“გომისმთობა” 2012 და ნიკოლაიშვილის განმარტებები სპეციალურად “გურია ნიუსისთვის”

დოღის გამარჯვებული შპს “მარულას” მხედარი ოთარ ჭელიძე გახდა, რომლის მეტოქეები მეზობელი აჭარიდან იყვნენ ჩამოსულები.

“გომისმთობას” რეგიონული განვითარებისა და ინფრასტრუქტურის მინისტრი რამაზ ნიკოლაიშვილი დაესწრო. მისი თქმით, გურიაში კურორტების რეალიბიტაცია დაიწყო.

_ ჩვენ შევისწავლეთ პრობლემური საკითხები კურორტ გომისმთაზე, ეს არის შუქი, წყალი და მოვუგვარებთ შესაბამისად ამ ყველაფერს, ეს ძალიან მნიშვნელოვანია ჩვენთვის. უამრავი ხალხი არის დღეს მოსული აქ, _ განაცხადა რამაზ ნიკოლაიშვილმა და უყურადღებოდ არც “გურია ნიუსი” დატოვა.

_ სულ მე უნდა გადამიღო? მაცადე, დავტკბე სილამაზით, მოტრიალდი, ამ სილამაზეს (გომისმთის ხედები ჰქონდა მხედველობაში, ავტ.) გადაუღე, მე რას მიღებ. ნახე, რა ლამაზია, შეხედე, შეხედე, გირკელიძე.

_ ბატონო რამაზ, ეს ხედები თქვენზე ადრე ვნახე და ვიცი, რომ ძალიან ლამაზია…

_ ჩემზე ადრე ნახე?

_ დიახ, ამოსული ვიყავი კურორტზე.

_ შარშან?

_ შარშანაც ვიყავი და წელსაც.

_ შარშან არ ჩანდა, ნისლი იყო…(?!) ( როგორც ჩანს, მინისტრმა ისიც კი იცის, როდის და როგორ ამინდში სტუმრობდა “გურია ნიუსი” გომისმთას).

ჩვენთან საუბრის შემდეგ მან დღესასწაულთან დაკავშირებით ცენტრალურ მედიასაც მიაქცია ყურადღება და შემდეგ კი დამსვენებლებისთვისაც გააკეთა კომენტარი

_ ორი წელია, აქ ამოვდივარ, რომელიც ნისლის გარეშე ულამაზესია და არ არის ნაკლები ბახმაროზე. შემდეგ გომისმთობაზე უფრო სხვანაირი დაგხვდებათ ეს კურორტი, რა თქმა უნდა, უფრო ლამაზი და ბევრი რამ გაკეთებული იქნება. შემდეგი გომისმთობა იქნება ისეთი, როგორიც იქნება წელს დოღი ბახმაროში.

რაც შეეხება წყალს, რომელიც ასევე ადარდებდა ბატონ გირკელიძეს (“გურია ნიუსმა” მინისტრს წყლის პრობლემის შესახებ შეახსენა, რაც მოსახლეობამ ჩვენთან საუბრისას ერთ-ერთ მთავარ პრობლემად დაასახელა).

_ ბატონო რამაზ, სხვათაშორის, სახელი მაქვს და თუ შეიძლება, სახელით მომართეთ.

_ ააა, ბოდიში… არ ვიცი…

_ არ იცით, ჩემი სახელი? გიორგი გირკელიძე.

_ უნდა ვიცოდე?

_ გვარი ხომ იცით?

_ მოკლედ, ბატონ გიორგი გირკელიძეს მინდა განვუმარტო, რომ თანდათანობით ყველაფერი გაკეთდება, _ განაცხადა რამაზ ნიკოლაიშვილმა.

ბატონი მინისტრი, გურიის გუბერნატორი ვალერი ჩიტაიშვილი და ხელისუფლების სხვა წარმომადგენლები “გომისმთობაზე” ბოლომდე დარჩნენ. როგორც ჩვენთვის გახდა ცნობილი, ღონისძიებების შემდეგ სახელდახელოდ გამზადებულ სუფრასთან მიიწვიეს, რომელიც, დაახლოებით, 60 კაცისთვის იყო გაშლილი.

“გომისმთობა 2012”-ზე გამართულ კონცერტზე მონაწილეობა მიიღეს ჯგუფებმა “ლურჯი იალქანი” და “გურულმა ბიჭებმა”, ასევე ინდივიდუალურმა შემსრულებლებმა.