ეს ინფორმაცია „გურია ნიუსთან“ „ქართული ოცნების“ ადამიანთა უფლებების კომიტეტის წარმომადგენელი, შოთა ჯოხაძემაც დაადასტურა.
მისივე განმარტებით, 11 აგვისტოს, „ქართული ოცნების“ დუშეთის ოფისის მიერ გამართულ შეხვედრაზე სოფელ არღუნში, ერთ-ერთი ქალბატონი, რომელსაც თვითმხილველები სახეზე ცნობენ, ყველანაირად ცდილობდა პროვოკაციის მოწყობას. ჯანგული ჯანგირაშვილთან მას კამათი მოუხდა და ინციდენტი მაშინ ამით ამოიწურა.
გუშინ, საღამოს საათებში, ჯანგული ჯანგირაშვილი დააკავეს და რადგან არ ჩანდა არც ქრისტეფორე ჯანგირაშვილი, ფიქრობდნენ, რომ ისიც დაკავებული იყო.
„ქართული ოცნების“ ადამიანთა უფლებების კომიტეტის თავმჯდომარემ, თედო კობახიძემ რამდენიმე საათის შემდეგ მოახერხა შეხვედროდა დაკავებულ ჯანგულ ჯანგირაშვილს, რომლის განმარტებით, ნასვამ მდგომარეობაში იყო როდესაც დააკავეს და რაღაც საბუთზე მოაწერინეს ხელი, მაგრამ არ იცის რაზე.
თედო კობახიძის თქმით, ჯანგულ ჯანგირაშვილმა უკვე დაწერა საჩივარი პროკურატურის სახელზე.
„რაც შეეხება ქრისტეფორე ჯანგირაშვილს, რომელიც ჩვენ ასევე დაკავებული გვეგონა, აღმოჩნდა, რომ ის მცხეთის საავადმყოფოში იმყოფება. ეს ამბავი დუშეთის პოლიციაში გავიგეთ. როდესაც მივედით მცხეთის საავადმყოფოში მისი ამბის მოსაკითხად, კატეგორიული უარი გვითხრეს ავადმყოფთან შეხვედრაზე და რამდენიმე საათის განმავლობაში ვერ მოვახერხეთ იმის დადგენა, თუ რა მიზეზით მოათავსეს ის საავადმყოფოში. ბოლოს, მკურნალმა ექიმმა გაგვიცხადა, რომ ქრისტეფორე ჯანგირაშვილს ჰქონდა მაღალი წნევა, ამჟამად უკეთესადაა, მაგრამ მაინც რეანიმაციაში ჰყავთ მოთავსებული“, _ განაცხადა თედო კობახიძემ „გურია ნიუსთან“ საუბრისას.
