შეხვედრა დილის 11 საათზე დაიწყო და მას სკოლის პედაგოგები, დირექტორები, არასამეწარმეო იურიდიული პირების ხელმძღვანელები და სხვადასხვა საჯარო სამსახურის ხელმძღვანელები ესწრებოდნენ. ამავე შეხვედრაზე იყვნენ რიგითი მოქალაქეები, ოღონდ პარტიული კუთვნილების მიხედვით _ ზოგი ჩვეულებრივად ჩაცმული, ზოგიც კიდევ მმართველი პარტიის მაისურში გამოწყობილი. ამგვარი შეხვედრები, ჩვენი ინფორმაციით, ამგვარი შეხვედრები სხვადასხვა სოფელში, ღამის საათებშიც იმართება და მას საჯარო მოხელეების სრული შემადგენლობა ესწრება. ეს კი, კიდევ ერთხელ ადასტურებს, რომ საქართველო არ ასრულებს ადგილობრივი კანონმდებლობის და საერთაშორისო კონვენციების მოთხოვნას – ხელისუფლებისა და მმართველი პარტიის ერთმანეთისგან მკვეთრად გამიჯვნის შესახებ. კერძო სახლში, საკვირაო შეხვედრაზე "ზალაში" ჩამწკრივებულმა ადამიანებმა კითხვაზე, რატომ იყვნენ მოსულები, პასუხი არ გაგვცეს. პირველი საჯარო სკოლის დირექტორის, ხათუნა წილოსანის თქმით, შეხვედრის მიზნის შესახებ მისთვის არაფერია ცნობილი.
_ არ ვიცი, დიმა კორიფაძემ დაგვიბარა და მას კითხეთ, რატომ არის შეხვედრა, _ გვითხრა წილოსანმა.
ჩვენს კითხვაზე, რატომ არის შეხვედრა კერძო სახლში და მოუწესრიგებელ გარემოში, პასუხი არ გაგვცეს და მხოლოდ ის გვიპასუხეს, რომ აქ გრილა, თუმცა, გამგეობის თუ სხვა საჯარო დაწესებულების კონდიციონერიან სააქტო დარბაზს რომ ვერ შეედრებოდა შეხვედრის ადგილი, ეს ფაქტი იყო.
როგორც გაირკვა, არც ერთმა საჯარო მოხელემ არ იცოდა, თუ რა იყო შეხვედრის მიზანი. მათ არც ის იცოდნენ, მეორე სართულზე გაშლილი პურ-მარილი ვისი ხარჯებით გაკეთდა.
იუსტიციის სამინისტროს ჩოხატაურის სახლის დარაჯი, გია გიორგაძე, ჩვენ დანახვაზე იმდენად გაღიზიანდა, რომ სხვის საკუთრებაში "ფეხის შედგმა" აგვიკრძალა იმ მიზეზით, რომ შეხვედრა მისი ძმის სახლში იმართებოდა; თუმცა, როგორც დავადგინეთ, გია გიორგაძეს ძმა არ ჰყავს. მიუხედავად ამისა, გიორგაძის მეტად აგრესიული "ჩვენების" გამყარებას შეხვედრაზე ოდნავ მოგვიანებით მოსული კორიფაძეც შეეცადა და აღნიშნა, რომ ამ შეხვედრაზე ჩვენი ადგილი არ იყო.
გვითხრა, რომ ეს იყო კერძო შეხვედრა და დასძინა, რომ ოჯახის მეპატრონის ძმის სურვილია, ჩვენ იქ არ შეგვიშვას.
კორიფაძემ არ გაგვცა პასუხი კითხვაზე, ვისი თანხებით გაკეთდა შეხვედრაზე მყოფი ადამიანებისთვის პურმარილი და არის თუ არა ეს ამომრჩევლის მოსყიდვა.
