7 აგვისტოს “ერთიანი ნაციონალური მოძრაობის” ახალგაზრდული ორგანიზაციის (ოზურგეთი) ოფისში, საჯარო მოხელეებმა შეკრება სამუშაო საათებში დაიწყეს. კარი ჩაკეტილი იყო, მხოლოდ დაკაკუნების შემდეგ უშვებდნენ იქ მიმსვლელებს (არ არის გამორიცხული, პაროლიც ჰქონოდათ. ავტ) კარი თითქმის ყოველ წუთს გასაღებით იკეტებოდა. შემდეგ კი, როდესაც ვინმე მივიდოდა კარებთან, რამდენიმე წამებში აღებდნენ პარტიის აქტივისტები.
შუქრი გაბრიჩიძე _ ოზურგეთის მუნიციპალიტეტის ზედამხედველობის სამსახურის უფროსი, გია შახოვი _ გამგეობის მატერიალურ-ტექნიკური უზრუნველყოფის განყოფილების უფროსი, ოთარ რევიშვილი _ სპორტისა და ახალგაზრდულ საქმეთა სამინისტროს წარმომადგენელი გურიაში, კახა მეგრელიშვილი _ ქალაქ ოზურგეთის რწმუნებული, მამია ბარამიძე _ სამხარეო ადმინისტრაციის თანამშრომელი _ ეს ადამიანები ჩვენ იმ დღეს ამ შეხვედრაზე დავაფიქსირეთ.
ოთო რევიშვილმა და კახა მეგრელიშვილმა ოფისი კომენტარის გარეშე დატოვეს, კომენტარის ხასიათზე არც ამავე პარტიის ოზურგეთის ოფისის საორგანიზაციო მდივანი დიტო შარაძე იყო.
შუქრი გაბრიჩიძის განცხადებით, ოფისში სულ 15 წუთი იყო და ექვსი საათის შემდეგ სად წავა, არავის საქმე არ არის:
_ რაღაც თემები აინტერესებდათ ახალგაზრდებს, ბავშვები მანდ, რაღაც პროექტებზე მუშაობენ, სხვადასხვა პროექტებზე მუშაობენ. შევედი, ჩვეულებრივად, 15 წუთი დავყავი. მგონი, მაქვს უფლება, ექვსი საათის მერე სადაც მინდა, იქ ვიარო.
_ რა პროექტებზეა საუბარი?
_ ანუ რა შეიძლებოდა გაეკეთებინათ ქალაქში ახალგაზრდებს ისე, რომ დარღვევების გარეშე მოხდეს ეს ყველაფერი. 7-8 აგვისტო ხომ გლოვის დღეა და არაფერი ისეთი გამიკეთებია.
ყოველგვარ მოლოდინს გადააჭარბა სამხარეო ადმინისტრაციის თანამშრომლის მამია ბარამიძის კომენტარმა _ მან ჯერ ვერ გაიხსენა, რა დროს იყო შეხვედრაზე, შემდეგ კი გაახსენდა, რომ “ვიღაცის” ხელით ბახმაროში ჩანთა ჰქონდა გასაგზავნი და ოფისში ამის გამო მისულა.
_ არ ვიცი, არ მახსოვს, ვიყავი თუ არა სამუშაო დროს პარტიაში. ვიცი, რომ არ ვიყავი.
_ ესე იგი, იყავით თუ არ იყავით?
_ მე, ასე ვიცი, ექვსი საათის მერე ვიყავი. ჩანთა მქონდა დატოვებული ბახმაროში გასაგზავნი და ვიღაცა მიდიოდა იქ, _ გვითხრა მამუკა ბარამიძემ.
გია შახოვის თქმით, ის სამუშაო საათებში იმიტომ შევიდა “ნაცმოძრაობის” ოფისში, რომ “რაღაც დაზიანება იყო და დაეხმარა”.
ოზურგეთის მუნიციპალიტეტის გამგებლის მოვალეობის შემსრულებლის, ილია ვაშაყმაძის თქმით, 7-8 აგვისტოს გლოვის დღე იყო გამოცხადებული: _ როგორც ვიცი პარტიული საქმიანობა ეს ორი დღე შეჩერებულია, _ გვითხრა ილია ვაშაყმაძემ. მას არ აქვს ინფორმაცია პარტიაში საჯარო მოხელეების ყოფნის თაობაზე.
მეტად “ამომწურავი” პასუხი გაგვცა ამ ყველაფერზე “ერთიანი ნაციონალური მოძრაობის” ოზურგეთის რაიონული ორგანიზაციის პრესსპიკერმა ლია კილაძემ. ჩვენს კითხვაზე, რა შეხვედრა გაიმართა „ერთიანი ნაციონალური მოძრაობის“ ახალგაზრდულ ორგანიზაციაში, სადაც სამუშაო საათებში საჯარო მოხელეებიც შეიმჩნეოდნენ, მან გვიპასუხა:
_ საქართველოს პრეზიდენტის, მიხეილ სააკაშვილის გადაწყვეტილებით, ორი დღის განმავლობაში 7-8 აგვისტოს (შეგიძლიათ ნახოთ ილია ვაშაყმაძის და შუქრი გაბრიჩიძის პასუხები), ყველა სახელმწიფო შენობაზე დაშვებულია ეროვნული დროშა. “ხსოვნის კვირეულთან” დაკავშირებით, მმართველი გუნდი ორი დღით, წინასაარჩევნო კამპანიას წყვეტს. შესაბამისად, “ერთიანი ნაციონალური მოძრაობის” ოზურგეთის ორგანიზაციაში ოფიციალური შეხვედრები არ გამართულა.
ოზურგეთის მე-4 საჯარო სკოლის პედაგოგმა, ნატალია ლუკაშენკომ “გურია ნიუსთან” საუბრისას თქვა, რომ პარტიის ოფისში იმის გამო მივიდა, საარჩევნო თემებზე ესაუბრათ.
ოფისიდან გამოსული ადამიანები, რომლებიც თავს პარტიის კოორდინატორებად მოიხსენიებდნენ, ერთნაირ პასუხებს გვცემდნენ:
_ ჩვენ პარტიის კოორდინატორები ვართ და გვითხრეს, რომ 8 აგვისტოს არ უნდა გვემუშავა, გლოვის დღე იყო.
კოორდინატორები პრესასთან სახელს და გვარს არ ასახელებდნენ.
და ბოლოს, არასამუშაო საათების შემდეგ “ერთიანი ნაციონალური მოძრაობის” ოფისიდან თეფშები გამოიტანეს. “გლობალ ტვ”-ის ან “მაგთი სატის” თეფშებზე არ არის საუბარი _ სამზარეულოს თეფშებს ვგულისხმობთ.
რამდენიმე ადამიანმა ისიც გვითხრა, რომ ოფისში საზამთრო და ნესვი შეუტანიათ. ალბათ, კოორდინატორების გამასპინძლება სურდათ.
“საერთაშორისო გამჭვირვალობა _ საქართველოს” იურისტის ირინა ურუშაძის თქმით, “საქართველოს საარჩევნო კოდექსის თანახმად, საჯარო მოხელეებს ეკრძალებათ საარჩევნო კამპანიაში მონაწილეობა, როდესაც ასრულებენ უშუალო სამსახურებრივ ფუნქციებს. სამუშაო საათები სწორედ ამ ფუნქციების შესრულების დროა, ხოლო პარტიის ახალგაზრდულ შტაბში ყოფნა, სავარაუდოდ, სწორედ კამპანიაში ჩართვის მიზნით ხდება. შესაბამისად, აღნიშნული მოხელეები, რომლებიც სწორედ სამუშაო დროს იმყოფებიან პარტიის შტაბში, არღვევენ საარჩევნო კოდექსის დანაწესს და ხდება ადმინისტრაციული რესურსების გამოყენება წინასაარჩევნო პერიოდში”.
კოალიცია “არჩევნის თავისუფლებისთვის” წევრის ირაკლი მელაშვილის თქმით, “სამუშაო საათებში მოხელე ასრულებს სამსახურებრივ ფუნქციებს, რაშიც არ შედის პარტიულ ოფისებში პარტიულ ღონისძიებებზე სიარული. წინასაარჩევნო პერიოდში პარტიის ოფისში ჩატარებული შეხვედრა, ცალსახად საარჩევნო ღონისძიებაა. წინააღმდეგ შემთხვევაში, შეხვედრა უნდა ტარდებოდეს სახელმწიფო დაწესებულებაში”.
