თედო კობახიძის ინფორმაციით, ქართული ოცნების მაჟორიტარის გიგა ბუკიას და ავთო დავითაძის 300 ლარად შეფასებული იარაღი 8 ათას ლარად გაიყიდა, რაც არარეალური ფასია, მაშინ როდესაც იარაღის საუკეთესო და უახლეს მოდელებს 4 ათას ლარად იყიდი: “ბინების, ავტომანქანების, იარაღის არარეალურად მაღალ ფასად გაყიდვა ნიშნავს იმას, რომ ეს ქონება ძალიან მალე ნატურის წესით გადავა სახელმწიფოს საკუთრებაში. ბუნებრივია, რომ ბინაში, რომლის რეალური ფასი 120 ათასია, ნახევარ მილიონს არავინ გადაიხდის. 10 დღეში აღმოჩნდება, რომ მყიდველმა თანხა სრულად ვერ დაფარა და ქონება სახელმწიფოს საკუთრებაში მიიქცევა. ეს რომ მართლაც რეალური აუქციონი იყოს, ჩვენი შემომწირველები მილიონერები გახდებოდნენ,” _ ამბობს კობახიძე “გურია ნიუსთან” საუბარში.
კანონი სააღსრულებო წარმოების შესახებ რამდენჯერმე შეიცვალა. თავდაპირველად, თუ მყიდველი აუქციონზე მოგებულ ქონებას არ შეიძენდა, ის ხელმეორედ გაჰქონდათ აუქციონზე პირველადი აუქციონის მონაცემებით. მოქმედი კანონით კი 15 დღეში ასეთ ქონებას სახელმწიფო დაეპატრონება.
თბილისის საქალაქო სასამართლოს გადაწყვეტილებით 32 პირი დაჯარიმდა , რომლებმაც პარტიებისათვის ჩარიცხული თანხების წარმომავლობა ვერ დაასაბუთეს. თედო კობახიძე აცხადებს, რომ სასამართლომ უგულებელყო დაცვის მიერ წარდგენილი ყველა მტკიცებულება, რომელიც ადასტურებდა, რომ მაგალითად, შემომწირველს, რომლის წლიური შემოსავალი 700-800 ათასი ლარი იყო, შეეძლო პარტიისთვის 4 ათასი ლარის გადახდა.
სააღსრულებო ბიუროს შემომწირველთა ქონება, რომლებმაც ჯარიმის ნებაყოფლობით გადახდაზე უარი თქვეს, ეტაპობრივად გააქვს აუქციონზე. 10 აგვისტოს გიორგი ქიმერიძის მიწის ნაკვეთებს გაყიდიან. სასამართლოს გადაწყვეტილებით მას 16 ათასი ლარი აქვს გადასახდელი.
თედო კობახიძე “გურია ნიუსთან” საუბარში ამბობს, რომ “სააღსრულებო ბიურომ ქიმერიძის 1500 კვადრატული მეტრი ნაკვეთი 25 ათას ლარად შეაფასა, რაც სრულად ფარავდა ჯარიმის თანხას. ამის მიუხედავად ხელისუფლება ქიმერიძეს მეორე ნაკვეთსაც უყიდის _ რუსთავში მდებარე 5 ჰექტარი მიწის ნაკვეთი მიზერულ ფასად _ 4 ათას ლარადაა შეფასებული, რაც იმას ნიშნავს რომ აუქციონზე მას ნულოვანი ფასით გაიტანენ: “5 ჰექტარი ნაკვეთი ერთადერთი მიზნით შეფასდა 4 ათას ლარად _ სახელმწიფოს მისი ხელში ჩაგდება სურს. კანონმდებლობით, ქონება, რომლის ღირებულებაც 5 ათას ლარზე ნაკლებია, აუქციონზე ნულოვანი ფასით გადის, ანუ შეიძლება ვიღაცამ ეს ნაკვეთი 1 ლარად იყიდოს. ეს არის სახელმწიფოს მხრიდან საკუთარი მოქალაქეებისათვის”ქონების ახევა”, _ აცხადებს კობახიძე “გურია ნიუსთან” საუბარში.
ადამიანები, რომლებსაც ქონება გაუყიდეს, თანხის მიღებას არ ელოდებიან, რადგან “ხელგაშლილი” მყიდველების არსებობის არ სჯერათ. ისინი ვარაუდობენ, რომ 10 დღეში როდესაც მყიდველებს თანხის სრულად დაფარვის ვადა ამოეწურებათ, მათი ქონება სახელმწიფოს ხელში გადავა. კობახიძე ამბობს, რომ ასეთ შემთხვევაში ანონიმურ მყიდველებს ამოფარებულმა ხელისუფლებამ ქონების ღირებულების 10% დაკარგა, რაც მან წინასწარ აუქციონში მონაწილეობის მისაღებად გადაიხადა.
“2 თვეში, როდესაც ამ ქვეყანაში იქნება სამართლიანი სახელმწიფო და სამართლიანი სასამართლო, თითოეულ ამ ადამიანს უკან დაუბრუნდება არაკეთილსინდისიერი მყიდველების მიერ ნაყიდი ქონება. ყველამ გაითვალისწინოს ეს და ნუ დააყენებენ საკუთარ კაპიტალს რისკის ქვეშ,” _ აცხადებს კობახიძე “გურია ნიუსთან” საუბარში.
