აუდიტის სამსახური აცხადებს, რომ ივანიშვილს და კალაძეს მიეცათ თანხების ხარჯვის მიზნობრიობის დამტკიცების საშუალება, რაც არ გამოიყენეს. კერძოდ, მათ უპასუხოდ დატოვეს მოგელაძის უწყების წერილობითი მოთხოვნა წარმოედგინათ ხარჯვასთან დაკავშირებული დეტალური ინფორმაცია.
ადვოკატი სანდრო ბარამიძე აცხადებს, რომ აუდიტის სამსახურს ადამიანების პირად ცხოვრებაში ჩარევის უფლება არ აქვს, მის მოთხოვნა უკანონოა და, შესაბამისად, ბიძინა ივანიშვილი არ იყო ვალდებული მისთვის დეტალური ინფორმაცია მიეწოდებინა.
“ეს არის აუდიტის სამსახურის უკანონო მოთხოვნა, არ არსებობს კანონის ნორმა რომელიც უფლებამოსილს გახდიდა ამ სამსახურს ფიზიკური პირისათვის მოეთხოვა მის მიერ გამოტანილია ნაღდი ფულის ანგარიშზე დაბრუნება. ადამიანმა რომ საკუთარი ანგარიშიდან ფული გაიტანოს, ეს კანონდარღვევააა? ეს იყო ივანიშვილის პირადი თანხა, რომელიც არ დაუხარჯავს საარჩევნო მიზნით და არც დახარჯავს. აუდიტის სამსახურს არავითარი შეხება არ აქვს მის პირად ცხოვრებასთან”, _ აცხადებს სანდრო ბარამიძე “გურია ნიუსთან” სამსახურში.
აუდიტის სამსახურის მიერ ბიძინა ივანიშვილის სახელზე გაგზავნილი წერილის მიხედვით ირკვევა, 2012 წლის განმავლობაში ბანკ “ქართუში” არსებულ ბიძინა ივანიშვილის ანგარიშიდან მისი მითითებით, ნოდარ ჯავახიშვილმა გაიტანა 2 918.500 დოლარი, 735 189 ლარი და 700 ევრო.
“რადგან საჯაროდ განცხადებული საარჩევნო მიზნებიდან და ამოცანებიდან გამომდინარე მოქალაქეთა პოლიტიკური გაერთიანების შესახებ საქართველოს ორგანული კანონის 26 მუხლით გათვალისწინებულ სუბიექტს წარმოადგენთ და ამავდროულად პოლიტიკური დაფინანსების კანონის არაერთგზის დარღვევის გამო თქვენზე ვრცელდება ორგანული კანონით დადგენილი ფინანსური გამჭვირვალობის წესი, სახელმწიფო აუდიტის სამსახურმა მოგთხოვათ წარმოგედგინათ დოკუმენტურად დადასტურებული ინფორმაცია ამ თანხით განხორციელებული საქმიანობის და გაწეული ხარჯების შესახებ”, _ ნათქვამია აუდიტის სამსახურის მიერ ივანიშვილის სახელზე გაგზავნილ წერილში.
აუდიტის სამსახურის განცხადებით უწყების მიზანი დარღვევის პრევენციაა და არა სანქციების გამოყენება, ამიტომაც ივანიშვილს სთხოვს ნებაყოფლობით დააბრუნოს მისი და მისი მეუღლის ანგარიშებიდან გატანილი ნაღდი ფული.
აუდიტის სამსახურმა იგივე შინაარსით მიმართა კახი კალაძეს. ირკვევა, რომ ამ უკანასკნელს 2011 წლის ნოემბრიდან დღემდე პირად ანგარიშზე ჩაერიცხა 7 073 185 ლარი, საიდანაც ნაღდი ფულის სახით გატანილია 3 388 992 ლარი.
