(გურია ნიუსი, ჩოხატაური) _ 25 იანვარს, დილით, ჩოხატაურის მუნიციპალიტეტის გამგეობაში სოფელ ბურნათის 20-მდე მცხოვრები მივიდა, რომელთა შვილები ჩოხატაურის #I საჯარო სკოლაში სწავლობენ. როგორც ისინი ამბობენ, მოსწავლეებს ახალი სემესტრის დაწყებისთანავე პრობლემა შეექმნათ, რადგან ავტობუსის რეისი, რომლითაც სოფლიდან ბავშვები ჩამოდიოდნენ, დაბაში, გააუქმეს.
მოსწავლეთა მშობლებს შეხვდნენ მუნიციპალიტეტის საკრებულოს თავმჯდომარე ანტონ ხუნდაძე, მოადგილე მიხეილ უნგიაძე. მუნიციპალიტეტის გამგებელი გია გიორგაძე, საგანმანათლებლო რესურსცენტრის ხელმძღვანელი ეთერ წილოსანი, საფინანსო განყოფილების გამგე ზურაბ ჩანტლაძე.
ბურნათელი მოსწავლეების მშობლები ავტობუსის მარშრუტის აღსადგენად დახმარებას ითხოვდნენ: _ გაუსაძლის პირობებში აღმოვჩნდით, ჩვენს შვილებს დილით 8-9 კილომეტრის ფეხით გავლა უხდებათ, საჭამიასერის ავტობუსი ხშირად გადაჭედილია მგზავრებით და არ აჩერებს. პატარებს მარტო ვეღარ ვუშვებთ, ჩვენც დავყვებით, შესაბამისად უნდა გადავიხადოთ მგზავრობის ღირებულებაც, შემდეგ გაკვეთილების დასრულებამდე ველოდებით და, მთელი დღე მოწყვეტილი ვართ ოჯახს, _ თქვეს მათ. საკრებულოს თავმჯდომარე დაინტერესდა, თუ რა მანძილით არის დაშორებული მათი სახლები უახლოეს სკოლასთან და რატომ არ დადიან ბავშვები საკუთარი სოფლის სკოლებში.
_ ქუჩაში ტრანსპორტის მომლოდინე ბავშვებს საფრთხე რომ არ შეექმნათ, ჯობია, სოფლის სკოლებში იარონ, _ თქვა რესურსცენტრის ხელმძღვანელმა, რაზედაც მშობლებმა უპასუხეს: _ სკოლა ჩვენს სოფელშიც არის, მაგრამ ხომ გვაქვს უფლება, უკეთესი პირობები შევუქმნათ შვილებს?! თანაც მაშინ, როდესაც ინგლისური ენის სწავლებასთან დაკავშირებით ასეთი მოთხოვნაა?!
საკრებულოს თავმჯდომარემ მიიღო გადაწყვეტილება, რომ 26 იანვრიდან სოფლის ბავშვებს მხოლოდ ორი თვით, ისევ მოემსახურება ავტობუსი, შემდეგ კი ამ პრობლემის მოგვარებაზე განათლების სამინისტრო იზრუნებს.
