დახმარება გათვალისწინებულია იმ სოფლებისთვის, სადაც მრავალრიცხოვანი მოსახლეობაა. მარტივი ლოგიკის მიხედვით, მრავალრიცხოვანი მოსახლეობა ბევრ ამომრჩეველს ნიშნავს.
30 ივლისს, ოზურგეთის მუნიციპალიტეტის საკრებულოს სხდომაზე “გურია ნიუსისთვის” ცნობილი გახდა, რომ საქართველოს პრეზიდენტის 2012 წლის 26 ივლისის # 26 განკარგულება “საქართველოს პრეზიდენტის სარეზერვო ფონდიდან თანხის გამოყოფის შესახებ” შესაბამისად, ოზურგეთის მუნიციპალიტეტს გამოეყო 500 000 ლარი სხვადასხვა პროექტის გასახორციელებლად:
ა) მერია-კონჭკატის გზის მოხვნა-დაგრეიდერების და გამაგრებითი სამუშაოების შესასრულებლად _ 140000 ლარი.
ბ) მრავალბინიანი სახლების სახურავების რემონტი (დაბა ლაითურში, ნარუჯაში, ნასაკირალში და ურეკში) 102 000 ლარი.
გ) დაბა ნასაკირალის გზის სარემონტო სამუშაოებისთვის 160000 ლარი
დ)ქალაქის ქუჩის (იოანე პეტრიწის ქუჩა) რემონტი 20000 ლარი
ე) მრავალბინიანი სახლების ეზოების კეთილმოწყობა (სამთო ქიმიის #6, 8, 10 სახლების ეზოები).
საკრებულოს ოპოზიციონერი დეპუტატი ლელა ნაცვალაძე მიიჩნევს, რომ ეს თანხები საბოლოოდ საარჩევნო ხარჯებისთვის იქნება მიმართული და ყველაფერი ეს “გასაპრავებლად” სჭირდებათ, რასაც სასაცილოდ მიიჩნევს საკრებულოს თავმჯდომარე ალეკო მამეშვილი. იგი ნაცვალაძეს პატიჟებს, გაჰყვეს იმ ქუჩებში ნამუშევარის სანახავად, რომელთა მოასფალტებაც მიმდინარეობს.
უკანასკნელ პერიოდში, საქართველოს პრეზიდენტი ოზურგეთს ხშირად სტუმრობს, რასაც თან ახლავს აქტიური შეხვედრები წინასწარ შეკრებილი მოსახლეობის იმ ნაწილთან, რომელთა უმეტესობა ან მათი ნათესავები საჯარო სამსახურებში მუშაობენ. პრეზიდენტი, ბოლო ვიზიტების დროს, ესტუმრა ანასეულის ჩაის ფაბრიკას, ლაითურის მოცვის პლანტაციებს, დაბა ურეკს, შეხვდა ბახვის მოსახლეობას. საზოგადოებაში ღიად საუბრობენ იმაზე, რომ ეს დაუცხრომელი ვიზიტები გურიაში, “ქართული ოცნების” აქციის შემდეგ გახშირდა.
