„დემოკრატიული მოძრაობის“ პოზიცია, რომელიც დღეს გაახმოვანა პარტიის თავმჯდომარე ნინო ბურჯანაძემ, პარტიის დიდი უმრავლესობის გადაწყვეტილებით იქნა მიღებული, რომლებიც გაგებით ეკიდებიან ქვეყანაში არსებულ ვითარებას. მიუხედავად იმისა, რომ ჩვენი პარტიული სტრუქტურები და აქტივისტები მზად არიან არჩევნებში მონაწილეობისათვის, პარტიამ მიიღო ამ ვითარებაში ერთადერთი სწორი გადაწყვეტილება – არ მიიღოს მონაწილეობა 2012 წლის 1 ოქტომბრის საპარლამენტო არჩევნებში.
რაც შეეხება ცალკეულ პირებს, მაგალითად რომან ჩხაიძეს, ან თუ კიდევ ვინმე ასეთი გამოჩნდება, ეს, რა თქმა უნდა მათი გადასაწყვეტია, რომელ ოპოზიციურ ძალას დაუჭერენ მხარს. რაც მთავარია, „დემოკრატიული მოძრაობა არ არის „ნაციონალური მოძრაობა“, თავისი პარტიის წევრი სხვაგან გადასვლის გამო რომ ჩაქოლოს. რეგიონული ოფისების მუშაობის შეჩერება გარკვეული პერიოდით მოხდა, რაც იმას არ ნიშნავს, რომ ისინი „ქართულ ოცნებაში“ გადავლენ. კიდევ ერთხელ გიმეორებთ, რომ ცალკეული პირები რას იზამენ, ეს მათი გადასაწყვეტია“, _ განუცხადა ბაკურ ბაკურაძემ „გურია ნიუსს“.
შეგახსენებთ, რომ “გურია ნიუსს” „დემოკრატიული მოძრაობა _ ერთიანი საქართველოს“ ქობულეთის ორგანიზაციის თავმჯდომარემ და „სახალხო კრების“ ქობულეთის კომიტეტის ხელმძღვანელმა, რომან ჩხაიძემ განუცხადა, რომ ის „ქართულ ოცნებაში“ გადავიდა თავის გუნდთან ერთად. მისი თქმით, რამდენიმე დღის წინ დაიბარეს ის ცენტრალური ოფისში და უთხრეს, დაეხურათ რეგიონული შტაბები, რადგან ისინი არ აპირებდნენ არჩევნებში მონაწილეობის მიღებას და ზედმეტი ხარჯების თავიდან აცილების მიზნით მიიღეს ეს გადაწყვეტილება.
რომან ჩხაიძე, რომელსაც “ქართული ოცნების” ქობულეთის ორგანიზაციის წინ შევხვდით, ამბობს, რომ ისინი “ქართული ოცნების” გვერდით დადგებიან და მხარს დაუჭერენ მათ სამომავლო გეგმების განხორციელებაში.
„ახლა უმოქმედოდ ყოფნის დრო არ არის, ამიტომ ჩვენ დავდგებით რეალური ოპოზიციური ძალის გვერდით და მათთან ერთად ვიბრძოლებთ არსებული რეჟიმის წინააღმდეგ“, _ განუცხადა რომან ჩხაიძემ „გურია ნიუსს“.
