“გურია ნიუსთან” აღსრულების ბიუროს თანამშრომლებმა კომენტარი არ გააკეთეს. გვითხრეს რომ პრესსამსახურის უფროს ბესიკ ლილუაშვილს დავკავშირებოდით.
“გურია ნიუსი” ბესიკ ლილუაშვილს დაუკავშირდა, რომელმაც განაცხადა: “შპს “ბურჯის” ქონება 2 აგვისტოს გაიყიდა. ქონება უნდა მომზადდეს ახალი მეპატრონისთვის. ამ ეტაპზე ახალი მეპატრონის ვინაობას ვერ დავასახელებ. არ შეიძლება, რადგან კანონით 10 დღის შემდეგ, დაახლოებით 12-13 აგვისტოსთვის ახალი მეპატრონის ვინაობა გახდება ცნობილი.”
შეგახსენებთ რომ შპს “ბურჯში” დაახლოებით 750-მდე ადამიანი იყო დასაქმებული. ჯერ-ჯერობით უცნობია რა ბედო ელის “ბურჯის” თანამშრომლებს.
დღეს აღსრულების ეროვნული ბიურო შპს “ბურჯთან” დაკავშირებით გაავრცელა განცხადება. რასაც “გურია ნიუსი” უცვლელად გთავაზობთ:
“აღსრულების ეროვნული ბიურო აგრძელებს საზოგადოების ინფორმირებას შპს “ბურჯის“ საქმესთან დაკავშირებით სააღსრულებო საქმისწარმოების დეტალებზე.
ელექტრონული აუქციონი შ.პ.ს “ბურჯის“ ქონებაზე 2 აგვისტოს დასრულდა. გამოვლინდა გამარჯვებული, რომელმაც აღნიშნული ქონება 8 761 513.55 ლარად შეიძინა. “სააღსრულებო წარმოებათა შესახებ“ საქართველოს კანონის მიხედვით აუქციონზე გამარჯვებულმა თანხა 10 დღის განმავლობაში უნდა დაფაროს სრულად, რის შემდეგაც ის გახდება ქონების საბოლოოდ შემძენი, შესაბამისად შემძენს ქონება უნდა გადაეცეს გამოთავისუფლებულ მდგომარეობაში. ყოველივე ზემოაღნიშნულიდან გამომდინარე, აღსრულების ეროვნული ბიურო ახორციელებს ფართების გამოთავისუფლებასა და მათ მომზადებას ახალი მესაკუთრისათვის გადასაცემად.
შეგახსენებთ, რომ თბილისის საქალაქო სასამართლოს მიერ გაცემული #4/2756-12 და 4/2751-12 სააღსრულებო ფურცლების საფუძველზე შპს ,,ბურჯს“ ჯარიმის სახით დაეკისრა 11 018 105 ლარის გადახდა, მას ასევე გადასახდელად დაეკისრა აღსრულების საფასური 771 267,35 ლარის ოდენობით. რის საფუძველზეც განხორციელდა შპს “ბურჯის“ ქონების ელექტრონულ აუქციონზე გატანა, სადაც აღნიშნული ქონება 8 761 513.55 ლარად გაიყიდა. საჯარო აუქციონზე “ბურჯის“ ქონების საწყისი ფასი კი 5 153 831.50 ლარს შეადგენდა.
აღსრულების პროცესის გამჭვირვალობის მიზნით, აღსრულების ეროვნული ბიურო შემდგომშიც მიაწვდის საზოგადოებას დეტალურ ინფორმაციას სააღსრულებო წარმოების მიმდინარეობის შესახებ.”
