განსაკუთრებული შეზღუდვები უწესდებათ ადგილობრივი თვითმმართველობის ორგანოებს. მათ წინაასაარჩევნო პერიოდში, საჭიროების შემთხვევაში მოუწევთ არა მარტო თვითმმართველობის შენობის დათმობა მათთვის არასასურველი პოლიტიკური პარტიისათვის, არამედ ამ პარტიებისათვის ხელისშეწყობა, რომ მათ საარჩევნო აგიტაცია ექსცესების გარეშე ჩატარდეს.
პირველ რიგში, სახელმწიფო და ადგილობრივი თვითმმართველობის ორგანოების საჯარო მოხელეებს, ეკრძალებათ წინასააარჩევნო აგიტაციიაში მონაწილეობა როდესაც ისინი უშუალოდ ასრულებენ სამსახურეობრივ ფუნქციას.
ხოლო არასამუშაო საათებში, როდესაც მოხელე ჩართული იქნება წინასაარჩევნო აგიტაციაში, მას კანონი უკრძალავს თანამდებობრივი და სამსახურებრივი მდგომარეობის გამოყენებას ისეთი მოქმედებებისათვის, როგორიცაა:
სამსახურებრივად დაქვემდებარებული ან სხვაგვარად დამოკიდებული პირის ჩაბმა ისეთ საქმიანობაში, რომელიც ხელს უწყობს კანდიდატის წარდგენას ან/და არჩევას;
სახელმწიფო ხელისუფლების ან ადგილობრივი თვითმმართველობის ორგანოს მიერ დაფინანსებული სამსახურებრივი მივლინებების დროს ხელმოწერების შეგროვება და წინასაარჩევნო აგიტაციის გაწევა;
წინასაარჩევნო აგიტაციის გაწევა სამსახურებრივი ფუნქციების შესრულებისას.
(ამ მუხლის პირველი პუნქტის “გ” ქვეპუნქტით გათვალისწინებული შეზღუდვა არ მოქმედებს ამ კანონით განსაზღვრულ პოლიტიკური თანამდებობის პირებზე, აგრეთვე იმ შემთხვევაზე, როცა ხდება ტელერადიომაუწყებლობის მიერ წინასაარჩევნო აგიტაციისათვის გამოყოფილი დროის გამოყენება.)
გარდა ამისა, საარჩევნო აგიტაციაში მონაწილე პირებს ეკრძალებათ სახელმწიფო ხელისუფლების და ადგილობრივი თვითმმართველობის ორგანოების მიერ, აგრეთვე იმ ორგანიზაციების მიერ, რომლებიც ფინანსდებიან სახელმწიფო ბიუჯეტიდან, დაკავებული შენობების გამოყენება იმ შემთხვევაში , თუ სხვა საარჩევნო სუბიექტს არა აქვს ამავე და ანალოგიური დანიშნულების შენობების იმავე პირობით გამოყენების შესაძლებლობა.
აგრეთვე იკრძალება სახელმწიფო ხელისუფლების დაწესებულებებისათვის ან ადგილობრივი თვითმმართველობის ორგანოებისათვის განკუთვნილი საკომუნიკაციო საშუალებების, საინფორმაციო მომსახურებისა და სხვადასხვა სახის ტექნიკის გამოყენება; აგრეთვე, სახელმწიფო ხელისუფლების ან ადგილობრივი თვითმმართველობის ორგანოების საკუთრებაში არსებული სატრანსპორტო საშუალებების უსასყიდლოდ ან შეღავათიანი პირობებით გამოყენება.
საარჩევნო კოდექსი მიუთითებს რომ ეს აკრძალვა არ ვრცელდება საქართველოს პრეზიდენტის, პარლამენტის წევრის, პრემიერ-მინისტრის , საქართველოს მთავრობის სხვა წევრების, მათი მოადგილეების , აჭარისა და აფხაზეთის ავტონომიური რესპუბლიკების უმაღლესი წარმომადგენლობითი ორგანოების და ამ ორგანოთა წევრების სამსახურეობრივ ავტომანქანების გამოყენებაზე.
გარდა ამისა არჩევნების დანიშვნის დღიდან არჩევნების შედეგების შეჯამებამდე აკრძალულია ისეთი პროექტების განხორციელება, რომლებიც მანამდე არ იყო გათვალისწინებული სახელმწიფო/ადგილობრივ ბიუჯეტში, ასევე იმ საბიუჯეტო პროგრამების ზრდა, რომლებიც არჩევნებამდე გათვალისწინებული იყო ბიუჯეტით, არაგეგმური ტრანსფერების ინიცირება ან გეგმური ტრანსფერის ზრდა ადგილობრივ ბიუჯეტში. ამ წესის დარღვევის შემთხვევაში უფლებამოსილ პირს შეუძლია მიმართოს სასამართლოს და მოითხოვოს ხარჯების შეჩერება.
აკრძალულია ადგილობრივი თვითმმართველობის ორგანოს, პოლიციისა და პროკურატურის ხელმძღვანელ თანამდებობის პირთა საკადრო გადაადგილება, გარდა მათი უფლებამოსილების ვადის გასვლის ან/და მათ მიერ კანონის დარღვევის შემთხვევებისა.
