ფოტორეპორტაჟს გამოხმაურება მოჰყვა

(გურია ნიუსი, ოზურგეთი) _ გაზეთ “გურია ნიუსის” ფოტოკორესპონდენტის რეზო ცქვიტინიძის ფოტორეპორტაჟს _ “ასე ცხოვრობენ ადამიანები 21-ე საუკუნეში”, რომელიც “გურია ნიუსში” გამოქვეყნდა (#6 2010 წელი 24 იანვარი), სოციალური მომსახურების გურიის საკოორდინაციო ცენტრის ხელმძღვანელი ვასილ ხომერიკი გამოეხმაურა და გვითხრა, რომ გივი შევარდნაძეს, დასთან ერთად, სოციალურ დახმარებას დაუნიშნავენ.
ფოტორეპორტაჟი ოზურგეთის მუნიციპალიტეტის სოფელ ასკანის და ამავე სოფელში მცხოვრებ გივი შევარდნაძის მძიმე სოციალურ მდგომარეობას ასახავდა.
ხომერიკმა აღნიშნა, რომ შევარდნაძეს სოციალური დახმარება ნამდვილად ეკუთვნის და ხელახალი შესწავლის შემდეგ, მას და მის დასაც დაენიშნებათ ფულადი დახმარება, ხოლო შეჩერებული _ აუნაზღაურდებათ.
_ გავეცანი თქვენს გაზეთში გამოქვეყნებულ ფოტორეპორტაჟს, რომელიც 60 წლის გივი შევარდნაძეს შეეხება. მართლაც, მისი ოჯახი შეისწავლა სოციალურმა აგენტმა. ეს პიროვნება ჯერ სოფელ ასკანაში ცხოვრობდა, შემდეგ სოფელ ლიხაურში დასთან ერთად. საცხოვრებლის მისამართის შეცვლის გამო, მას შეუჩერდა სოციალური დახმარების მიწოდება, რაც კანონის ფარგლებში ჯდება. ახლა იგი იმყოფება დასთან, სოფელ ასკანაში და აუცილებელია ამ ოჯახის ხელახალი შესწავლა. ნამდვილად ვიცი, რომ სოციალური დახმარება ეკუთვნის და არ დაეკარგება გასული თვეების ნაცდურიც. ასე რომ, მთავარია, მათი პირობების შესწავლა მათივე განცხადების საფუძველზე მოხდეს და სოციალური ფულადი დახმარება ორივეს დაენიშნება, _ გვითხრა ხომერიკმა.
“გურია ნიუსი” მიესალმება ვასილ ხომერიკის ამგვარ ყურადღებას, როგორც სოციალურად დაუცველი ადამიანების, ისევე გაზეთში გამოქვეყნებული მასალების მიმართ, რომლებსაც, მასზე უფრო მაღალი რანგის ზოგიერთი ჩინოვნიკისგან განსხვავებით, “სისულელეს” არ უწოდებს!