დადგენილება თბილისელებს აივნის ამოშენების, კონდენციონერის მონტაჟის და ფანჯრების გამოცვლის საკითხის არქიტექტურულ სამსახურთან შეთანხმებას ავალდებულებდა. ყველაზე დიდი უკმაყოფილება ფანჯრების გამოცვლასთან დაკავშირებულმა ნებართვამ გამოიწვია, რადგან ეს პროცესი ისედაც დიდ ხარჯებთანაა დაკავშირებული და ბიუროკრატიული ბარიერი და დამატებითი ხარჯები პროცესს კიდევ უფრო ართულებდა.
სოციალურ ქსელებსა თუ პირად საუბრებში თბილისელები მერიის არქიტექტურულ სამსახურთან დაკავშირებულ სირთულეებზე საუბრობენ. ამბობენ, რომ ფანჯრის გამოცვლის ნებართვის მისაღებად უზარმაზარ რიგში უწევთ დგომა; ამას ემატება ხარჯი ფოტომონტაჟისათვის, რომლის წარდგენაც არქიტექტურულ სამსახურში სავალდებულოა. ფოტომონტაჟი სპეციფიურ ცოდნას მოითხოვს, რის გამოც, მერიის არქიტექტურის სამსახური თავად გირჩევთ, რომელ ფირმას მიმართოთ დახმარებისათვის, ეს “დახმარება” კი დაახლოებით 100 ლარი ღირს.
“გურია ნიუსი” შეეცადა გაერკვია, რა შემთხვევაშია საჭირო სპეციალური ნებართვა ფანჯრის გამოცვლისთვის და რომელ უბნებზე ვრცელდება ეს შეზღუდვა.
ფირმები, რომლებიც მეტალოპლასტმასის კარ-ფანჯრების დამზადება-მონტაჟს ახორციელებენ, მერიის სპეციალურ ნებართვაზე ყურადღებას დიდად არ ამახვილებენ. ფირმა”გეო-ევრო”, რომელიც თბილისის ცენტრალურ უბანში მდებარეობს, “გურია ნიუსის” კორესპონდენტს უპრობლემოდ სთავაზობს ფანჯრების შეცვლას,
“არანაირი ნებართვა არ გვჭირდება; მოვალთ, ავზომავთ და ჩავაყენებთ.”
ფირმა “დიო” გვირჩევს, საკითხი მერიის შესაბამის სამსახურს შევუთანხმოთ, მით უმეტეს, თუ ძველი თბილისის უბანში ვაპირებთ ფანჯრების შეცვლას.
“თუ სახლი, სადაც ცხოვრობთ, ძველ თბილისში არ დგას და კულტურული მემკვიდრეობის ძეგლი არ არის, მაშინ პრობლემა არ შეგექმნებათ,” _ უთხრეს “დიოში” კორესპონდენტს.
ფირმა “თაია”-ში აცხადებენ, რომ აქამდე ფანჯრების გამოცვლასთან დაკავშირებით პრობლემა არ ჰქონიათ.
ელგუჯა. ს, რომელსაც მეტალოპლასტმასის საამქრო აქვს თბილსის გარეუბანში, გვეუბნება, რომ არანაირი ნებართვა არ სჭირდება და “როცა გვინდა და სადაც გვინდა, ფანჯრებს იქ შეგვიცვლის”.
ელგუჯა ს.-ს ვუხსნით, რომ ჯერ ფანჯრის ზომაა შესამცირებელი და ამისათვის მერიისგან ნებართვას ველოდებით.
“რად გინდა ნებართვა?! მოვალთ და ამოვაშენებთ. ეგრე ვაკეთებთ, მაგრამ პრობლემა არ ყოფილა. მთავარია, მეზობელმა არ ჩაგიშვას,” – გვპასუხობს ბატონი ელგუჯა.
“გურია ნიუსი” თბილისის არქიტექტურის სამსახურს ესაუბრა და გაარკვია, რომ ფანჯრის შეცვლას არანაირი ნებართვა არ სჭირდება, თუ არ იცვლება მისი ფორმა და დიზაინი. შეზღუდვა მხოლოდ ძველი თბილისის უბანზე ვრცელდება, რომელიც “განსაკუთრებული უბანია და ყველაფერი მერიასთან შეთანხმებით უნდა გაკეთდეს.”
თბილისის არქიტექტურის სამსახურში აცხადებენ, რომ ძველ თბილისში ფანჯრების გამოსაცვლელად ნებართვა სჭირდება როგორც მრავალსართულიან, ასევე კერძო სახლში მაცხოვრებელს, მნიშვნელობა არა აქვს ფანჯრის მასალას ცვლის, თუ ფანჯრის ფორმას. ნებართვა ყველა შემთხვევაშია საჭირო. სათანადო საბუთების წარდგენის შემდეგ, ძველი თბილისის მაცხოვრებელს მერიისგან სასურველი თანხმობის მოლოდინში 10- დღიანი ლოდინი მოუწევს.
ფანჯრის გადიდების, შემცირების ან ამოშენების შემთხვევაში, მერიის ნებართვა თბილისის ყველა უბნისთვის სავალდებულოა.
თუ თქვენ რომელიმე გარეუბანში მე-16-ე სართულზე ცხოვრობთ და გგონიათ, რომ თქვენი ფანჯრის ამოშენებას ვერავინ შეამჩნევს, ცდებით. მერიის არქიტექტურის სამსახური გირჩევთ, ნუ გარისკავთ, რადგან კანონის დარღვევისთვის 10 ათასლარიანი ჯარიმის გადახდა მოგიწევთ!
მერიას ვერაფერს გამოაპარებთ, რადგან ზედამხედველობის სამსახურის თანამშრომლები უბან-უბან დადიან და გულდასმით აკვირდებიან ყველა ფანჯარას; მათ ინფორმაციას მოქალაქეებიც აწვდიან – “გურია ნიუსის” ინფორმაციით, მერიის სათანადო სამსახურს, სწორედ მეზობლები აწვდიან “ღირებულ ინფორმაციას”.
