ჩაისუბნის თემში შემავალ ტერიტორიულ ორგანოებში _ ვაზიანში და ინტაბუეთში რამდენიმე პროექტი გაკეთდა და მთლიანობაში 29 891 ლარი დაიხარჯა.
სოფელ ვაზიანში წყალსადენის მილის შეკეთების და ღობის მოწყობის სამუშაოებზე 7 653 ლარი დაიხარჯა. თუმცა, ვერ ვიპოვეთ ადამიანი, რომელიც ამ წყალს იყენებს. ვაზიანელელი “გურია ნიუსთან” საუბრისას აღნიშნავენ, რომ წყალი საკუთარი სახსრებით, წყაროებიდან ჰყავთ გამოყვანილი. მათ არაფერი იციან იმ წყალსადენზე, რომლის შეკეთებაზე ამდენი თანხაა დახარჯული.
ჩაისუბნის ადმინისტრაციული შენობა, მართალია, ღია დაგხვდა, თუმცა, ადგილზე არც რწმუნებული იყო და არც მისი მოადგილეები. როგორც გვითხრეს, სოფლის ხელმძღვანელობა თათბირზე იყო წასული, მაგრამ ვერ გავარკვიეთ, რატომ არ იყო ადგილზე არც ერთი პასუხისმგებელი, როცა მათი ერთადერთი ვალდებულება ხალხის სამსახური და საჭირბოროტო კითხვებზე პასუხის გაცემაა.
სოფელ ინტაბუეთში სანიაღვრე არხის მოწყობის სამუშაოებისთვის 4 098 ლარი დაიხარჯა, თუმცა, ამ თანხით, მხოლოდ რამდენიმე არხი გაიჭრა. ამავე სოფელში, გასულ წელს გარე განათებაც მოეწყო.
სოფლის განვითარების პროგრამის ფარგლებში, ინტაბუეთში მიმდინარე წელსაც არხები გაჰყავთ. როგორც აქაურები ამბობენ, სოფელზე ზრუნვით ხელისუფლება თავს არ იკლავს:
_ პრობლემებს რა გამოლევს? ყოველ წელს გზაზე ხრეშს ყრიან. უამრავი ფული დახარჯეს ორი თუ სამი მანქანა ხრეშის ამოტანაზე, თუმცა, ერთი პატარა გაწვიმებაც კი საკმარისი იყო იმისთვის, რომ გზა ხელახლა გაფუჭებულიყო. შარშან, სანიაღვრე არხების გაკეთება ვითხოვეთ _ ნაწილი გააკეთეს და ამიტომ, ის შედეგი ვერ მივიღეთ რაც გვინდოდა. წელს კიდევ ნაწილს აკეთებენ. იმედია, ეს არხები წყალს გაატარებს და გზა ცოტა მოწესრიგებული იქნება, _ ამბობენ ინტაბუეთელები, რომელთა თქმით, გარე განათების მოწყობა ყველაზე კარგი საქმე იყო, რაც ბოლო წლებში გაკეთდა:
_ ღამე ქუჩაში გავლა შეუძლებელი იყო. კარგია, რომ გაკეთდა, მაგრამ, ნახეთ, როგორ ბოძებზე გააკეთეს _ ერთი ნიავი და შუქი არ გვაქვს. ბამბუკები გვაქვს შეყენებული მავთულებისთვის, _ აღნიშნეს ინტაბუეთელებმა.
ანალოგიური პრობლემა აქვთ ვაზიანშიც, ჩაისუბნელების მთავარი პრობლემა კი უწყლობა და სოფლის წისქვილის არქონაა.
2011 წელს, ჩაისუბანში სოფლის კრება ორჯერ ჩატარებულა. ამას ჩვენ მიერ გამოთხოვილი ოქმები მოწმობს. პირველი კრება 13 იანვარს არის ჩატარებული, თუმცა, ოქმს ნომერი არ აქვს. ოქმის თანახმად, კრებაზე გადაწყდა, რომ სოფლის ცენტრში არსებულ წისქვილს რეაბილიტაცია უნდა ჩატარებოდა და სტადიონზე სკამები გაკეთებულიყო.
მეორე, ასევე უნომრო ოქმი, 13 აპრილს არის შედგენილი. საკითხი ისევ იგივეა და გადაწყვეტილებაც უცვლელია _ ჩაისუბნის მოსახლეობა წისქვილის აღდგენას ითხოვს. შედგენილ საერთო კრების ოქმში, რომელსაც ნომერი არ აწერია, აღნიშნულია, რომ სოფელი ძველი, ამორტიზირებული წისქვილის რეაბილიტაციას ითხოვს.
სოფლის მოთხოვნა იმავე წელს შესრულდა, ოღონდ ნაწილობრივ _ ამ ეტაპზე ჩაისუბნის ცენტრში, მხოლოდ წისქვილის შენობა დგას, რომლის ასაშენებლად 14 839 ლარია დახარჯული.
_ შენობა რად გვინდა? რატომ უნდა ვთქვათ ტყუილი _ არაფერი გაკეთებულა. შედით იმ წისქვილში და ნახეთ, რა არის გაკეთებული. არ ვიცით, რას ეძახიან შესრულებულ სამუშაოს, _ აღნიშნეს ჩვენთან საუბრისას სოფლის ცენტრში შეკრებილმა მოქალაქეებმა.
ისინი კიდევ ერთ მტკივნეულ პრობლემაზე _ წყალზე საუბრობენ და აღნიშნავენ, რომ ხელისუფლების მაღალი პირების დაპირება დაპირებად დარჩა.
_ ორი წელია გვპირდებიან, წყალი გექნებათო. თქვენ წერდით 3 მილიონიან პროექტზე, რომლის თანახმად, ჩაისუბანს წყალი უნდა ჰქონოდა. დიდი აუზი ჩვენს სოფელში გააკეთეს და ტელევიზიითაც გააპიარეს. კარგად გვახსოვს, როგორ გვპირდებოდნენ, რომ ამ აუზიდან წყალს ჩვენც მოგვცემდნენ, მაგრამ _ არაფერი, _ გვიყვებიან ჩაისუბნელები.
სოფელში იხსენებენ, რომ სოფლის წყალმომარაგების საკითხი, როგორც სოფლის კრებაზე, ასევე მუნიციპალიტეტის ხელმძღვანელობასთან ბევრჯერ დააყენეს: _ თქვენი ფულია და თქვენვე განკარგეთო. კეთილი და პატიოსანი, მაგრამ ვინ გვაძლევს მაგის საშუალებას?! მთელი სოფელი რომ დაიაროთ, ვერავინ გიპასუხებთ, რა და რისთვის დახარჯეს. მაგ თემით რომ დავინტერესდეთ, იტყვიან ინტრიგნები არიანო და ღმერთმა იცის, რას გვიზამენ. კაცს ოცნებისთვის იჭერენ და სიმართლე რომ ხმამაღლა ვთქვათ, ხომ წარმოგიდგენიათ, რა მოხდება?! _ ამბობენ ჩაისუბანში.
მოსახლეობის თქმით, საკუთარი მოსაზრების ღიად დაფიქსირებისთვის მკაცრი სასჯელია, ამიტომ, ურჩევნიათ პრობლემებზე ჩუმად ისაუბრონ. თუმცა, არსებობენ ადამიანები, რომლებიც, საკუთარ გულისტკივილს, კამერის წინაც ამბობენ: _ ჯერ იყო და დაგვპირდნენ, ამ ახალი წყალსადენიდან წყალს მოგცემთო, მერე კი მხოლოდ სკოლას, ბაღს და გამგეობას მისცეს. ჩვენ არ ჩაგვთვალეს ადამიანებად. სოფლის ცენტრში ერთი ონკანი მაინც დადგან, რომ ამ სიცხეში წყურვილი მოვიკლათ, _ გვეუბნებიან სოფლის ცენტრში შეკრებილი ადამიანები, რომლებსაც გულწრფელ საუბარს, ჩაისუბნის სკოლის ერთ-ერთი პედაგოგი არ აცლის და ამბობს, რომ სოფლის ყველა თხოვნა შესრულებულია. თუმცა, პედაგოგს სხვები არ ეთანხმებიან: _ რატომ უნდა ვთქვათ სიცრუე, რა არის გაკეთებული? შედი და დააფქვიე წისქვილში მჭადი, ორ კილომეტრს რომ გადიხარ დასაფქვევად, _ პასუხობენ თანასოფლელი პედაგოგის კომენტარს.
ოფიციალური დოკუმენტის თანახმად, რომელიც ჩოხატაურის მუნიციპალიტეტის ვებგვერდზეა გამოქვეყნებული, წელს ჩაისუბანში გზის მოწყობის სამუშაოები ჩატარდება, ვაზიანში გზა და წყლის სისტემა მოეწყობა, ინტაბუეთში კი შიდა სასოფლო გზებს შეაკეთებენ. ეს ის სამუშაოებია, რომლებიც გასულ წელსაც ჩატარდა.
აღსანიშნავია ისიც, რომ გასულ წელს, ამ დროს, ყველა სამუშაო დასრულებული იყო. თუ 2012 წლის მაგალითს გავიხსენებთ, ფაქტია, რომ სოფლის პროგრამების გახორციელებას ხელისუფლება შეგნებულად აგვიანებს და არჩევნებს ელოდება.
