საუბარია კალაძის კომპანიებზე “მაქს ბეტი”, “კალა კაპიტალი”, აგრეთვე, საცხოვრებელ სახლებსა და ავტომობილებზე.
სახელმწიფო აუდიტი ს სამსახურმა გუშინ სპეციალური განცხადება გაავრცელა, რომელშიც აღნიშნულია რომ კახი კალაძეს გასული წლის ნოემბრიდან დღემდე პირად ანგარიშზე ჩაერიცხა 7 073 185 ლარი, საიდანაც ნაღდი ფულის სახით გატანილია 3 388 992 ლარი. აუდიტის სამსახური აცხადებს, რომ კალაძემ თანხის ხარჯვის მიზანშეწონილობა ვერ დაადასტურა.მოგელაძის უწყებამ კალაძეს საკუთარ ანგარიშებზე თანხის დაბრუნების მოთხოვნით 7 აგვისტოს მიმართა. კალაძემ ეს მოთხოვნა უკანონოდ ჩათვალა და შესაბამისად, თანხა ანგარიშზე არ დააბრუნა. კახი კალაძეს ჯარიმის გადასახდელად 7 დღიანი ვადა მიეცა, თუმცა ვეტერანმა ფეხბურთელმა ტელეკომპანია ”მაესტროს”უთხრა,რომ ჯარიმის გადახდას არ აპირებს. კალაძის თქმით, თანხის დიდი ნაწილი მისმა მამამ, კარლო კალაძემ გაიტანა და ოჯახურ საქმიანობას მოახმარა. პირადად მან, მხოლოდ 300 ათასი ლარი მოხსნა ანგარიშიდან.
„ჯარიმის დაკისრება უკანონობაა და მალე ყველა სათანადოდ აგებს პასუხს ჩადენილი კრიმინალისათვის“, _ განუცხადა კალაძემ ტელეკომპანია „მაესტროს.“
იგივე მოთხოვნა აუდიტის სამსახურმა ბიძინა ივანიშვილსაც გაუგზავნა და მისი და მისი მეუღლის პირადი ანგარიშებიდან გატანილი ფულის უკან დაბრუნება მოსთხოვა. ივანიშვილს თანხების დასაბრუნებლად აუდიტის სამსახურის მიერ დაწესებული ვადა დღეს ამოეწურა, შესაბამისად, სავარაუდოა, რომ უახლოეს დღეებში, აუდიტის სამსახური სასამართლოს ივანიშვილების უძრავ-მოძრავი ქონების დაყადაღების მოთხოვნით მიმართავს. ივანიშვილის ადვოკატი სანდრო ბარამიძე აცხადებს , რომ აუდიტის სამსახურის მოთხოვნა უკვე დიდი ხანია გაცდა კანონის ფარგლებს და მათი ქმედების წინასწარი პროგნოზირება შეუძლებელია.
