლელი გზის შეკეთება კი 3 732 ლარი დაუჯდა სახელმწიფოს. შეკეთებაში იგულისხმება გზის საკმაოდ მცირე მონაკვეთის მოხრეშვა, მაგრამ გზა მაინც ძნელად მისადგომია. გარდა ამისა, 7 572 ლარი დაჯდა ჭალაში საყანე ფართობების შეღობვა და ლაბახოს მოწყობა.
ჩიბათის ტერიტორიული ერთეულის მთავარმა სპეციალისტმა რობინზონ ჩხაიძემ თავად იკისრა ჩვენი გიდობა და უკვე დამთავრებული პროექტების დასათვალიერებლად გაგვყვა. მისი თქმით, “ჭაჭახუნას” და “მერეს” უბნებში ხიდები გაკეთდა და ამით ძალზე მნიშვნელოვანი პრობლემები მოუგვარდა მოსახლეობას. რეალურად, ეს “ხიდები” აღმოჩნდა მცირე გამტარიანობის მილხიდები, რომლებიც წვიმების შემდეგ ადიდებული შიდა არხების წყლებს გაატარებს. ამ პროექტზე გახარჯული თანხა 1560 ლარს შეადგენს. სამუშაოები აწარმოვა ინდმეწარმე ელგუჯა ზენაიშვილმა. რობინზონ ჩხაიძემ ისიც აღნიშნა, რომ გამოყოფილი თანხა საკმარისი არ აღმოჩნდა და ინდმეწარმემ საკუთარი ფული დაამატა სამუშაოების შესასრულებლად(?!).
ამ “საყოველთაოდ განათებულ” ქვეყანაში ჩიბათი საკმაოდ ჩაბნელებული სოფელი აღმოჩნდა. სოფლის ცენტრის გარდა, თითქმის არც ერთ უბანში არ არის გაკეთებული გარეგანათება. ხალხის ერთ-ერთი მოთხოვნა გარე განათების მოწყობაც იყო. “მერეს” უბანში განათება 300 მეტრის მანძილზეა გაკეთებული. 2-კილომეტრიან მონაკვეთის განათება ახლო მომავალში იგეგმება. ამ უბანში ძალზე ავარიულია გზაც, მაგრამ რატომღაც მისი შეკეთება არცერთ ადგილობრივს “არ მოუნდომებია”.
ლანჩხუთის მუნიციპალიტეტის საკრებულოს აპარატიდან გამოთხოვილ დოკუმენტაციაში აღნიშნულია, რომ ამ უბნის გასანათებლად 10 054 ლარია გამოყოფილი. სამუშაოები ჯერაც არაა დაწყებული.
ასევე, გარე განათების გაკეთება მოუთხოვია მოსახლეობის უმეტეს ნაწილს “ჩახვაძეების”, “ჭაჭახუნას” და სულაბერიძეების უბნებში. მთავარი სპეციალისტი, ჩვენთან საუბარში აღნიშნავს, რომ ეს სამუშაოები უახლოეს მომავალში დაიწყება, ამ სამუშაოებში გასახარჯი თანხების რაოდენობამ ერთობლიობაში 7898 ლარი შეადგინა.
პროექტის ფარგლებში ნაწილობრივ შეიღობა ქვემო ჩიბათს სასაფლაო. შეიღობა მხოლოდ დაზიანებული მონაკვეთები. მთელი სასაფლაოს კაპიტალურად შეღობვას ეს მცირე თანხები ვერ უზრუნველყოფდა, -აღნიშნა ჩხაიძემ. სასაფლაოს შეღობვა 2252 ლარი დაჯდა.
ჩიბათელებისთვის ერთ-ერთ მთავარ გადაუწყვეტელ პრობლემად რჩება წყალგაყვანილობა. სოფლის ბევრ უბანს არ მიეწოდება მუდმივი წყალი. სოფლის დახმარების პროგრამის ფარგლებში მოსახლეობის მთავარი მოთხოვნა წყლის სისტემის მოწესრიგება იყო, მაგრამ განვლილი შვიდი თვის განმავლობაში ხელისუფლებამ ეს ვერ მოახერხა. კვლავაც იგეგმება ქვემო ჩიბათში უწყლოდ დარჩენილ მოსახლეობამდე წყლის მაგისტრალის მიყვანა, “მერეს” უბანში წყალგაყვანილობის ქსელის მოწყობა. ზემო ჩიბათში, “დაფნარა” უბანში წყლის მილების შეცვალა 850 მეტრის მონაკვეთზე. ყველა ეს სამუშაო ჯერჯერობით შეუსრულებელია, მაგრამ ხელისუფლებას, რომელსაც ასეთი პროექტების გახორციელება საარჩევნოდ უფრო “ეხერხება”, ჯერ კიდევ დარჩა რამდენიმე თვე მათ გასახორციელებლად.
ამ ეტაპზე, ბოლომდე შესრულებულია სასაფლაოების და საყანე ფართობების შეღობვის სამუშაოები და ორ უბანში გაკეთებულია მილ-ხიდები.
2011 წლის სოფლის პროგრამის ფარგლებში, მთელი ჩიბათის მოსახლეობის ერთსულოვანი გადაწყვეტილებით, აშენდა საბავშვო ბაღი, მასზე 43 332 ლარი დაიხარჯა. საზაფხულო არდადეგების გამო, ჩვენ ვერ მოვახერხეთ ინტერიერის დათვალიერება, გარედან კი შენობა საკმაოდ კარგ შთაბეჭდილებას ტოვებს.
