დღეს, 3 საათისთვის ამოიწურა პირველ ნაკადში გატანილი ქონების აუქციონის ვადა და ელოდებიან, რომ რამდენიმე საათში სააღსრულებო ბიურო ახალ ლოტებს გამოიტანს. ამ დროისათვის უცნობია, ვინ გახდა გაყიდული ქონების მეპატრონე.
როგორც ცნობილია ქართველი ემიგრანტები გამოეხმაურნენ მწერალ ჭაბუა ამირეჯიბის მოწოდებას და გადაწყვიტეს, ქონება შეისყიდონ და შემდეგ ძველ მფლობელებს დაუბრუნონ. “გურია ნიუსი” დაუკავშირდა იურისტ არჩილ ჭანტურიას, რომელიც აცხადებს, რომ პირველ აუქციონზე გატანილი 6 ლოტიდან ოთხი გაიყიდა, ორს კი მყიდველი არ გამოუჩნდა.
როგორც ცნობილია, ხობში ქართული ოცნების მაჟორიტარის გიგა ბუკიას სახლი 312 000 ლარად გაიყიდა რაც 120 000 ლარით აღემატება საწყის ფასს.
აღსანიშნავია, რომ ყველა გაყიდული უძრავი ქონების ფასი საწყის ფასს აღემატებოდა.
ეროვნული ფორუმის წევრის ლევან ჩიჩუას საკუთრებაში არსებული ბინა და ავტოფარეხი ფალიაშვილის ქუჩაზე _ ქონების საწყისი ფასი იყო 120 500 ლარი, გაიყიდა 138 780 ლარად.
ეროვნული ფორუმის წევრის ირმა დავითაძის ქონება _ საცხოვრებელი ბინა და სარდაფი ცაგარელის ქუჩაზე _ საწყისი ფასი 152 ათასი ლარი, გაიყიდა 158 080 ლარად.
ირმა დავითაძის კუთვნილი საზაფხულო ფართი და ავტოსადგომი მცხეთის ქუჩაზე _ საწყისი ფასი 326 ათასი ლარი, გაიყიდა 1 810 560 ლარად
ეროვნული ფორუმის წევრის კახა ჩაკვეტაძის უძრავ ქონებას ორთაჭალის ქუჩაზე _ საწყისი ფასი 35 ათასი ლარი, თელეთის ქუჩაზე _ საწყისი ფასი 9500 ლარი, მყიდველი არ გამოუჩნდა და შესაბამისად მათ აღსრულების ბიურო 15 დღის ვადაში ან სახელმწიფო საკუთრებად მიაქცევს ან განმეორებით აუქციონს დანიშნავს, სადაც ამ ქონებას უკვე ნახევარ ფასად გაიტანენ.
“გურია ნიუსთან“ საუბარში იურისტი არჩილ ჭანტურია აცხადებს, რომ აუქციონზე გაყიდული ქონების მფლობელთა ვინაობა 10 დღეში გახდება ცნობილი, როდესაც ისინი სრულად დაფარავენ თანხას და საჯარო რეესტრში ქონებას გადაიფორმებენ.
ჭანტურიას თქმით, დაჯარიმებულია სულ 32 ადამიანი, რომელთა ქონებასაც აღსრულების ბიურო ეტაპობრივად გაყიდის აუქციონზე. დაჯარიმებულთა შორის არიან ისეთებიც, რომლებსაც უძრავი ქონება არ გააჩნიათ, მათი ავტომანქანები კი იმდენად იაფი ღირს, რომ სახელმწიფოს მათ მიმართ ინტერესი არ აქვს.
პარტიებისათვის თანხების უკანონო გადარიცხვისათვის სასამართლოს გადაწყვეტილებით დავით ბაციკაძეს დაეკისრა 135.750 ლარის გადახდა, ზაალ გოგსაძეს – 60 ათასი ლარის, გიგა ბუკიას – 77.250, გივი რამაზაშვილს – 80 ათასი ლარის, ბიძინა გუჯაბიძეს – 150 ათასი ლარის, კახა ჩაკვეტაძეს – 93.460 ლარის, ლევან ჩიჩუას – 24.987, ლევან ჩქარეულს – 20 ათასი ლარის, მარინა ნადირაძეს – 57.400 ლარი, ირმა დავითაძეს – 78.365, ავთანდილ დავითაძეს – 114.192, გიორგი მოსიაშვილს – 125.350, მაია თანიაშვილს – 24.986, ირაკლი ჭუბაბრიას – 79.145, ბეჟან ედიშერაშვილს – 25 ათასის, ბადრი ცინცქილაძეს – 40.100, ალექსანდრე შალამბერიძეს – 40.250 ლარის გადახდა.
