ახალი კონცეფციის ერთ-ერთი უმნიშვნელოვანესი კომპონენტი ტოტალური ზრუნვაა, რომელიც ძალაში 2013 წლიდან ეტაპობრივად შევა. სამხედრო მოსამსახურეებსა და მათ ოჯახებზე სახელმწიფოს მხრიდან ტოტალური ზრუნვის კომპონენტებია:
• ჯანდაცვა;
• განათლება;
• შეღავათები ტრანსპორტზე;
• საბანკო შეღავათები;
• ფინანსური წახალისება და დასაქმება;
• საცხოვრებელი ფართით უზრუნველყოფა;
• დასვენება.
აღნიშნული კონცეფციით მკვეთრად უმჯობესდება სამხედრო მოსამსახურეებისა და მათი ოჯახებისთვის განკუთვნილი სადაზღვევო პაკეტი. აღსანიშნავია, რომ სამხედრო მოსამსახურეების ოჯახებისათვის განკუთვნილი ამჟამად არსებული დაზღვევა არ ფარავს მთელ რიგ დაავადებათა დიაგნოსტიკის და მკურნალობის ხარჯებს. თუმცა, აქაც არის განსხვავება, რადგან თავდაცვის სამინისტროს თანამშრომლებისთვის სხვადასხვა კატეგორიის სადაზღვევო პაკეტები მოქმედებს. მაღალი თანამდებობის მაღალანაზღაურებადი მოსამსახურეები საკუთარ თავს და ოჯახებს A კატეგორიის დაზღვევით ანებივრებენ , რაც მათ 100% სადაზღვევო მომსახურებას სთავაზობს. ხოლო B და C პაკეტები მხოლოდ სასწრაფო გადაუდებელ დახმარებას გულისხმობდა. ამ კატეგორიის დაზღვევის მქონე სამხედრო მოსამსახურის ოჯახის წევრებს , როგორც წესი ” ქრონიკული და თანდაყოლილი დაავადებები” სჭირდათ, რასაც დაზღვევა არ ფარავდა. როგორც ამბობენ, შაშკინმა სამინისტროში სოციალური უთანასწორობა მოსპო და ყველა სამხედრო ერთნაირი დაზღვევით ისარგებლებს.
ამასთანავე, სპეციალურად სამხედრო მოსამსახურეებისთვის შეიქმნება რეფერალური ფონდი, რომელიც, საჭიროების შემთხვევაში, ასევე მოხმარდება სამხედროებისა და მათი ოჯახების სამედიცინო მომსახურების უზრუნველყოფას.
სამხედრო მოსამსახურეებისა და მათი ოჯახებისთვის ჯანდაცვის მომსახურების სრული პაკეტის შეთავაზების გარდა, თავდაცვის სამინისტრო ყველა სამხედროსთვისა და მათი ოჯახებისთვის განათლების ხელმისაწვდომობაზეც იწყებს ზრუნვას. განათლების სფერო, ასევე გახდება ერთ-ერთი მოტივატორი ჯარში სამსახურის დასაწყებად.
კერძოდ, თავდაცვის სამინისტრო 2013 წლიდან ბაკალავრიატში 4 წლიან სწავლებას დაუფინანსებს ყველა იმ პირს, რომელმაც ჩააბარა უმაღლეს სასწავლებელში, ვერ მოიპოვა სახელმწიფო გრანტი და ვერ იხდის სწავლის საფასურს. ასეთ ადამიანს, თავდაცვის სამინისტრო სთავაზობს ერთწლიან სავალდებულო სამსახურს ჯარში, რის შემდეგაც მისი სწავლება სრულად დაფინანსდება.
იმ შემთხვევაში, თუ პიროვნება საკონტრაქტო სამსახურს მეორე ვადითაც გააგრძელებს, მას თავდაცვის სამინისტრო მაგისტრატურაში სწავლის საფასურს დაუფინანსებს. სამხედროებს უფასოდ გადაეცემათ კომპიუტერის, ინგლისურისა და ეთნიკური უმცირესობების შემთხვევაში, ქართულის სწავლების ვაუჩერი, ასევე პროფესიული სწავლების ვაუჩერიც.
შეიქმნება სპეციალური ფონდი, რომელიც სამხედრო მოსამსახურეების საზღვარგარეთ სამხედრო სასწავლებლებში სწავლების ხარჯებს დაფარავს.
სამხედროებისთვის ასევე ამოქმედდება განათლების უზრუნველყოფის საოჯახო პაკეტი, კერძოდ:
1. ფასდაკლება სახელმწიფო სკოლამდელი აღზრდის დაწესებულებებში;
2. ოფიცრების, კაპრალებისა და სერჟანტების პირველკლასელი შვილებისთვის უფასო სასკოლო სახელმძღვანელოები;
3. 16 წლიანი სამხედრო საკონტრაქტო სამსახურის შემთხვევაში სამხედრო მოსამსახურის შვილების სწავლების დაფინანსება ბაკალავრიატში სახელმწიფო გრანტის ოდენობით;
4. პროფესიული განათლების ვაუჩერი სამხედრო მოსამსახურეების მეუღლეებს.
სამხედროები მუნიციპალურ ტრანსპორტში სპეციალური ფასდაკლებებით ისარგებლებენ, მიიღებენ საბანკო შეღავათებს, ფინანსურ წახალისებასა და ფასდაკლებას დასასვენებელ საგზურებზე.
ტოტალური ზრუნვა ასევე გამიზნულია საქართველოს ტერიტორიული მთლიანობისთვის და საერთაშორისო მისიებში დაღუპულ სამხედრო მოსამსახურეების ოჯახებისთვის საცხოვრებელი ფართით უზრუნველყოფისთვის.
3T-ს კონცეფციის დანარჩენი ორი პრინციპი ტოტალურ წვრთნასა და ტოტალურ თავდაცვას ეფუძნება.
ტოტალური ტრენინგი – ნატოში ინტეგრაციისთვის აუცილებელია სახელმწიფოს კარგად მომზადებული და გაწვრთნილი ჯარი ჰყავდეს. ამ მიმართულებით ჯარის მომზადება, საერთაშორისო წვრთნები და ტრენინგები კიდევ უფრო გაძლიერდება. ყველაფერი გაკეთდება იმისთვის, რომ საქართველოში ძლიერი, კარგად მომზადებული ჯარი იყოს, რაც ქვეყნის უსაფრთხოებისა და სიძლიერის გარანტია.
ტოტალური თავდაცვა _ ქვეყნის თავდაცვისუნარიანობის გაძლიერებას გულისხმობს, რომლის ერთ-ერთი უმნიშვნელოვანესი ნაწილი რეზერვის არსებობა და გაძლიერებაა.
